ការឡើងសម្ពាធឈាមនេះ គឺបណ្តាលមកពីសំណួរមួយចំនួននៅក្នុងសវនាការសម្ងាត់ និងភាពក្រៀវក្រោធរបស់លោកស្រី អៀង ធីរឹទ្ធ ៖ «ដោយឈាមខ្ញុំឡើងខ្ពស់ពេក ខ្ញុំទ្រាំអត់បាន ខ្ញុំមានជំងឺឡើងឈាម មិញខ្ញុំខឹងទៅ វាឡើងឈាមតែម្ដង ។ ដូច្នេះខ្ញុំសូមឲ្យអស់លោក លោកស្រី បន្តមិនបាច់មានខ្ញុំទេ មានមេធាវីខ្ញុំទាំងពីរនៅនេះហើយ ហើយសូមផ្ដល់យុត្តិធម៌ឲ្យខ្ញុំផង ។ ព្រោះការដែលរៀបចំបណ្ដាក់គ្នា ចម្លើយមិញវាខុសស្រឡះតែម្ដង មិនដឹងអ្នកណាគេរៀបចំ ខ្ញុំអត់ដឹងទេ ខ្ញុំអត់មានប៉ះពាល់អីដូចគេថាទេ» ។
បន្ទាប់មកលោកស្រីត្រូវបានអនុញ្ញាតឲ្យនាំទៅកាន់បន្ទប់សម្រាក ដោយទុកតួនាទីដល់សហមេធាវីទាំងពីរបន្តការតវ៉ារហូតដល់ចប់អង្គសវនាការ ។
លោកស្រី អៀង ធីរឹទ្ធ បានជាប់ឃុំជាមួយប្តីរបស់លោកស្រីគឺលោក អៀង សារី អតីតរដ្ឋមន្ត្រីក្រសួងការបរទេសនៃរបបខ្មែរក្រហម ចាប់តាំងពីថ្ងៃទី១៤ ខែវិច្ឆិកា ឆ្នាំ២០០៧ មក ដោយសារលោកស្រីរងការចោទពីបទឧក្រិដ្ឋកម្មប្រឆាំងនឹងមនុស្សជាតិ ហើយការប្តឹងឧទ្ធរណ៍សុំនៅក្រៅឃុំនៅពេលនេះគឺត្រូវសហមេធាវីសំអាងថា លោកស្រី អៀង ធីរឹទ្ធ មានជំងឺផ្នែកផ្លូវចិត្ត ។
នៅក្នុងការចាប់ផ្តើមនៃអង្គសវនាការ លោកស្រី អៀង ធីរឹទ្ធ បានឆ្លើយតបនូវសំណួររបស់លោកចៅក្រម ប្រាក់ គឹមសាន្ត យ៉ាងដូច្នេះថា ៖
អៀង ធីរឹទ្ធ ៖ ឈ្មោះដើម ខៀវ ធីរឹទ្ធ តែដល់រៀបការទៅ យកតាមឈ្មោះប្ដី ទៅជា អៀង ធីរឹទ្ធ ។ ប្រាក់ គឹមសាន្ត ៖ លោកស្រីមានឈ្មោះហៅក្រៅទេ ? អៀង ធីរឹទ្ធ ៖ មាន ឈ្មោះ ភា ។ ប្រាក់ គឹមសាន្ត ៖ លោកស្រីអាយុប៉ុន្មាន ? អៀង ធីរឹទ្ធ ៖ ៧៦ឆ្នាំ... សញ្ជាតិខ្មែរ ។ ប្រាក់ គឹមសាន្ត ៖ មានមុខរបរជាអ្វី ? អៀង ធីរឹទ្ធ ៖ សាស្រ្តាចារ្យភាសាអង់គ្លេស ។
ប្រាក់ គឹមសាន្ត ៖ ទីលំនៅមុនពេលចាប់ខ្លួន ? អៀង ធីរឹទ្ធ ៖ មុនពេលចាប់ខ្លួន នៅផ្លូវលេខ ២១ ផ្លូវ ៤៧B សង្កាត់ទន្លេបាសាក់ ក្រុងភ្នំពេញ ។ ប្រាក់ គឹមសាន្ត ៖ ប្ដីអ្នកស្រីឈ្មោះអ្វី ? អៀង ធីរឹទ្ធ ៖ ឈ្មោះ អៀង សារី ។ ប្រាក់ គឹមសាន្ត ៖ មានកូនប៉ុន្មាននាក់ ? អៀង ធីរឹទ្ធ ៖ ៤ ឫក៏ ៣ ទេ ? ប្រាក់ គឹមសាន្ត ៖ មានកូនប៉ុន្មាននាក់ ? អៀង ធីរឹទ្ធ ៖ ៤នាក់យ៉ាងតិច ។ ប្រាក់ គឹមសាន្ត ៖ តើលោកស្រីមានពឹងអ្នកការពារ ឬមេធាវីទេ ? អៀង ធីរឹទ្ធ ៖ មានមេធាវីហើយ ។
ទោះបីជាយ៉ាងណាក៏ដោយលោកចៅក្រម ហ៊ួត វុទ្ធី តំណាងឲ្យចៅក្រមជាតិនិងចៅក្រមអន្តរជាតិ នៃអង្គបុរេជំនុំជម្រះបានថ្លែងថា ជនជាប់ចោទ អៀង ធីរឹទ្ធ ក្នុងឋានៈជារដ្ឋមន្ត្រីក្រសួងសង្គមកិច្ច គឺបានរួមចំណែកដឹកនាំ អនុវត្តគោលនយោបាយខ្មែរក្រហម ដែលក្នុងនោះរួមមាន ការជម្លៀសប្រជាជន ការដាក់ឃុំឃាំង និងការសម្លាប់បំផុតពូជជាដើម ។ លោកចៅក្រមថ្លែងបន្តថា អៀង ធីរឹទ្ធ អាចប្រឈមការជាប់គុកអស់មួយជីវិត ។
ចំណែកឯតំណាងសហព្រះរាជអាជ្ញា និងមេធាវីតំណាងដើមបណ្តឹងរដ្ឋប្បវេណីទាមទារឲ្យសាលាក្តីវិសាមញ្ញបន្តឃុំខ្លួន អៀង ធីរឹទ្ធ តទៅទៀត ដើម្បីធានាដល់នីតិវិធីនៃការស៊ើបអង្កេត ចៀសវាងការរត់គេចរបស់ជនជាប់ចោទ ការពារសណ្តាប់ធ្នាប់សាធារណៈ និងការពារសន្តិសុខសាក្សី ។
ក៏ប៉ុន្តែលោក ផាត់ ពៅស៊ាង ដែលជាមេធាវីរបស់ អៀង ធីរឹទ្ធ បានជំទាស់ទៅនឹងការលើកឡើងខាងលើនេះ ហើយអះអាងថាកូនក្តីរបស់លោក នឹងមិនរត់គេចឬបង្កការគំរាមកំហែងដល់សាក្សីណាម្នាក់នោះទេ ។
នាល្ងាចថ្ងៃដដែលនោះ លោកចៅក្រម ប្រាក់ គឹមសាន្ត បានប្រកាសបញ្ចប់សវនាការ ក៏ប៉ុន្តែលទ្ធផលដែលសម្រេចថានឹងត្រូវដោះលែង ឬបន្តឃុំខ្លួន អៀង ធីរឹទ្ធ តទៅទៀតនោះ នឹងត្រូវប្រកាសនៅពេលក្រោយ ៕