បុរសវ័យចំណាស់ឈ្មោះ សុក វ៉ាន់ មានប្រសាសន៍ប្រាប់វិទ្យុអាស៊ីសេរីនៅព្រឹកថ្ងៃ៨ មេសា ថា ៖ «ថ្មីៗនេះ ក្រុមហ៊ុននោះក៏បានបញ្ជូនគ្រឿងចក្រជាបណ្ដើរៗចូលត្រង់តំបន់ដែលហាមឃាត់ដោយសម្ដេចនាយករដ្ឋមន្រ្តី ហ៊ុន សែន ហើយនិងក្រសួងធនធានទឹក»។
ស្រ្តីវ័យកណ្តាលឈ្មោះ ចាន់ វី មានប្រសាសន៍ថា ៖ «កាលថ្ងៃមុនហ្នឹង វិទ្យុអាស៊ីសេរីបានចេញផ្សាយថ្មីៗហ្នឹង ឃើញថា ក្រុមហ៊ុនហ្នឹងបានដកចេញពីតំបន់ហ្នឹងទៅខាងលើអស់ ហើយស្រាប់តែថ្ងៃហ្នឹងសាឡង់ និងកប៉ាល់របស់ក្រុមហ៊ុនខ្សាច់ខាងលើហ្នឹងបានត្រឡប់យកខ្សាច់វិញដដែល។ ខ្ញុំពិតជាភ័យព្រួយខ្លាំងណាស់ចំពោះការបាក់ស្រុតដីផ្ទះសម្បែងរហូតដល់អាយុជីវិតរបស់ក្រុមគ្រួសារខ្ញុំទៀត»។
ប៉ុន្តែអគ្គនាយករងក្រុមហ៊ុន ផល សារ៉េត អាហរ័ណ នីហរ័ណ ដែលជាអ្នកធ្វើសកម្មភាពចាប់កើបយកដីខ្សាច់ពីបាតទន្លេ គឺលោក ប៊ុន ច័ន្ទគ្រឹស្នា បានបដិសេធន៍ការចោទប្រកាន់ប្រជាពលរដ្ឋលោកមានប្រសាសន៍ពន្យល់យ៉ាងដូច្នេះថា ៖ «យើងចាប់ដោយដីអាហ្នឹងបានខ្លាចបាក់ច្រាំង នេះយើងចាប់យកតែខ្សាច់ ខ្លាចបាក់អី ច្រាំងទន្លេសុទ្ធតែដីហ្នឹង។ ទន្លេមិនមែនកើតពីខ្សាច់ឯណា កើតពីដី។ បើមិនយក វាហូរទៅវៀតណាម អូនឯងទៅមើលនៅវៀតណាម ...វៀតណាម ២០-៣០ ចាំចាប់ចាប់ខ្សាច់ខ្មែរហូរទៅ វាមិនមែនចាំយើងយកឯណា បើយើងមិនយក ក៏វៀតណាមគេចាំយក ហើយវៀតណាមដីគេថ្លៃជាងយើងផង គេមិនខ្លាចបាក់ច្រាំង។ វៀតណាមគេចាំចាប់យកតែរហូតហ្នឹង គេអត់មានឲ្យខ្សាច់កកចោលនៅក្នុងបាតទន្លេគេទេ អ៊ីចឹងបាន សិង្ហបុរី ចូលមកទិញខ្សាច់នៅវៀតណាម ខ្មែររវល់តែឈ្លោះគ្នាខ្លាចបាក់ច្រាំងៗ ថាតែមាត់ មិនដឹងសំអាងលើអី»។
គួរកត់សម្គាល់ថា សកម្មភាពចាប់កើបយកដីខ្សាច់ពីបាតទន្លេរបស់ក្រុមហ៊ុន ផល សារ៉េត នៅតំបន់អ្នកលឿងគិតចាប់ពីអ្នកលឿងត្រង់និយាមការ A រហូតដល់ភូមិចម្ការតាវែង ត្រង់និយាមការ B មានប្រវែងប្រមាណ១០គីឡូម៉ែត្រ ចាប់ពីកំពង់ចម្លង ត្រូវបានក្រសួងឧស្សាហកម្ម រ៉ែ ថាមពលនិងក្រសួងធនធានទឹកនិងឧតុនិយមចេញសេចក្តីសម្រេចហាមឃាត់មិនឲ្យធ្វើអាជីវកម្មដោយមានចំណារឯកភាពរបស់លោកនាយករដ្ឋមន្ត្រី ហ៊ុន សែន តែការហាមឃាត់របស់ក្រសួងទាំង២ ហាក់ពុំមានប្រសិទ្ធភាពឡើយ៕