ចំណងអាពាហ៍ពិពាហ៍មួយដែលបានចងភ្ជាប់ស្របតាមលក្ខណៈប្រពៃណីខ្មែរអស់រយៈពេល ១៨ឆ្នាំកន្លងទៅហើយនោះ ត្រូវបានកាត់ផ្តាច់ទៅវិញដោយពុំចាំបាច់ពឹងប្រព័ន្ធច្បាប់ ព្រោះសាម៉ីខ្លួនទាំងសងខាងសម្រេចចិត្តពុះចែកគេហដ្ឋានដែលពួកគេធ្លាប់រស់នៅប្រកបដោយសុភមង្គលនោះជា២ចំណែកដើម្បីជាចំណងដៃនៃការចែកផ្លូវគ្នានេះ។
ព្រឹត្តិការណ៍ដ៏ចម្លែកនេះ បានកើតឡើងនៅឯភូមិដាច់ស្រយាលមួយឈ្មោះថា ភូមិជាច ស្ថិតនៅក្នុងឃុំជាច ស្រុកកំចាយមារ ខេត្តព្រៃវែង ដែលមានចម្ងាយប្រមាណ ៤៨ គីឡូម៉ែត្រ ពីទីរួមខេត្តព្រៃវែង និងប្រមាណ ១៣៩គីឡូម៉ែត្រពីទីក្រុងភ្នំពេញ។
មូលហេតុដើមដែលនាំទៅដល់ការប្រេះស្រាំចំណងអាពាហ៍ពិពាហ៍រហូតមានការពុះចែកគេហដ្ឋានគ្នានេះពុំមានអ្វីជាធំដុំនោះទេ នេះបើតាមការរៀបរាប់របស់ស្ត្រីដែលជាភរិយាឈ្មោះ វ៉ាត ណាវី ក៏ដូចជាលោកតា ហួន មឿន ដែលត្រូវជាឪពុកបង្កើតរបស់ ហួន សារឹម ស្វាមីរបស់អ្នកស្រី វ៉ាត ណាវី បានរៀបរាប់នោះ។
អ្នកស្រី វ៉ាត ណាវី ភរិយារបស់ ហួន សារឹម បានរៀបរាប់ប្រាប់អ្នកយកព័ត៌មានវិទ្យុអាស៊ីសេរី ទាំងទឹកមុខស្រពាប់ស្រពោនថា ថ្វីត្បិតតែមានទំនាស់គ្នាបន្តិចបន្តួចតែតាមពិតប្តី ប្រពន្ធអ្នកស្រីពុំមានគំនិតចង់លែងលះគ្នានោះទេ តែមកពីគ្រួសារខាងប្តីបង្ខំ ឯប្តីអ្នកស្រីជាកូនកត្តញ្ញូ ទើបកើតមានការលែងលះគ្នាយ៉ាងដូច្នេះ។
អ្នកស្រី វ៉ាត ណាវី ថ្លែងរៀងរាប់ដូច្នេះថា ៖ «បើតាមតែប្ដីប្រពន្ធ វាមិនស្អីប៉ុន្មានទេ ម៉ែឪបងប្អូនគេទេ គេអ្នកខ្លាំង។ ដល់រួចទៅគេធ្វើពាក្យសុំលែងខ្ញុំ គេមិនអាចរស់នៅជាមួយខ្ញុំទៀត។ ខ្ញុំអត់មានលែងគេទេពីដំបូង តែគេដាច់អហង្ការលែង ដាក់អហង្ការថាលែង ខ្ញុំក៏លែងទៅ ប៉ុន្តែបែងចែកទ្រព្យសម្បត្តិ។ ដល់រួចទៅខ្ញុំចាញ់គេ គេឡឹបម៉ូតូបាត់ទៅ ពុះផ្ទះមួយចំហៀង ហើយម៉ូតូក៏បានទៅគេ ចេញឲ្យគេអស់ ២លាន ៤០ម៉ឺនរៀលទៀត គោក៏គេយក យកគ្មានសល់អីទេ»។
អ្នកយកព័ត៌មានវិទ្យុអាស៊ីសេរី ពុំអាចសុំការបំភ្លឺពីលោក ហួន សារឹម ស្វាមីរបស់អ្នកស្រី វ៉ាត ណាវី បានទេ ដោយលោកតា ហួន មឿន ដែលត្រូវជាឪពុកបង្កើតរបស់លោក ហួន សារឹម បានអះអាងថា កូនរបស់គាត់បានធ្វើដំណើរទៅព្យាបាលជំងឺជាមួយគ្រូឱសថបូរាណនៅឯខេត្តស្វាយរៀង ព្រមទាំងអះអាងជាមួយអ្នកយកព័ត៌មានវិទ្យុអាស៊ីសេរីថា លោកតាអាចឆ្លើយជំនួសបាន។
លោកតា ហួន មឿន បានបដិសេធការចោទប្រកាន់របស់អ្នកស្រី វ៉ាត ណាវី ដែលជាកូនប្រសារ។ លោកតាមានប្រសាសន៍ដោយពឹងផ្អែកលើអបិយជំនឿថា ប្រការដែលកូនប្រុសគាត់មិនមាត់កឬទាមទារលែងលះ គឺមកពីត្រូវអំពើរបស់កូនប្រសារគាត់ គឺអ្នកស្រី វ៉ាត ណាវី។
លោកតា ហួន មឿន មានប្រសាសន៍ថា ៖ «ព្យាបាលម្ខាងមកម្ខាង ត្រឡប់ត្រឡិនៗ។ ឲ្យពេទ្យមកចាក់ ចាក់ៗហើមខ្លួន។ ហើមគេអ្នកផ្ទះ គេថា ធាត់ ខ្លួនឯងហើម ហើយយកទៅពេទ្យធំ យកទៅសួរ ទៅពិនិត្យ ដល់ពិនិត្យទៅ វាមានឈាមស ឈាមក្រហម អាហ្នឹងវាមានកម្រិតខុសគ្នាឆ្ងាយ ព្យាបាលអាហ្នឹងមួយគន្លាក់។ ព្យាបាលទៅធូរហើយ។ វាស់ពិនិត្យអីទៅ ពេទ្យថា ទេបើជំងឺហ្នឹងអត់ធូរទេ អត់ថយទេ រកខាងក្រៅទៅ កុំមករកពេទ្យពេក ក្រែងលោទប់មិនឈ្នះ។ បានរកគ្រូខ្មែរម្ដង»។
ប៉ុន្តែ អ្នកស្រី វ៉ាត ណាវី បានពន្យល់ចំពោះបញ្ហាខាងលើនេះថា បើតាមវេជ្ជបណ្ឌិតម្នាក់ដែលអ្នកស្រីមិនចាំឈ្មោះនៅឯមន្ទីរពេទ្យបង្អែកខេត្តព្រៃវែង បានប្រាប់ថា ប្តីអ្នកស្រីមានជំងឺមហារីកឈាមដែលជំងឺនេះ ជួនកាលអ្នកជំងឺហាក់បានធូរស្បើយ ជួនកាលដុនដាប។
អ្នកស្រីបន្តដោយចោទប្រកាន់ថា ដោយដឹងពីស្ថានភាពជំងឺរបស់កូនខ្លួន ឪពុកក្មេកអ្នកស្រីមានគំនិតចង់បានចំណែកផ្ទះសំបែងនិងដីធ្លីដែលជាញើសឈាមរវាងអ្នកស្រីនិងប្តីមុនពេលដែលប្តីអ្នកស្រីស្លាប់ទៅ ៖ «ចំណុចសំខាន់បងប្អូនវា ម៉ែឪវា វាចង់ចំណាយកូនវាមួយចោលទៅ ដើម្បីដីភូមិខ្ញុំទេ»។
មេឃុំជាច លោក វង ម៉ន មានប្រសាសន៍ថា លោកពុំបានដឹងពីជម្រៅនៃគំនិតរបស់គ្រួសារអ្នកស្រី វ៉ាត ណាវី នោះទេ។ ប៉ុន្តែលោកធ្លាប់បានហៅពួកគេទាំង២ មកផ្សះផ្សាជាច្រើនដង ទីបំផុត នៅតែពុំអាចជៀសផុតពីការបែកបាក់ដែលរហូតដល់ការសម្រេចពុះផ្ទះជា ២ចែកទ្រព្យគ្នាដោយពុំស្វែងរកដំណោះស្រាយតាមផ្លូវច្បាប់យ៉ាងដូច្នេះ។
លោក វង ម៉ន មានប្រសាសន៍ថា ៖ «រឿងម្ដងពីរដងបានលែងបាន។ ផ្សះផ្សាហ្នឹង សម្រួលមូលគ្នាវិញទៅ បើខុសឆ្គងអីម៉េចៗ កុំឲ្យវាមានបញ្ហាអីទៅថ្ងៃមុខថ្ងៃក្រោយ ខ្ញុំថា ប្រយ័ត្នតែស្ដាយក្រោយ ហើយម្យ៉ាងកូនវានៅតូចៗ ប៉ុន្តែកូនហ្នឹងវានៅត្រូវខាងម៉ែវា អត់ត្រូវនឹងឪទេ»។
អ្នកស្រី វ៉ាត ណាវី មានប្រសាសន៍ថា ដោយមានយោបល់ពីញាតិមិត្តពន្យល់ថា ការប្តឹងផ្តល់ទៅតុលាការប្រសិន បើគ្មានប្រាក់គឺពុំអាចឈ្នះក្តីឡើយ។ អ្នកស្រីបន្តថា គ្រួសារខាងប្តីអ្នកស្រីមានខ្នងបង្អែក ប្រសិនបើអ្នកស្រីមិនយល់ស្របពុះផ្ទះនេះចែកគ្នាទេ គឺអ្នកស្រីពុំអាចរស់នៅមានសេចក្តីសុខជាមួយកូននោះឡើយ។
អ្នកស្រី វ៉ាត ណាវី រៀបរាប់បន្ថែមទៀតដូច្នេះថា ៖ «បានជាដាច់ចិត្តថា ឲ្យគេយកផ្ទះហ្នឹង ព្រោះដើម្បីថ្ងៃតទៅមុខទៀតទៅ ៣នាក់ម៉ែកូនហ្នឹង ឲ្យមានសេចក្ដីសុខទៀត។ បើសិនជាខ្ញុំមិនឲ្យ នៅលើផ្ទះហ្នឹង ៣នាក់ម៉ែកូន ប្រហែលជាគ្មានសេចក្ដីសុខទេ បងប្អូនគេ គេសុទ្ធតែអ្នកខ្លាំងៗ»។
យ៉ាងណាក៏ដោយការផ្តាច់ចំណងអាពាហ៍ពិពាហ៍រហូតឈានដល់ពុះផ្ទះចែកគ្នានេះ បានជះឥទ្ធិពលអវិជ្ជមានយ៉ាងខ្លាំង ដល់កូនទាំងពីរនាក់នៃគ្រួសារនេះដែលកំពុងនៅក្នុងវ័យសិក្សា។
កញ្ញា សារឹម ស្រីមុំ អាយុ ១៨ឆ្នាំ ដែលកំពុងសិក្សានៅវិទ្យាល័យជាច មានបំណងឈប់រៀន ព្រោះតែការអៀនខ្មាសគួបផ្សំកង្វះខាតថវិកា ៖ «ខ្ញុំអត់ចង់ទៅរៀនទៀតទេ ខ្ញុំចង់ឈប់រៀន។ ខ្ញុំមានអារម្មណ៍ថា ខ្មាសគេ ខ្មាសមិត្តភក្តិ អត់ចង់ទៅរៀនទេ ពេលឃើញខ្ញុំដើរអ៊ីចឹង គេប្រើសម្ដីឌឺដងចុះឡើង»។
ក្នុងការលែងលះគ្នានេះ អ្នកស្រី វ៉ាត ណាវី ទទួលបានផ្ទះមួយចំហៀងនិងដីភូមិដែលជាកេររបស់ឪពុកម្តាយអ្នកស្រីចងដៃឲ្យប៉ុណ្ណោះ។
ទោះបីជាយ៉ាងនេះក្តី ប្រធានអង្គការក្រុមអ្នកច្បាប់ការពារសិទ្ធិកម្ពុជា លោក សុក សំអឿន ពន្យល់ចំពោះករណីនៃការបែងចែកទ្រព្យខាងលើនេះថា ៖ «អត់អេតាស៊ីវិល គាត់បែងចែកតែគ្នាគាត់អ៊ីចឹងអត់អីទេ ព្រោះហាក់បីដូចជាយោងតាមកិច្ចសន្យាដែរ ប៉ុន្តែបើសិនជាគាត់មានអេតាស៊ីវិល ចែកអ៊ីចឹងក៏ដោយ ក៏អត់មានសុពលភាពក្នុងច្បាប់ដែរ ហើយដល់ពេលថ្ងៃក្រោយ មានភាគីណាមួយតវ៉ានាំតែពិបាកទេ យកល្អចែកព្រមព្រៀងអ៊ីចឹងហើយ ទៅតុលាការថែមទៀត ថា ឥឡូវសុំឲ្យអ្នកឯងទទួលស្គាល់ការព្រមព្រៀងរបស់ខ្ញុំ ហើយយើងសុំលែងលះគ្នាអ៊ីចឹងទៅ ព្រមព្រៀងទៅ សុខចិត្តតាមហ្នឹងទៅបានហើយ អាហ្នឹងបានជាផ្លូវការ ស្របច្បាប់បាន»។
សូមបញ្ជាក់ថា ក្នុងការលែងលះគ្នានេះ អ្នកស្រី វ៉ាត ណាវី ជាអ្នកទទួលបន្ទុករ៉ាប់រងចិញ្ចឹមកូនទាំង២នាក់គឺ កញ្ញា សារឹម ស្រីមុំ និង កុមារា សារឹម បូរិន៕