ច្រក​ព្រំដែន​កម្ពុជា-​វៀតណាម​៣​គ្រោង​នឹង​បើក​នៅ​ដើម​ឆ្នាំ​២០១១

មន្ត្រី​ជាន់​ខ្ពស់​នៃ​ក្រសួង​សាធារណការ និង​ដឹក​ជញ្ជូន បាន​ថ្លែង​ឲ្យ​ដឹង​នៅ​ថ្ងៃ​ទី​២៩ ខែ​ធ្នូ​ថា កម្ពុជា​គ្រោង​នឹង​បើក​ច្រក​ព្រំដែន​កម្ពុជា-​វៀតណាម ចំនួន​បី​ទៀត ក្នុង​ចំណោម​ច្រក​ព្រំដែន​អន្តរជាតិ​ទាំង​៧ តាម​បណ្ដោយ​ព្រំដែន​កម្ពុជា-​វៀតណាម នៅ​ដើម​ឆ្នាំ​២០១១ ខាង​មុខ។
ដោយ ទីន ហ្សាការីយ៉ា
2010-12-30
អ៊ីម៉ែល
មតិ
Share
បោះពុម្ព

មន្ត្រី​ជាន់​ខ្ពស់​នៃ​ក្រសួង​សាធារណការ និង​ដឹក​ជញ្ជូន​កម្ពុជា សុំ​មិន​បញ្ចេញ​ឈ្មោះ​បាន​មាន​ប្រសាសន៍​ថា កន្លង​មក​កម្ពុជា បាន​បើក​ច្រក​ព្រំដែន​កម្ពុជា-​វៀតណាម បាន​ចំនួន ៤​រួច​ហើយ។

នៅ​ដើម​ឆ្នាំ​២០១១ ខាង​មុខ​នេះ ប្រទេស​ទាំង​ពីរ គឺ​វៀតណាម-​កម្ពុជា គ្រោង​នឹង​ប្រកាស​បើក​ច្រក​ជា​ផ្លូវការ​ចំនួន​បី​ទៀត គឺ​នៅ​ខែត្រ​រតនគិរី ច្រក​អូរយ៉ាដាវ ជាប់​នឹង​ខែត្រ​យ៉ាឡៃ ខែត្រ​មណ្ឌលគិរី ច្រក​អូររាំង ជាប់​នឹង​ខែត្រ​ដាក់នុង ខែត្រ​ក្រចេះ ច្រក​ត្រពាំង​ស្រែ​ជាប់​នឹង​ខែត្រ​បិញភឿក ប្រទេស​វៀតណាម។

មន្ត្រី​សុំ​មិន​បញ្ចេញ​ឈ្មោះ​បន្ថែម​ថា ៖ «ឆ្នាំ​ទៅ​យើង​កំណត់​គ្នា​ថា ឆ្នាំ​២០១០​ហ្នឹង យើង​នឹង​ប្រកាស​បើក​បញ្ចប់ តែ​យើង​ធ្វើ​អត់​ទាន់​បាន​ទេ ដោយសារ​តែ​ផ្លូវ​យើង​ធ្វើ​មិន​ទាន់​ហើយ តែ​ឥឡូវ​យើង​ធ្វើ​ចប់​អស់​ហើយ​នៅ​សល់​តែ​ផ្លូវ​ដាក់ដាំ​មួយ​ទេ»

ការ​គ្រោង​នឹង​បើក​ច្រក​ព្រំដែន​កម្ពុជា-​វៀតណាម បី​ទៀត​នេះ នៅ​ក្នុង​ឱកាស​មន្ត្រី​ក្រសួង​សាធារណការ​កម្ពុជា បាន​ដឹក​នាំ​គណៈ​ប្រតិភូ​ទៅ​ចូល​រួម​ប្រជុំ​ប្រចាំ​ឆ្នាំ​ជាមួយ​មន្ត្រី​ក្រសួង​សាធារណការ​ដឹក​ជញ្ជូន​វៀតណាម នៅ​ទីក្រុង​ព្រែកឫស្សី ប្រទេស​វៀតណាម កាល​ពី​ថ្ងៃ​ទី​២៧ ខែ​ធ្នូ ឆ្នាំ​២០១០។

ប្រភព​ពី​មន្រ្តី​ក្រសួង​សាធារណការ​ដដែល បាន​បញ្ជាក់​ថា រដ្ឋាភិបាល​នៃ​ប្រទេស​ទាំង​ពីរ​បាន​ចុះ​កិច្ច​ព្រមព្រៀង​ដឹក​ជញ្ជូន​ផ្លូវគោក​នៅ​តាម​ច្រក​ទាំង ៧​នេះ តាំង​ពី​ឆ្នាំ​១៩៩៨​មក ប៉ុន្តែ​គេ​ប្រកាស​បើក​ឲ្យ​ដំណើរការ​ច្រក​ព្រំដែន​ប្រទេស​ទាំង​ពីរ​តែ​ចំនួន ៤​ទេ គឺ​មាន​ដូច​ជា​ច្រក​ត្រពាំងថ្លុង ខែត្រ​កំពង់ចាម ជាប់​នឹង​ខែត្រ​តៃនិញ ច្រក​ព្រែកចាក ខែត្រ​កំពត ជាប់​នឹង​ខែត្រ​កៀងយ៉ាង ច្រក​ភ្នំឌិន ខែត្រ​តាកែវ ជាប់​នឹង​ខែត្រ​អាងយ៉ាង ច្រក​បាវិត ខែត្រ​ស្វាយរៀង ជាប់​នឹង​ខែត្រ​តៃនិញ ប្រទេស​វៀតណាម។

មន្រ្តី​នាំ​ពាក្យ​ក្រសួង​ការបរទេស​កម្ពុជា លោក កុយ គួង បាន​លើក​ឡើង​ថា ការ​បើក​ច្រក​ព្រំដែន​រវាង​ប្រទេស​កម្ពុជា-​វៀតណាម​នេះ គឺ​ជា​ច្រក​សេដ្ឋកិច្ច​ដ៏​សំខាន់​មួយ​សម្រាប់​ប្រទេស​ទាំង​ពីរ ក្នុង​ការ​ដឹក​ជញ្ជូន​ទំនិញ​ទៅ​មក ៖ «ទំនាក់ទំនង​ប្រទេស​ទាំង​ពីរ​កាន់​តែ​ប្រសើរ​ទៅ​មុខ​ពី​១​ឆ្នាំ​ទៅ​១​ឆ្នាំ ជញ្ជីង​ពាណិជ្ជកម្ម តុល្យការ​ហ្នឹង ឲ្យ​កាន់​តែ​មាន​លក្ខណៈ​កើន​ឡើង​រហូត ដូច្នេះ​ហើយ​ប្រទេស​ទាំង​ពីរ​ហ្នឹង​កាន់​តែ​បើក​ច្រក​កាន់​តែ​ទូលំទូលាយ​ថែម​ទៀត»

មន្ត្រី​នាំ​ពាក្យ​គណបក្ស​ប្រឆាំង លោក យឹម សុវណ្ណ ក៏​បាន​សាទរ​ចំពោះ​ការ​គ្រោង​បើក​ច្រក​ព្រំដែន​នេះ​ដែរ ដោយ​លោក​បញ្ជាក់​ថា វា​ជា​ច្រក​ធ្វើ​ដំណើរការ​សេដ្ឋកិច្ច​សម្រាប់​ប្រទេស​ទាំង​ពីរ។ ប៉ុន្តែ​លោក យឹម សុវណ្ណ បាន​សម្ដែង​ការ​ព្រួយ​បារម្ភ​ថា ការ​បើក​ច្រក​ទាំង​នេះ​វា​នឹង​មាន​លំហូរ​ជន​ជាតិ​វៀតណាម អន្តោប្រវេសន៍​មក​កម្ពុជា កាន់​តែ​ច្រើន​ថែម​ទៀត នៅ​ខណៈ​ដែល​ប្រទេស​កម្ពុជា បាន​អនុវត្ត​ច្បាប់​អន្តោប្រវេសន៍​ធូរ​រលុង​នោះ។

លោក យឹម សុវណ្ណ បន្ត​ថា ៖ «ហើយ​ត្រូវ​ទប់​ស្កាត់​អំពើ​ពុករលួយ​ឲ្យ​បាន​ខ្លាំង​មែន​ទែន បើ​មិន​អ៊ីចឹង​ទេ វា​នឹង​ក្លាយ​ជា​ច្រក​ចូល​ជនអន្តោប្រវេសន៍​មក​កម្ពុជា កាន់​តែ​ច្រើន​ទៀត ដែល​ជា​បញ្ហា​មួយ​ដ៏​ធ្ងន់ធ្ងរ ដែល​កម្ពុជា​កំពុង​តែ​ជួប​បញ្ហា​ហ្នឹង​ស្រាប់ ចំណែក​តែ​គេ គេ​អនុវត្ត​ច្បាប់​បាន​គេ​មិន​ខ្វល់​ទេ ខ្មែរ​សូម្បី​ទៅ​សុំ​ទាន​នៅ​ប្រទេស​គេ (វៀតណាម) ទីក្រុង​ហូជីមិញ​ហ្នឹង ក៏​គេ​ចាប់​បញ្ជួន​មក​វិញ​ដែរ»

លោក យឹម សុវណ្ណ បាន​អះអាង​ទៀត​ថា វៀតណាម​មាន​ឥទ្ធិពល​សេដ្ឋកិច្ច​ជាង​កម្ពុជា ពី​ព្រោះ​ប្រទេស​កម្ពុជា ជា​ទីផ្សារ​របស់​វៀតណាម ដែល​វៀតណាម​ទទួល​បាន​ប្រាក់​ចំណេញ​ពី​កម្ពុជា ប្រមាណ​ជាង ២​ពាន់​លាន​ដុល្លារ​ក្នុង​មួយ​ឆ្នាំៗ ចំពោះ​កម្ពុជា ទទួល​បាន​ប្រាក់​ចំណេញ​ពី​វៀតណាម​វិញ តែ​ជាង ៦០​លាន​ទេ​ក្នុង​មួយ​ឆ្នាំ៕

ព័ត៌មាន (0)
Share
គេហទំព័រ​ទាំងមូល