ប្រជាពលរដ្ឋ ៦៣៦គ្រួសារ នៅភូមិជ្រៃក្រឹម ប្រតិកម្មចំពោះអាជ្ញាធរជំនាញដែលបានចុះទៅធ្វើការវាស់វែងដីដែលក្រុមនិស្សិតបានវាស់វែងជូនប្រជាពលរដ្ឋរួចហើយ។
បុរសអ្នកភូមិឈ្មោះ ម៉ុម វណ្ណៈ ជាប្រជាពលរដ្ឋនៅភូមិជ្រៃក្រឹម ឃុំផ្ទះរុង ស្រុកភ្នំក្រវាញ ខេត្តពោធិ៍សាត់ គាត់បានឲ្យដឹងនៅព្រឹកថ្ងៃទី១៨ វិច្ឆិកា ថា កាលពីថ្ងៃទី៧ ខែវិច្ឆិកា មន្ត្រីការិយាល័យភូមិបាលស្រុកភ្នំក្រវាញ គឺលោក ចាន់ ហាក់ បាននាំកម្លាំងកងរាជអាវុធហត្ថ ប៉ូលិស និងមន្ត្រីជំនាញរដ្ឋបាលព្រៃឈើ ចុះមកវាស់វែងដីដែលក្រុមនិស្សិតបានវាស់វែង និងចេញសលាកបត្រព័ត៌មានជូនប្រជាពលរដ្ឋរួចហើយនោះជាថ្មីម្ដងទៀត។
បុរសអ្នកភូមិរូបនេះបារម្ភក្រែងអាជ្ញាធរជំនាញឃុបឃិតជាមួយក្រុមហ៊ុន ទូច ហ៊ីវ កាត់យកដីរបស់ពួកគាត់ដែលក្រុមនិស្សិតបានវាស់វែងឲ្យរួចហើយនោះ ប្រគល់ទៅឲ្យក្រុមហ៊ុន ទូច ហ៊ីវ វិញ៖ «ពួកខ្ញុំខ្លាចពួកគាត់ដើរចុច រួចហើយគាត់កាត់ដីប្រជាពលរដ្ឋចោល។ ទុកតែដីអាស្រ័យផល ១កុង ២កុង ម្នាក់ ហើយបើឲ្យប៉ុណ្ណឹងធ្វើអីកើត។ តាមពិត ដីដែលនេះមិនមែនតែប៉ុណ្ណឹងទេ ដោយសារក្រុមហ៊ុន ទូច ហ៊ីវ រាំងស្ទះមិនឲ្យពួកខ្ញុំធ្វើ»។
បុរសអ្នកភូមិឈ្មោះ សង ឃន បន្ថែមថា គាត់ចង់ឲ្យរឿងនេះបានដឹងដល់លោកនាយករដ្ឋមន្ត្រី ហ៊ុន សែន ទើបពួកគាត់សង្ឃឹមថាទទួលបានយុត្តិធម៌ពិតប្រាកដ៖ «សូមឲ្យខាងសារព័ត៌មានមេត្តាចុះផ្សាយរឿងនេះឲ្យដឹងដល់ប្រមុខរាជរដ្ឋាភិបាល ថាគាត់បានឲ្យនិស្សិតវាស់ឲ្យប្រជាពលរដ្ឋរួចហើយ តែឥឡូវមានខាងមេព្រៃ និងភូមិបាលចុះចុចម្ដងទៀត ដើម្បីឆ្វៀលយកពីប្រជាពលរដ្ឋវិញ»។
ប្រធានក្រុមនិស្សិតក្រុម១០៥ យុវនិស្សិតឈ្មោះ វណ្ណា បានឲ្យដឹងនៅរសៀលថ្ងៃទី១៨ វិច្ឆិកា ថា ការចុះវាស់វែងដីជាថ្មីឡើងវិញដោយអាជ្ញាធរជំនាញនេះ គឺជារឿងរបស់អាជ្ញាធរខេត្ត។ ក្រុមនិស្សិតពុំមានភារកិច្ច ហើយក៏មិនចូលរួមក្នុងការដោះស្រាយបញ្ហានេះទេ៖ «គេឲ្យខ្ញុំចុះទៅអង្កេត តែខ្ញុំអត់ទៅទេ ខាងខេត្តគេបង្កើតគណៈកម្មការចុះទៅខ្លួនគេ។ អាហ្នឹង គេកាត់ម៉េចកាត់ទៅ ខ្ញុំអត់ដឹងទេ»។
ប្រភពពីអាជ្ញាធរដែនដីភូមិ-ឃុំ បានឲ្យដឹងថា ការចុះវាស់វែងដីជាថ្មីឡើងវិញដោយអាជ្ញាធរជំនាញ បន្ទាប់ពីក្រុមនិស្សិតបានវាស់វែងម្ដងរួចហើយនេះ អាជ្ញាធរដែនដីមិនបានចូលរួមនោះឡើយ។
យ៉ាងនេះក្ដី ប្រធានមន្ទីររៀបចំដែនដី នគរូបនីយកម្ម និងសំណង់ ខេត្តពោធិ៍សាត់ លោក ចេង ឡៃ បានពន្យល់ចំពោះការចុះវាស់វែងឡើងវិញរបស់អាជ្ញាធរជំនាញថា មកពីការវាស់វែងរបស់ក្រុមនិស្សិតនាពេលកន្លងទៅនៅចំណុចភូមិជ្រៃក្រឹម នេះ មានភាពមិនច្បាស់លាស់ ក្បាលដីខ្លះជាតំបន់ព្រៃ៖ «ខេត្តបានបង្កើតគណៈកម្មការមួយទៀត ដើម្បីស្វែងរកភាពត្រឹមត្រូវ ពីព្រោះការវាស់វែងនៅទីនោះ វាមានជនខិលខូចជាយូរមកហើយ។ កន្លែងហ្នឹង វាមានលក្ខណៈស្មុគស្មាញណាស់ បងក៏ធ្លាប់ដឹងហើយ។ ហើយខាងក្រុមនិស្សិតទៅនេះ ក៏មិនមានភាពច្បាស់លាស់ទៀត ហាក់ដូចជាមានមនោសញ្ចេតនាជាមួយប្រជាពលរដ្ឋ។ អ៊ីចឹងហើយ បានជាយើងចុះទៅពិនិត្យលើក្បាលដីនីមួយៗ ព្រោះយើងខ្លាចដីព្រៃ ហើយយើងចេញប័ណ្ណឲ្យអាហ្នឹងគឺខុសនីតិវិធីនៃច្បាប់ហើយ។ បើជាត្រឹមត្រូវហើយ នោះគឺអត់មានអីទេ»។
យ៉ាងនេះក្ដី មន្ត្រីសម្របសម្រួលអង្គការការពារសិទ្ធិមនុស្សលីកាដូ (Licadho) លោក អេង ឈុនហាន មានប្រសាសន៍ថា យោងតាមប្រសាសន៍របស់លោកនាយករដ្ឋមន្ត្រី ក្នុងការចុះអនុវត្តន៍គោលនយោបាយចាស់សកម្មភាពថ្មីដោយក្រុមនិស្សិតនោះ ដីទាំងឡាយដែលប្រជាពលរដ្ឋបានកាន់កាប់ និងអាស្រ័យផលរួចហើយ តែមានផលប៉ះពាល់ជាមួយដីសម្បទានសេដ្ឋកិច្ច ដីគម្របព្រៃរបស់រដ្ឋ។ល។ គឺត្រូវតែកាត់ជូនទៅឲ្យប្រជាពលរដ្ឋកាន់កាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។