លោក សុក គង់ ប្រធានការិយាល័យរដ្ឋបាលរបស់គណៈកម្មាធិការរៀបចំបុណ្យជាតិនិងអន្តរជាតិ បានមានប្រសាសន៍ឲ្យដឹងថា គិតមកទល់ថ្ងៃទី២៨ តុលានេះ មានទូកចំនួន ៤២១ មកពី ១៩ខែត្រក្រុងបានមកចុះឈ្មោះហើយ ហើយការឈប់ទទួលពាក្យសុំចូលរួមប្រកួតនឹងបញ្ចប់នៅថ្ងៃទី៣០ តុលា ខាងមុខនេះ។
តាមលោក សុក គង់ បានមានប្រសាសន៍ឲ្យដឹងថា ក្នុងចំណោមទូកដែលចុះឈ្មោះប្រកួតទាំង៤២១នោះ មានចែកជាទូកអុំ ទូកចែវ និងមានទូកបុរសផ្សេង នារីផ្សេង ៖ «មកដល់ហ្នឹង យើងមិនអាចកំណត់ថា ត្រឹមត្រូវទេ នៅមិនទាន់គ្រប់ទេ។ ឥឡូវមាន ៤២១ ទូកអុំបុរស ៣៦៨ ទូកអុំនារី ៣ ចែវបុរស ៤៨ ចែវនារី ២ ទូកខ្លី ដែលគេហៅថាខ្នាតអន្តរជាតិ បុរស ៩៦ នារី៤ ទាំងអស់ ៤២១»។
ចំពោះចំនួនប្រទីបវិញ តាមលោក សុក គង់ បានឲ្យដឹងថា មកទល់ពេលនេះ តាមលោកដឹង មានប្រទីបចំនួន ២៣ ដែលកំពុងរៀបចំ គឺកើនជាងឆ្នាំមុនដែលមានមិនដល់១០ប្រទីបផងទេ។
លោក មិល កាដូ អគ្គនាយករងនៃអគ្គនាយកដ្ឋានយុវជន និងកីឡា នៃក្រសួងអប់រំ ដែលជាសមាជិកគណៈកម្មាធិការបច្ចេកទេសក្នុងការប្រណាំងទូក បានមានប្រសាសន៍ឲ្យដឹងថា ការរៀបចំប្រណាំងទូកនៅប្រទេសកម្ពុជាមានលក្ខណៈជាបុណ្យទាននិងមានលក្ខណៈជាប្រពៃណី មិនដូចការប្រកួតយកឈ្នះចាញ់ដូចការប្រកួតបាល់ទាត់នោះទេ តែក៏មានចំណាត់ថ្នាក់ផងដែរ។
លោក មិល កាដូ មានប្រសាសន៍ថា ៖ «ប៉ុន្តែមិនអាចរកឃើញតែមួយ លេខមួយសុទ្ធ ដូចយើងបាល់ទាត់ពិភពលោក ចេញទៅលេខ១ សុទ្ធអ៊ីចឹងកើតទេ ព្រោះទី១ ពាក់ព័ន្ធនឹងពេលវេលា ទី២ សង្កត់ធ្ងន់ គឺយើងជាប្រពៃណី ហើយដូច្នេះ យើងមិនបានចែកជាប្រភេទទេ តែយើងបានចងក្រងជាផែន។ នៅក្នុងការប្រកាសជាលទ្ធផល ផែនលេខ១ ផែនលេខ២ ផែនលេខ៣ ផែនលេខ៤ ហើយថា អ្នកឈ្នះ ៣ថ្ងៃជាប់គ្នា នឹងក្លាយទៅជាផែនលេខ១ ឈ្នះ ២ថ្ងៃ ចាញ់មួយថ្ងៃ ហ្នឹង នៅក្នុងផែនលេខ២ ឈ្នះមួយចាញ់ពីរ នៅក្នុងផែនលេខ៣ ចាញ់សុទ្ធ គឺនៅក្នុងផែនលេខ៤»។
បុណ្យអុំទូកជាពិធីបុណ្យមួយដែលមានមនុស្សមកពីជនបទមកលេងទីក្រុងនិងទស្សនាការប្រណាំងទូកយ៉ាងច្រើនកុះករ ដែលចំនួនមនុស្សអាចកើនដល់ជាង ១លាននាក់។
សូមរំឭកជូនថា កាលពីឆ្នាំ២០០៧ កន្លងទៅ នៅក្នុងឱកាសពិធីបុណ្យអុំទូកនោះ មានគ្រោះថ្នាក់មួយបានកើតឡើង ដែលបណ្តាលឲ្យកីឡាករអុំទូកមកពីប្រទេសសិង្ហបុរីចំនួន៥នាក់បានបាត់បង់ជីវិតដោយសារការលិចទូកដែលមានចំណុះ ២២នាក់ នៅក្បែរស្ពានមិត្តភាពកម្ពុជា-ជប៉ុន៕