(បទពាក្យ៧)
១. គ្រប់ឪពុកម្ដាយចំណាយធន ការងារស្រាលធ្ងន់មិនត្អូញត្អែរ
ចិត្តចង់ឲ្យកូនរៀនពូកែ ស័ក្ដិសមកូនខ្មែរអ្នកល្បាញល្បី។
២. ម៉ែឪទាំងទ្វេគ្មានចំណេះ ចង់ឲ្យកូនចេះមានរស្មី
ខ្លាចកូនល្ងឹតល្ងង់ល្ងើអប្រិយ ខំប្រដៅស្ដីឲ្យកូនល្អ។
៣. តែបែរកូនខ្លះខ្លៅមិនដឹង គន់គិតប្រែងប្រឹងព្រើលឈ្លោះត
គ្មានស្គាល់គុណទោសខ្មៅឬស រករឿងបង្កកើតជម្លោះ។
៤. ផឹកស៊ីស្រីញីញៀននឹងល្បែង មិនគិតកោតក្រែងដល់កេរ្តិ៍ឈ្មោះ
ដើរលេងប៉ោឡែនាំអាប់យស បែកឈាមរបួសរស់ពិការ។
៥. ទឹកចិត្តម៉ែឪនៅតែគិត ទោះកូនប្រព្រឹត្តខុសយ៉ាងណា
មិនបោះបង់កូននៅមេត្តា ថិតថែរក្សាសែនស្ងួនភ្ងារ។
៦. កាត់ទឹកមិនដាច់សាច់មិនបង់ នៅតែតម្រង់កូនគ្រប់គ្នា
ឲ្យតែកូនសុខសាន្តសោភា ទោះខ្លួនឈឺជាក៏មិនថា។
៧. នេះហើយទឹកចិត្តឪពុកម្ដាយ ហ៊ានលះបង់កាយបង់សង្ខារ
ព្រោះដើម្បីកូនគ្រប់រូបា អ្នកជាទេពតារក្សាយើង៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។