បុរសដែលជាអ្នកភូមិបឹងកក់ ឈ្មោះ ថន បានប្រាប់វិទ្យុអាស៊ីសេរីថា លោកក៏ដូចជាពលរដ្ឋផ្សេងទៀតដែរមិនយល់ព្រមទទួលលុយពីសាលាក្រុងភ្នំពេញ ៨៥០០ដុល្លារ ជាថ្នូរនឹងការចាកចេញពីផ្ទះដែលបានរស់នៅជាង១០ឆ្នាំមកហើយនោះទេ។ លោកបន្តថាសូមឲ្យក្រុមហ៊ុនឬសាលាក្រុងមកដោះស្រាយជាមុនសិន មុននឹងបូមខ្សាច់ដាក់បឹងនេះ។
លោក ថន បានឲ្យដឹងថា ៖ «ថាម៉ោង៧ព្រឹកជួបជុំគ្នា ធ្វើដំណើរទៅសាលាក្រុង ឲ្យមានការផ្អាកបូមខ្សាច់ជាបណ្ដោះអាសន្នសិន។ សុំឲ្យក្រុមហ៊ុនមកដោះស្រាយផ្ទះប្រជាជន ជាពិសេសទិញដូរអីតាមតម្លៃទីផ្សារហ្នឹង ឲ្យដល់ដៃប្រជាជនតែម្ដង»។
ប្រជាពលរដ្ឋជាច្រើននាក់ទៀតបានអះអាងប្រហាក់ប្រហែលគ្នាថា ៖ «សុំឲ្យផ្អាកសិន កុំអាលបូម ឲ្យក្រុមហ៊ុនដោះស្រាយ ដូចថាទិញដូរអី ឲ្យដោះស្រាយជាមួយប្រជាជនឲ្យហើយសិនទៅ។ ខ្ញុំត្រូវតែតស៊ូមតិហ្នឹងដល់ទីបញ្ចប់។ ឥឡូវប្រជាជនទាំងអស់ហ្នឹងចង់ទៅសាលាក្រុង ដើម្បីឲ្យសាលាក្រុងប្រាប់ក្រុមហ៊ុនឲ្យដោះស្រាយថា មុនដំបូងយើងត្រូវដោះស្រាយជាមួយប្រជាពលរដ្ឋសិន។ ៨ពាន់ដុល្លារទៅធ្វើអីចេញ ធ្វើផ្ទះឲ្យឆ្ងាយពេក ហើយសំណង់ហ្នឹងវាអត់សូវមាំ»។
ពាក់ពន្ធ័នឹងការទាមទាររបស់ប្រជាពលរដ្ឋខាងលើ នៅថ្ងៃអាទិត្យនេះវិទ្យុអាស៊ីសេរីបានព្យាយាមទូរស័ព្ទសុំការបំភ្លឺពីអភិបាលក្រុងភ្នំពេញ លោក កែប ជុតិមា តែទូរស័ព្ទមិនមានអ្នកទទួល។
ចំណែកឯអភិបាលរងក្រុងភ្នំពេញ លោក ម៉ាន់ ឈឿន បានឲ្យសួរទៅលោក សួន រិនឌី ជានាយរងខុទ្ទកាល័យទទួលបន្ទុកកិច្ចការនៅបឹងកក់នេះ ប៉ុន្តែទូរស័ព្ទរបស់លោក សួន រិនឌី បានឆ្លើយថាទូរស័ព្ទនោះបានបិទហើយ។
ចំណែកឯតំណាងរាស្រ្តមណ្ឌលភ្នំពេញ លោក សុន ឆ័យ មានប្រសាសន៍ថាលោកគាំទ្រការតវ៉ារបស់ប្រជាពលរដ្ឋក្នុងការបញ្ឈប់ការបូមខ្សាច់បញ្ចូលក្នុងបឹងកក់នេះ ហើយលោកនឹងទៅជួបមន្ត្រីបរិស្ថាននៅថ្ងៃច័ន្ទនេះដែរ ដើម្បីឲ្យមន្ត្រីនោះបញ្ជាក់ថាតើមានលិខិតបញ្ជាក់ពីផលប៉ះពាល់បរិស្ថានដែរឬទេក្នុងការបូមខ្សាច់បញ្ចូលបឹងនោះ។
នៅថ្ងៃនេះដែរផ្ទះប្រជាពលរដ្ឋមួយចំនួនដែលនៅចំមុខទុយោបូមខ្សាច់បញ្ចូលក្នុងបឹងកក់នោះត្រូវបានបង្ខំឲ្យរុះរើ ៖ «បើយើងថាដាច់ខាតយើងមិនចេញ គេនឹងបូមពន្លិចយើងហើយ ម៉ោងប្រហែល១ គេឲ្យកងកម្លាំងគេមក ៣-៤នាក់»។
សូមជម្រាបដែរថាទំនាស់ដីនៅក្នុងបឹងកក់ សង្កាត់ស្រះចក ខណ្ឌដូនពេញ រាជធានីភ្នំពេញ កើតឡើងតាំងពីឆ្នាំ២០០៥មកម្ល៉េះ ហើយសាលាក្រុងភ្នំពេញបានជួលបឹងនេះទៅឲ្យក្រុមហ៊ុនឯកជនមួយរយៈ៩៩ឆ្នាំ មានទំហំជាង១០០ហិកតារ ដែលមានប្រជាពលរដ្ឋរស់នៅជុំវិញបឹងនេះប្រមាណ៤ពាន់គ្រួសារដែលត្រូវរងផលប៉ះពាល់៕