ការលើកឡើងរបស់លោក វីលៀម ប៊ើនស៍ ធ្វើឡើងបន្ទាប់ពីតំណាងរាស្ត្រលោកស្រី មូរ សុខហួរ ត្រូវបានតុលាការរាជធានីភ្នំពេញ បង្ខំរឹបអូសទ្រព្យសម្បត្តិ និងប្រាក់ខែរដ្ឋសភា ដើម្បីសងប្រាក់ពិន័យក្នុងករណីបរិហារកេរ្តិ៍លោក ហ៊ុន សែន ដែលតុលាការកាត់ឲ្យលោកស្រីចាញ់ក្ដី។
លោក វីលៀម ប៊ើនស៍ (William Burns) អនុរដ្ឋលេខាធិការក្រសួងការបរទេសសហរដ្ឋអាមេរិក ក្នុងសន្និសីទសារព័ត៌មានកាលពីថ្ងៃអាទិត្យ ទី១៨ កក្កដា បានស្នើឲ្យរដ្ឋាភិបាលកម្ពុជា ចៀសវាងដាក់ពាក្យបណ្ដឹងទៅតុលាការចំពោះអ្នកបញ្ចេញមតិផ្នែកនយោបាយ។ ទន្ទឹមពេលនោះដែរ លោកក៏បានថ្លែងថា សហរដ្ឋអាមេរិកបានសន្យាផ្ដល់ជំនួយក្នុងកម្មវិធីថ្មីមួយ ដើម្បីធ្វើឲ្យប្រសើរឡើងចំពោះវិស័យសន្តិសុខស្បៀង និងការទប់ទល់ ការប៉ះពាល់ការផ្លាស់ប្ដូរបរិយាកាសនៅកម្ពុជា។
ការស្នើរបស់លោក វីលៀម ប៊ើនស៍ ធ្វើឡើងបន្ទាប់ពីលោកបានបញ្ចប់ដំណើរទស្សនកិច្ចរបស់លោករយៈពេលពីរថ្ងៃនៅកម្ពុជា។ លោកបានជួបពិភាក្សាជាមួយលោកនាយករដ្ឋមន្ត្រី ហ៊ុន សែន និងតំណាងគណបក្សជំទាស់នៅកម្ពុជា រួមមានតំណាងរាស្ត្រ លោកស្រី មូរ សុខហួរ និងប្រធានគណបក្សសិទ្ធិមនុស្ស លោក កឹម សុខា។
លោក វីលៀម ប៊ើនស៍ បានថ្លែងដូច្នេះ ៖ "យើងបានជជែកចំពោះសារសំខាន់នៃសិទ្ធិសេរីភាពផ្នែកបញ្ចេញមតិ។ នៅក្នុងសង្គមដែលមានការជំរុញឲ្យមានប្រព័ន្ធនយោបាយទំនើបមួយ រដ្ឋធម្មនុញ្ញប្រទេសកម្ពុជា បានផ្ដល់សិទ្ធិសេរីភាពផ្នែកបញ្ចេញមតិ ដោយយើងគិតថា វាមានសារប្រយោជន៍ចំពោះសង្គមដែលមានការរីកចម្រើនផ្នែកនយោបាយ ដូច្នេះវាជាការសំខាន់ណាស់ ត្រូវមានការថ្លឹងថ្លែងករណីបណ្ដឹងបរិហារកេរ្តិ៍ ពីព្រោះជារឿយៗ ការជជែករិះគន់ ឬការជជែកពិភាក្សា វាជាការអនុវត្តល្អនៅក្នុងកិច្ចជជែកជាលក្ខណៈនយោបាយ ជាជាងតាមប្រព័ន្ធយុត្តិធម៌"។
លោកស្រី មូរ សុខហួរ ត្រូវបានតុលាការកម្ពុជា ស្នើឲ្យរដ្ឋសភាកម្ពុជា កាត់ប្រាក់ខែលោកស្រីដើម្បីសងជំងឺចិត្តលោក ហ៊ុន សែន។ តុលាការក៏បានស្នើឲ្យសមត្ថកិច្ចកម្ពុជា រឹបអូសទ្រព្យសម្បត្តិលោកស្រី មូរ សុខហួរ ដើម្បីសងប្រាក់ពិន័យព្រហ្មទណ្ឌ។
លោក វីលៀម ប៊ើនស៍ បានបន្ថែមថា សហរដ្ឋអាមេរិកបានផ្ដល់ជំនួយផ្នែកកសិកម្មមកប្រទេសកម្ពុជា ជាង ៧២លានដុល្លារផ្ដោតទៅលើបញ្ហាសុខភាព ការអប់រំ ការអភិវឌ្ឍន៍សេដ្ឋកិច្ច ហើយនិងគណនេយ្យភាពក្នុងរដ្ឋាភិបាល។ លោកនៅមិនទាន់បានបញ្ជាក់ចំនួនទឹកប្រាក់ដែលសហរដ្ឋអាមេរិក នឹងផ្ដល់ដល់ប្រទេសកម្ពុជា ក្នុងជំនួយផ្នែកកសិកម្មនេះនៅឡើយទេ។
លោក វីលៀម ប៊ើនស៍ ថា សហរដ្ឋអាមេរិក នឹងបន្តគាំទ្រតុលាការខ្មែរក្រហមដែលបាននាំខ្លួនអតីតមេដឹកនាំជាន់ខ្ពស់មកកាត់ទោស ហើយសហរដ្ឋអាមេរិកស្វាគមន៍ចំពោះការបញ្ចប់ករណី ០០១ របស់អតីតមេគុកទួលស្លែង ឌុច ដែលបានបង្ហាញឲ្យឃើញថា ជាព្រឹត្តិការណ៍ពិសេសក្នុងការលើកកម្ពស់នីតិរដ្ឋ និងបំបាត់និទ្ទណ្ឌភាពនៅកម្ពុជា។
សហរដ្ឋអាមេរិកបានផ្ដល់ថវិកាចំនួន ៥លានដុល្លារទៅដល់សាលាក្ដីខ្មែរក្រហម។
លោកស្រី មូរ សុខហួរ មានប្រសាសន៍នៅថ្ងៃអាទិត្យ ទី១៨ ខែកក្កដាថា លោកស្រីបានជួបលោក វីលៀម ប៊ើនស៍ កាលពីថ្ងៃសៅរ៍ ទី១៧ ហើយលោកស្រីស្នើឲ្យលោកជួយជំរុញឲ្យរដ្ឋាភិបាលកម្ពុជា មានប្រព័ន្ធតុលាការឯករាជ្យមួយ។
លោកស្រី មូរ សុខហួរ មានប្រសាសន៍ដូច្នេះ ៖ «ការលើកមក គឺមានន័យថា សហរដ្ឋអាមេរិកទទួលស្គាល់នូវទិដ្ឋភាពនៅកម្ពុជាយើង ដែលយករឿងតុលាការជារឿងនយោបាយហើយ។ ដូច្នេះខណៈលោកជាមនុស្សជាន់ខ្ពស់ទី៣នៃរដ្ឋាភិបាលអាមេរិក គឺជាសញ្ញាមួយដែលបង្ហាញឲ្យឃើញថា សហរដ្ឋអាមេរិកយកចិត្តទុកដាក់»។
លោកស្រីនៅតែប្រកាន់ជំហររបស់លោកស្រី គឺមិនបង់ប្រាក់ និងមិនព្រមកាត់ប្រាក់ខែដើម្បីសងប្រាក់ពិន័យតុលាការដដែល។
អ្នកនាំពាក្យគណៈរដ្ឋមន្ត្រី លោក ផៃ ស៊ីផាន មានប្រសាសន៍នៅថ្ងៃអាទិត្យ ថា ប្រសាសន៍របស់លោក វីលៀម ប៊ើនស៍ សំដៅទៅលើគណបក្សប្រឆាំងជាជាងរដ្ឋាភិបាល ពីព្រោះគណបក្សប្រឆាំងបានវាយប្រហាររដ្ឋាភិបាលដោយគ្មានការពិត។
លោក ផៃ ស៊ីផាន មានប្រសាសន៍ថា ៖ «យើងឃើញថា សារនេះ អ្នកត្រូវតែសូត្ររាងខ្លាំង ហើយច្រើនជាងគេ ស៊ីជម្រៅជាងគេ គឺគណបក្សប្រឆាំងនេះឯង ជាពិសេសលោកជំទាវ មូរ សុខហួរ។ គាត់ត្រូវរៀនសូត្រថា តើការប្រឹក្សា ការផ្លាស់ប្ដូរយោបល់ ការជជែកវែកញែកក្នុងវិស័យនយោបាយគួរតែឲ្យចំហ គួរឲ្យមានតម្លាភាព ឬក៏ស្មើភាពគ្នា ជាជាងការវាយប្រហារ ជាជាងការដណ្ដើមអ្វីដែលគេហៅថា នយោបាយ ឬប្រជាប្រិយភាព ឬក៏ប្រជាភិថុតិនោះឯង»។
លោក វីលៀម ប៊ើនស៍ បានការពារការសម្រេចចិត្តរបស់ក្រសួងការពារជាតិ និងក្រសួងការបរទេសសហរដ្ឋអាមេរិក ដែលបានជ្រើសរើសប្រទេសកម្ពុជា ជាម្ចាស់ផ្ទះធ្វើសមយុទ្ធយោធាពហុសាសន៍ បន្ទាប់ពីមានការរិះគន់ថា សហរដ្ឋអាមេរិកបានបំពានការប្ដេជ្ញាចិត្តរបស់ខ្លួនក្នុងការការពារសិទ្ធិមនុស្ស។ លោកថា ការចាប់ផ្ដើមសមយុទ្ធដែលមានឈ្មោះថា ឆ្មាំអង្គរ ២០១០ កាលពីថ្ងៃសៅរ៍ ទី១៧ ខែកក្កដា ដែលបានចូលរួមដោយលោក ហ៊ុន សែន បានបង្ហាញពីយុគសម័យថ្មីនៃកិច្ចសហប្រតិបត្តិការរវាងវិស័យយោធា កម្ពុជា និងសហរដ្ឋអាមេរិកក្នុងផ្នែកជំនួយមនុស្សធម៌៕