ពលរដ្ឋ​១៣​គ្រួសារ​នៅ​ទួលគោក​ប្រឈម​នឹង​ការ​បណ្ដេញ​ចេញ

ប្រជាពលរដ្ឋ​១៣​គ្រួសារ​នៅ​ក្នុង​សង្កាត់​បឹងកក់១ ខណ្ឌ​ទួលគោក រាជធានី​ភ្នំពេញ កំពុង​តែ​ព្រួយ​បារម្ភ​យ៉ាង​ខ្លាំង​អំពី​ការ​បាត់បង់​ទី​ជម្រក​នៅ​ពេល​ខាង​មុខ​នេះ ក្រោយ​ពី​អាជ្ញាធរ​ខណ្ឌ​ទួលគោក​បាន​ដាក់​កំហិត​ឲ្យ​រុះរើ​ផ្ទះ​សម្បែង​ក្នុង​រយៈ​ពេល​៣០​ថៃ្ង បើ​មិន​ដូច្នោះ​ទេ​អាជ្ញាធរ​ខណ្ឌ​នឹង​ចុះ​រុះរើ​ដោយ​ផ្ទាល់។
ដោយ សុខ សេរី
2010-01-16
អ៊ីម៉ែល
មតិ
Share
បោះពុម្ព
កម្មករ​រុះរើ​ផ្ទះ​អ្នក​ភូមិ​នៅ​តំបន់​ដី​ក្រហម​ក្នុង​សង្កាត់​ទន្លេបាសាក់ ខណ្ឌ​ចំការមន ក្រុង​ភ្នំពេញ កាលពី​ថ្ងៃ​២៤ មករា ២០០៩។
កម្មករ​រុះរើ​ផ្ទះ​អ្នក​ភូមិ​នៅ​តំបន់​ដី​ក្រហម​ក្នុង​សង្កាត់​ទន្លេបាសាក់ ខណ្ឌ​ចំការមន ក្រុង​ភ្នំពេញ កាលពី​ថ្ងៃ​២៤ មករា ២០០៩។
RFA/Ouk Savborey

ការ​ជូន​ដំណឹង​ដល់​គ្រួសារ​ចំនួន​១៣​គ្រួសារ​នោះ បាន​ធ្វើ​ឡើង​តាំង​ពី​ថៃ្ង​ទី​២៤ ខែ​ធ្នូ កន្លង​ទៅ​នេះ ពោល​គឺ​នៅ​សល់​រយៈ​ពេល​មួយ​សប្តាហ៍​ទៀត​តែ​ប៉ុណ្ណោះ ដែល​ជា​ថៃ្ង​ឱសានវាទ​នៃ​ការ​រុះរើ​ឈាន​មក​ដល់។

ប្រជាពលរដ្ឋ​ឈ្មោះ អ៊ឹម វាសនា អាយុ​៣៣​ឆ្នាំ នៅ​ក្នុង​ភូមិ​១៣ សង្កាត់​បឹងកក់១ ខណ្ឌ​ទួលគោក រាជធានី​ភ្នំពេញ បាន​ថែ្លង​ប្រាប់​វិទ្យុ​អាស៊ី​សេរី​ថា ការ​រុះរើ​និង​បណ្តេញ​នោះ​គ្មាន​សំណង​នៃ​ការ​ខូចខាត​ទេ។

លោក អ៊ឹម វាសនា បាន​ឲ្យ​ដឹង​ដូច្នេះ ៖ «ប្រជាពលរដ្ឋ​ទាំង​១៣​គ្រួសារ​មាន​ការ​ព្រួយ​បារម្ភ​ចំពោះ​ការ​រុះរើ​ហ្នឹង គាត់​ភ័យ​ខ្លាច​អត់​មាន​ទៅ​លំនៅ​ដែល​ត្រូវ​រស់​នៅ។ គេ​ដោះដូរ​ជាមួយ​នឹង​ដី​មួយ​ឡូត៍។ ពួក​ខ្ញុំ​មិន​មាន​ការ​បដិសេធ​ទេ​បើ​សិន​ជា​គាត់​ត្រូវ​ការ​យក​ផ្លូវ​នោះ​ទាំង​អស់ ពី​ព្រោះ​ផ្លូវ​នោះ​បើ​យក​ទាំង​អស់ ពី​ព្រោះ​ផ្លូវ​នោះ​បើ​យក​ទាំង​អស់​មាន​ទំហំ​៣០​ម៉ែត្រ។ សូម​សំណូមពរ​ឲ្យ​គាត់​ដោះស្រាយ​ទំនាស់​ឲ្យ​បាន​សមរម្យ ដែល​គាត់​ឲ្យ​ដី​មួយ​ឡូត៍​គឺ​នៅ​ឯ​ជាយ​ក្រុង បើ​តាម​ឮ​គាត់​ថា មិន​ដឹង​ថា​ដី​ហ្នឹង​មាន​ពិត​ប្រាកដ​នៅ​ឡើយ​ទេ»

ប្រជាពលរដ្ឋ​ម្នាក់​ទៀត​ឈ្មោះ សុការី អាយុ​២៦​ឆ្នាំ ដែល​កំពុង​តែ​ប្រឈម​មុខ​នឹង​ការ​រុះរើ​ឆាប់ៗ​នេះ​ផង​ដែរ បាន​ថែ្លង​ថា ៖ «គេ​នឹង​រុះរើ​ផ្ទះ​របស់​យើង​ខ្ញុំ​ក្នុង​រយៈពេល​៣០​ថ្ងៃ​ចាប់​ពី​ថ្ងៃ​ជូន​ដំណឹង គឺ​ថ្ងៃ​ទី​២៤ ខែ​ធ្នូ»

គ្រួសារ​ទាំង​នោះ​បាន​មក​រស់​នៅ​ក្នុង​តំបន់​នោះ​រយៈ​ពេល​ជាង​២០​ឆ្នាំ​មក​ហើយ​តាំង​ពី​ទសវត្ស៍​ឆ្នាំ​១៩៨០​មក​ម្ល៉េះ ដោយ​មាន​ការ​ទទួល​ស្គាល់​ពី​អាជ្ញាធរ​មូលដ្ឋាន។

វិទ្យុ​អាស៊ី​សេរី​បាន​ទាក់ទង​សុំ​ការ​បក​ស្រាយ​ពី​លោក​អភិបាល​និង​អភិបាល​រង​ខណ្ឌ​ទួលគោក អំពី​ការ​ដោះស្រាយ​ចំពោះ​ការ​ខ្វល់ខ្វាយ​របស់​គ្រួសារ​ប្រជាពលរដ្ឋ​ចំនួន​១៣​គ្រួសារ​នោះ ប៉ុន្តែ​ពុំ​មាន​អ្នក​ឆ្លើយ​តប។

លោក ម៉ាន់ ឈឿន ជា​អភិបាល​រង​រាជធានី​ភ្នំពេញ បាន​មាន​ប្រសាសន៍​ថា លោក​មិន​ទាន់​បាន​ដឹង​រឿង​នេះ​នៅ​ទ្បើយ​ទេ។

លោក ម៉ាន់ ឈឿន មាន​ប្រសាសន៍​ថា ៖ «រឿង​ហ្នឹង​អត់​ដឹង​ទេ ទាល់​តែ​សួរ​លោក​ខាង​ខណ្ឌ ព្រោះ​ប៉ុន្មាន​ថ្ងៃ​ហ្នឹង​ខ្ញុំ​ចុះ​ទៅ​ខេត្ត»។

ប្រភព​ពី​គ្រួសារ​ប្រជាពលរដ្ឋ​បាន​ឲ្យ​ដឹង​ថា កាល​ពី​ថៃ្ង​ទី​១៦ ខែ​ធ្នូ​កន្លង​ទៅ មន្រ្តី​ខណ្ឌ​ទួលគោក បាន​ប្រាប់​ថា អាជ្ញាធរ​និង​ផ្តល់​ដីធ្លី​ទំហំ​ទទឹង​៤,៨​ម៉ែត្រ និង​បណ្តោយ​១២​ម៉ែត្រ​នៅ​ក្នុង​ខណ្ឌ​ដង្កោ ជាយ​ទីក្រុង​ភ្នំពេញ និង​ប្រាក់​ចំនួន​១​លាន​ក្នុង​មួយ​គ្រួសារ ដើម្បី​ជា​ថ្នូរ​នឹង​ការ​ចាក​ចេញ​និង​រុះរើ​ដោយ​ស្ម័គ្រចិត្ត។

លោក ចាន់ សុវ៉េត ជា​មន្រ្តី​ស៊ើប​អង្កេត​ជាន់​ខ្ពស់​នៃ​អង្គការ​ការពារ​សិទ្ធិ​មនុស្ស​អាដហុក បាន​មាន​ប្រសាសន៍​ថា ៖ «មិន​មាន​ការ​ចរចា​គ្នា មិន​មាន​ការ​ដោះស្រាយ មិន​មាន​ការ​សង​សំណង​សមរម្យ​ត្រឹមត្រូវ​តាម​ផ្លូវ​ច្បាប់​ទេ ខ្ញុំ​គិត​ថា ឱសានវាទ​ហ្នឹង​មិន​មែន​ជា​ដំណោះស្រាយ​ទេ វា​ជា​ការ​បង្ខិត​បង្ខំ គំរាម​កំហែង​ស្មារតី​ប្រជាពលរដ្ឋ​ឲ្យ​ប្រជាពលរដ្ឋ​បាក់​ខ្លបខ្លាច​មិន​ហ៊ាន​តវ៉ា»

មាន​គ្រួសារ​មួយ​ចំនួន​បាន​ស្ម័គ្រ​ចិត្ត​ទទួល​យក​ថ្នូរ​ខាង​លើ​នេះ ប៉ុន្តែ​គ្រួសារ​ដែល​បាន​មក​រស់​នៅ​ជាង​២០​ឆ្នាំ​មក​ហើយ​នោះ​មិន​បាន​យល់​ព្រម​ទេ៕

ព័ត៌មាន (1)
Share

អ្នក​អាន​អនាមិក

For better city for better life they should agree with government's policy. Is there any city in USA allow people to live in street?
David

Jan 16, 2010 02:01 AM

អត្ថបទ​ដែល​ទាក់ទង

គេហទំព័រ​ទាំងមូល