ក្រុមប្រជាពលរដ្ឋមួយចំនួនដែលកំពុងទ្រាំរស់នៅភូមិជប់គគីរលើខ្នងភ្នំដងរែកជាប់ព្រំដែនខ្មែរ-ថៃនៃឃុំអំពិល ស្រុកបន្ទាយអំពិល ខេត្តឧត្តរមានជ័យ បានអំពាវនាវឲ្យប្រមុខរដ្ឋាភិបាលខ្មែរជួយរៀបចំយ៉ាងណាដើម្បីឲ្យមានប្រជាពលរដ្ឋខ្មែរចំនួនច្រើនបានវិលត្រឡប់មករស់នៅតំបន់ព្រំដែននោះវិញ បន្ទាប់ពីប្រជាពលរដ្ឋជាច្រើនបានចុះចោលទីលំនៅចាប់តាំងពីមានវិបត្តិព្រំដែនរវាងប្រទេសខ្មែរ-ថៃមកនោះ។
មេភូមិជប់គគីរខាងលិច លោក សយ ថ្លៃ បានមានប្រសាសន៍កាលពីរសៀលថ្ងៃអាទិត្យ ទី២៧ ខែធ្នូ ថា កាលពីមុនកើតមានវិបត្តិព្រំដែនរវាងប្រទេសទាំងពីរ គឺមានប្រជាពលរដ្ឋជាង ៣០០គ្រួសារបានរស់នៅក្នុងភូមិចំនួន២ គឺភូមិជប់គគីរខាងលិចនិងភូមិជប់គគីរខាងកើត។ ក៏ប៉ុន្តែចាប់តាំងពីមានជម្លោះព្រំដែនមក ប្រជាពលរដ្ឋបានចុះចោលភូមិអស់ នៅសល់តែជាង ៦០គ្រួសារដោយសារតែអ្នកខ្លះភ័យខ្លាចនិងលក់ដីទៅឲ្យឈ្មួញ និងខ្លះទៀតដោយសារតែការខ្វះខាតស្បៀងអាហារ។
លោក សយ ថ្លៃ បានឲ្យដឹងថា ៖ «ខ្ញុំអំពាវនាវរាជរដ្ឋាភិបាល សម្តេចតេជោ សុំឲ្យជួយរៀបចំដីដែលនៅសល់។ នៅតំបន់ជប់គគីរយើងដីនៅសល់ច្រើន ដល់ហើយមានតែដីអត់មានប្រជាជន។ ខ្ញុំចង់បានប្រជាជនឲ្យបានមកនៅកុះករដូចពីដើមវិញ។ ម្យ៉ាងទៀតសុំឲ្យសម្តេចតេជោ ហ៊ុន សែន ជួយរៀបចំទីផ្សារផង»។
ប្រជាពលរដ្ឋខ្មែរម្នាក់ទៀតនៅភូមិជប់គគីរខាងលិចដែលសុំមិនបញ្ចេញឈ្មោះ ក៏បានមានប្រសាសន៍ប្រហាក់ប្រហែលគ្នានេះ ដោយថា ប្រជាពលរដ្ឋខ្មែរនៅទីនោះចាប់តាំងពីមានបញ្ហាព្រំដែនរវាងខ្មែរ-ថៃ គឺបានជួបប្រទះនឹងការគ្មានចំណូលនិងខ្វះខាតស្បៀងអាហារ ដែលគេចង់ឲ្យរដ្ឋាភិបាលខ្មែរជួយសម្រួលដល់ដំណើរការបើកច្រកព្រំដែនខ្មែរ-ថៃនៅទីនោះឡើងវិញ។
ពលរដ្ឋដដែលបានអះអាងថា ៖ «ការរស់នៅយើងហូបចុកវាលំបាកបន្តិចហើយ ព្រោះវាមិនបានបើកផ្សារដូចពីមុនណា៎! ដល់ហើយទៅការខ្វះខាតវាចេះតែខ្វះខាតហើយ។ ចង់ឲ្យបើកផ្សារខ្មែរ-ថៃដូចកាលពីមុន»។
ជំនួយការអភិបាលខេត្តឧត្តរមានជ័យ លោក ឈឹម ស៊ីវុធ បានមានប្រសាសន៍ថា អាជ្ញាធរខេត្តពិបាកនឹងឆ្លើយតបចំពោះបញ្ហាទាំងនោះ ដោយសារតែពីមុនប្រជាពលរដ្ឋដែលរស់នៅទីនោះគឺអាជ្ញាធរបានទទួលស្គាល់និងបែងចែកប្លង់ដីឲ្យអស់ទៅហើយ ក៏ប៉ុន្តែបែរជាលក់ទៅឲ្យឈ្មួញអស់ ហើយនាំគ្នាចុះចេញ ប៉ុន្តែពេលចង់មករស់នៅវិញ បែរជាសុំឲ្យបែងចែកដីថ្មីទៀតនោះ។
លោក ឈឹម ស៊ីវុធ បានមានប្រសាសន៍ថា អាជ្ញាធរខេត្តនឹងស្វាគមន៍ប្រជាពលរដ្ឋខ្មែរដែលចង់ទៅរស់នៅព្រំដែននោះ ប៉ុន្តែបើប្រជាពលរដ្ឋថ្មីចង់ទៅរស់នៅ ត្រូវធ្វើការស្នើសុំតាមរយៈភូមិឃុំ បើគ្រួសារទាហានគួរស្នើសុំតាមរយៈមេបញ្ជាការ នោះអាជ្ញាធរខេត្តនឹងស្នើសុំដីសម្បទានសង្គមកិច្ចបន្តទៀតដើម្បីរកដីទំនេរចែកជូន។
លោក ឈឹម ស៊ីវុធ បានបញ្ជាក់ថា ៖ «បើថាស៊ីវិល មកតាមភូមិឃុំអីចឹងមកណា! បើថាទាហាន តាមរយៈទាហានគេមានមេ មានកើយគេដែរ»។
មន្ត្រីឃុំអំពិលធ្លាប់បានមានប្រសាសន៍ថា ប្រជាពលរដ្ឋនៅភូមិជប់គគីរខាងកើតនិងខាងលិច គឺមិនមានដីស្រែនិងមុខរបរទេ ដែលកាលពីមិនទាន់មានទំនាស់ព្រំដែនខ្មែរ-ថៃ គឺទីពឹងតែចូលទៅធ្វើការក្នុងទឹកដីថៃ ក៏ប៉ុន្តែចាប់តាំងពីមានការបិទច្រកព្រំដែនមានប្រជាពលរដ្ឋខ្មែរជាច្រើនបានចាកចោលទីលំនៅចុះពីខ្នងភ្នំ ពីព្រោះតែការភ័យខ្លាចនិងខ្វះស្បៀង៕