មន្រ្តីក្រសួងការងារលើកហេតុផលថា ក្រសួងកំពុងរៀបចំឯកសារលម្អិត ដើម្បីបញ្ជូនទៅលេខាធិការដ្ឋានគណៈកម្មការប្រឹក្សាការងារ ដើម្បីនឹងបើកកិច្ចប្រជុំពិភាក្សានាពេលឆាប់ៗខាងមុខនេះ។
ប្រធានសហជីពសេរីកម្មករនៃព្រះរាជាណាចក្រកម្ពុជា លោក ជា មុន្នី បានថ្លែងនៅថ្ងៃទី៤ ខែមិថុនា ឆ្នាំ២០១០ ថា មន្ត្រីជាន់ខ្ពស់នៃក្រសួងការងារ និងបណ្ដុះបណ្ដាលវិជ្ជាជីវៈ អាចមានផលប្រយោជន៍ ជាមួយនឹងសមាគមកាត់ដេរកម្ពុជា និងក្រុមនិយោជក ដោយសារតែមិនអនុញ្ញាតឲ្យក្រុមកម្មករធ្វើកូដកម្ម និងមិនដោះស្រាយដំឡើងប្រាក់ខែឲ្យកម្មករ។
ករណីលើកឡើងបែបនេះរបស់លោក ជា មុន្នី ដោយសារតែក្រសួងការងារ និងបណ្ដុះបណ្ដាលវិជ្ជាជីវៈ បានចេញលិខិតមួយអំពាវនាវឲ្យកម្មករនិយោជិត គោរពច្បាប់ការងារឲ្យបានខ្ជាប់ខ្ជួន ហើយមិនត្រូវធ្វើបាតុកម្ម ដើម្បីទាមទារដំឡើងប្រាក់ខែ ដែលក្រសួងចាត់ទុកថាធ្វើតាមការឃោសនាខុសច្បាប់នោះ។
នៅថ្ងៃទី៣ ខែឧសភា ក្រសួងការងារបានចេញលិខិតមួយ ដោយបញ្ជាក់ថា គណៈកម្មការប្រឹក្សាការងារបានដំណើរការប្រជុំពិភាក្សាម្ដងរួចមកហើយ ជាមួយសហព័ន្ធសហជីព ស្តីពីការដំឡើងប្រាក់ខែឈ្នួលអប្បបរមាដល់កម្មករ ពីដើមខែកុម្ភៈ ឆ្នាំ២០១០ ហើយកិច្ចការនោះ គ្រប់ភាគីដែលពាក់ព័ន្ធនឹងរៀបចំឯកសារលម្អិតដើម្បីបញ្ជូនទៅលេខាធិការដ្ឋានគណៈកម្មការប្រឹក្សាការងារ ហើយនិងធ្វើកិច្ចប្រជុំពិភាក្សានៅពេលខាងមុខ។
លោក ជា មុន្នី ប្រធានសហជីពសេរីកម្មករនៃព្រះរាជាណាចក្រកម្ពុជា បានថ្លែងថា ការពិភាក្សាគ្នាថា នឹងដំឡើងប្រាក់ខែឲ្យកម្មករនោះ គឺបានធ្វើឡើងតាំងពីឆ្នាំ២០០៦ និងឆ្នាំ២០០៨ ប៉ុន្តែមកដល់ពេលនេះនៅតែមិនមានលទ្ធផលនៅឡើយ។
លោកបានថ្លែងឲ្យដឹងទៀតថា លោកនឹងបន្តស្នើសុំធ្វើកូដកម្មបន្តទៀត ប្រសិនបើមិនមានការដោះស្រាយតាមការជជែកគ្នានាពេលកន្លងមកនោះ។ លោក ជា មុន្នី បានថ្លែងទៀតថា កម្មករមានប្រាក់ខែ ៥០ដុល្លារអាមេរិក នោះមិនអាចចាត់ចែងការរស់នៅរបស់គាត់បានគ្រប់គ្រាន់ឡើយ។
កម្មករម្នាក់គឺលោក អ៊ុន ដារ៉ា ជាជំនួយការរបស់សហព័ន្ធសហជីពសេរីកម្មករផងនោះ បានថ្លែងឲ្យដឹងដែរថា បើធៀបប្រាក់ខែ ៥០ដុល្លារអាមេរិកនោះ កម្មករម្នាក់សល់លុយសម្រាប់ផ្ញើទៅផ្ទះវិញបាន ១០ដុល្លារ ឬ ១៥ដុល្លារក្នុងមួយខែ។
លោកបានថ្លែងថា ការស្នើសុំឲ្យថៅកែដំឡើងប្រាក់ខែឲ្យកម្មករនេះ គឺជារឿងដែលកម្មករទាំងអស់សប្បាយ ហើយក៏សុំឲ្យមានការចរចាគ្នាតាមសន្តិវិធី។ លោកបន្តថា សុំឲ្យរដ្ឋាភិបាលគោរពកិច្ចការចរចា និងសន្យា ដោយកុំបណ្ដោយឲ្យកម្មករទទួលប្រាក់ខែដែលមិនអាចផ្គត់ផ្គង់ខ្លួនឯងបានផងនោះ៕