ប្រធានគណបក្សហ៊្វុនស៊ិនប៉ិចប្រចាំឃុំខ្ចាស់ អ្នកស្រី អ៊ុំ ស៊ីណា បានមានប្រសាសន៍កាលពីព្រឹកថ្ងៃច័ន្ទ ទី៣០ ខែមិថុនា ថាប្រធានគណៈកម្មការរៀបចំការបោះឆ្នោតឃុំ ឈ្មោះ គឹម ប៊ុនរិទ្ធ បានរារាំងសកម្មជនគណបក្សហ៊្វុនស៊ិនប៉ិចចំនួន៧នាក់ កាលពីថ្ងៃទី២៩ មិនឲ្យចូលទៅបិទខិត្តប័ណ្ណឃោសនាគណបក្សជាង១០០សន្លឹក និងព្រះឆាយាល័ក្ខណ៍បេក្ខភាពនាយករដ្ឋមន្ត្រី នៅក្នុងភូមិចំនួន៣ ដោយសារតែ CEC អះអាងថាគណបក្សហ៊្វុនស៊ិនប៉ិចឃុំនោះមិនទាន់មានការសុំអនុញ្ញាតច្បាប់នៅឡើយ ។
អ្នកស្រី អ៊ុំ ស៊ីណា បានឲ្យដឹងថា ៖ «ខ្ញុំសុំតែបិទខិត្តប័ណ្ណនិងលើកបដា... មេ CEC ឈ្មោះ រិទ្ធិ គេថាអត់បាន គេថាខ្លាចប៉ះគណបក្ស» ។
ប៉ុន្តែប្រធានគណៈកម្មការរៀបចំការបោះឆ្នោតខេត្តសៀមរាប លោក នឹម វ៉ាន់សំ បានបដិសេធការចោទប្រកាន់របស់គណបក្សមកលើប្រធាន CEC នោះ គឺជាការមិនពិតទេ ។ លោក នឹម វ៉ាន់សំ បានមានប្រសាសន៍ថាតាមពិតគឺសកម្មជនគណបក្សហ៊្វុនស៊ិនប៉ិចទាំងនោះសុទ្ធតែជាស្រីៗ ហើយមានការភ័យខ្លាចខ្លួនឯងនៅពេលដែលដើរជួបក្រុមគណបក្សផ្សេងដើរធ្វើសកម្មភាពឃោសនាដែរនោះ រហូតដល់អ្នកខ្លះដោះអាវគណបក្សចេញពីខ្លួនទៀតផង ។
លោក នឹម វ៉ាន់សំ បានមានប្រសាសន៍ថា ៖ «ភ្លាមហ្នឹងក៏បានជួបជុំគ្នាដោះស្រាយ ខាងគណបក្សហ៊្វុនស៊ិនប៉ិចប្រធានហ្នឹងគាត់មកដែរ» ។
ទោះយ៉ាងណាប្រធានគណៈកម្មការរៀបចំការបោះឆ្នោតឃុំខ្ចាស់ លោក គឹម ប៊ុនរិទ្ធ បានទទួលស្គាល់ថាលោកពិតជាបានហាមឃាត់សកម្មជនគណបក្សហ៊្វុនស៊ិនប៉ិចទាំងនោះមិនឲ្យទៅបិទខិត្តប័ណ្ណឃោសនានៅក្នុងភូមិក្បូន និងភូមិគោកសង្កែមែន ដោយសារតែលោកមិនយល់អំពីច្បាប់ស្តីពីការឃោសនាឲ្យបានច្បាស់លាស់ថា ការដើរបិទខិត្តប័ណ្ណនោះលុះណាតែត្រូវសុំច្បាប់ជាមុន ។
លោក គឹម ប៊ុនរិទ្ធ បានឲ្យដឹងថា ៖ «ជារឿងភ័ន្តច្រឡំទេ ការរៀនសូត្ររបស់ខ្ញុំថាវាកម្រិតទាបចុះ យល់មិនដល់» ។
អនុប្រធានប្រតិបត្តិគណបក្សហ៊្វុនស៊ិនប៉ិចខេត្តសៀមរាប លោក គឹម ឆៃហៀង នៅតែអល់ឯកក្នុងការទទួលស្គាល់កំហុសរបស់មន្ត្រីគណៈកម្មការរៀបចំការបោះឆ្នោតឃុំនោះ ដោយលោកមានប្រសាសន៍ថា លោកពុំជឿថាមន្ត្រី CEC ពុំមានយល់អំពីច្បាប់នោះទេ ប៉ុន្តែគឺជាចេតនាដើម្បីរារាំងការឃោសនាគណបក្សរបស់លោកតែប៉ុណ្ណោះ ។
អ្នកស៊ើបអង្កេតរបស់អង្គការសិទ្ធិមនុស្ស លីកាដូ លោក សរ វណ្ណារ៉ា ដែលបានចុះស្រាវជ្រាវរឿងនោះបានមានប្រសាសន៍ថា ប្រធានគណៈកម្មការរៀបចំការបោះឆ្នោតឃុំខ្ចាស់ បានទទួលស្គាល់ថាជាកំហុសរបស់គាត់ដោយមានការយល់មិនដល់ទៅនឹងជម្រៅច្បាប់ ក៏ប៉ុន្តែទោះយ៉ាងណាបញ្ហានោះគឺជាការរំលោភទៅលើគណបក្សនយោបាយ ។
លោក សរ វណ្ណារ៉ា បានមានប្រសាសន៍ថា ៖ «គាត់ក៏បានសារភាពថាមិនបានយល់ស៊ីជម្រៅទាក់ទងនឹងច្បាប់ហ្នឹងជាការចន្លោះប្រហោងរបស់គាត់» ។
សូមរំឭកថាចាប់តាំងពីការចាប់ផ្តើមយុទ្ធនាការឃោសនាបោះឆ្នោតពីថ្ងៃទី២៦ ខែមិថុនាមក ក្រៅពីមានការចោទប្រកាន់ថាមន្ត្រីគណៈកម្មការរៀបចំការបោះឆ្នោតឃុំធ្វើការរារាំងការដើរបិទខិត្តប័ណ្ណគណបក្សហ៊្វុនស៊ិនប៉ិចនៅឃុំខ្ចាស់ ស្រុកសូទ្រនិគម ខេត្តសៀមរាប នៅឯឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ ស្លាកគណបក្សសមរង្ស៊ីចំនួន២ផ្ទាំងត្រូវបានគេលួចទម្លាក់កាលពីយប់ថ្ងៃទី២៧ និងថ្ងៃទី២៩ ខែមិថុនាកន្លងមក ៕