ប្រជាពលរដ្ឋដែលធ្វើដំណើរតាមដងផ្លូវក្នុងខេត្តស្ទឹងត្រែង បានសង្កេតឃើញថា សមត្ថកិច្ចមកពីស្ថាប័នផ្សេងៗ គ្នា បានបង្កើតឡើងនូវកន្លែងត្រួតពិនិត្យនៅលើកំណាត់ជាផ្លូវជាតិពីទីរួមខេត្ត ទៅទីរួមស្រុក សៀមប៉ាង មានជាង ១០កន្លែងក្នុងចម្ងាយផ្លូវប្រមាណ ១០០គីឡូម៉ែត្រ។ ការបង្កើតប៉ុស្តិ៍ត្រួតពិនិត្យបែបអនាធិបតេយ្យនេះ គឺដើម្បីស្ទាក់ឃាត់រថយន្ត ឬការធ្វើដំណើរតាមមធ្យោបាយគ្រប់ប្រភេទ ដើម្បីស្វែងរកវត្ថុល្មើសហើយតម្រូវឲ្យបង់ប្រាក់ជាថ្នូរនឹងការមិនចាប់ខ្លួនជនល្មើស និងរិបអូសយកវត្ថុតាងទាំងនោះ។
ការបង្កើតឡើងនូវប៉ុស្តិ៍ត្រួតពិនិត្យតាមដងផ្លូវនេះ កើតមានច្រើនឆ្នាំមកហើយ ដោយទីតាំងខ្លះមានក្រុមសមត្ថកិច្ចនគរបាល ខ្លះមានកងរាជអាវុធហត្ថ ស្ថាប័នព្រៃឈើ ហើយប៉ុស្តិ៍ត្រួតពិនិត្យខ្លះទៀតមានក្រុមសមត្ថកិច្ចចម្រុះនៅប្រចាំការធ្វើការត្រួតពិនិត្យការធ្វើដំណើរឆ្លងកាត់ទីនោះ។ ហើយរហូតមកទល់និងបច្ចុប្បន្ននេះប្រជាពលរដ្ឋ និងមន្ត្រីរាជការខ្លះឲ្យដឹងថា ទីតាំងត្រួតពិនិត្យនេះកើនឡើងកាន់តែច្រើន។ បើគេធ្វើដំណើរតាមកំណាត់ផ្លូវខាងលើនេះ ពីទីរួមខេត្តស្ទឹងត្រែង រហូតមក គេឃើញមានកន្លែងត្រួតពិនិត្យនៅគល់ស្ពានសេកុង ផ្លូវបំបែកកន្ទុយគោ កន្លែងវាយថ្មចិន នៅចំណុចមុខវត្តគីឡូលេខ៨ ផ្លូវបំបែកភូមិស្តៅ វាលព្រីង ផ្លូវបំបែកអូរស្វាយ មុខផ្ទះពេទ្យរ៉ា ចំណុចវាលប៉ារ៉ា ណាអូង សំរោង កាចាញទឹក និងទីរួមស្រុកសៀមប៉ាង។
ប្រជាពលរដ្ឋរស់នៅស្រុកសៀមប៉ាងសុំមិនបញ្ចេញឈ្មោះឲ្យដឹងថា ប្រជាពលរដ្ឋមិនដឹងថាតើការបង្កើតកន្លែងឆែកឆេរទាំងនោះមានការអនុញ្ញាតពីស្ថាប័នថ្នាក់ណាខ្លះទេ ក៏ប៉ុន្តែគេសង្កេតឃើញក្រុមសមត្ថកិច្ចកន្លែងខ្លះមកធ្វើការដាក់ប៉ុស្តិ៍ស្ទាក់ឃាត់រថយន្តតែវេលាយប់ រហូតភ្លឺពួកគេបានដកចេញវិញ ហើយទីតាំងខ្លះដាក់របាំងតាមដងផ្លូវទាំងយប់ទាំងថ្ងៃ ដើម្បីឲ្យរថយន្ត ឬអ្នកមានមធ្យោបាយធ្វើដំណើរតាមដងផ្លូវឈប់ដើម្បីក្រុមសមត្ថកិច្ចទាំងនោះធ្វើការត្រួតពិនិត្យ ៖ "ឡានគេមកឈប់អ៊ីចឹងទៅមានប៉ូលិសសេដ្ឋកិច្ច ប៉ូលិសអីមកឈប់នៅមុខថ្នល់ទៅ មកឈប់តែពេលយប់ទេ ដល់ថ្ងៃឡើងព្រឹកឡើងទៅវិញអស់"។
ប្រជាពលរដ្ឋម្នាក់ទៀតដែលមានទីលំនៅនៅជិតទីតាំងត្រួតពិនិត្យមួយនៅតំបន់វាលប៉ារ៉ា សុំមិនបញ្ចេញឈ្មោះឲ្យដឹងដែរថា ដោយសារតែកំណាត់ផ្លូវនោះជាតំបន់លួចធ្វើការដឹកជញ្ជូនឈើប្រណិតខុសច្បាប់ពីតំបន់ព្រំដែនជាប់ប្រទេសលាវ ចូលមកកាន់ខេត្តស្ទឹងត្រែង ហេតុនេះហើយ បានជាក្រុមសមត្ថកិច្ចទាំងនោះដាក់ទីតាំងត្រួតពិនិត្យដើម្បីទារប្រាក់ពីរថយន្ត ឬមធ្យោបាយដឹកជញ្ជូនឈើប្រណិតខុសច្បាប់ ដែលឆ្លងកាត់ស្ទើររៀងរាល់យប់តាមដងផ្លូវនោះ ៖ "បងអើយ បងម៉ាយប់ៗ ចង់បាក់ហើយដី ម៉ាយប់ចង់ ១០ឡាន ប្រាំដណ្ដប់ឡានទើបយប់មិញហ្នឹងអន់។ ឡានដឹកគ្រញូងនៅមុខផ្ទះខ្ញុំហ្នឹង ប៉ូលិសឈរយកលុយនៅនោះ ហើយខាងណោះផ្ទះខ្ញុំក៏មានប៉ុស្តិ៍គេមួយដែរ ប៉ុស្តិ៍គេមានសងខាងហ្មង ថ្ងៃគេអត់ដាក់ទេ ដល់យប់ម៉ង បងឯងចង់ដឹង យប់ឡើងបងឯងបើកឡានតាមហ្នឹងឃើញហើយ យប់ចាំចូលមកដឹងហ្មង ពុករលួយជាទីបំផុត។ប្រជាពលរដ្ឋអារសសរ ៤ដើមធ្វើផ្ទះ ដីក្រុមហ៊ុនសុំគេបានប៉ូលិសទារគ្នាម៉ារយ ហាសិបរៀល ថ្ងៃមុនអាភ័ស្រ្តយុំទឹកភ្នែកទឹកសំបោរ ២៥ម៉ឺន"។
ប្រភពប្រជាពលរដ្ឋដដែលបានឲ្យដឹងថា ក្នុងរថយន្តដឹកឈើប្រណិតខុសច្បាប់មួយគ្រឿង ត្រូវបង់ប្រាក់ឲ្យក្រុមអ្នកបង្កើតប៉ុស្តិ៍ត្រួតពិនិត្យពី ៥០ដុល្លារឡើងដល់រាប់រយដុល្លារ ហើយសូម្បីម៉ូតូប្រជាពលរដ្ឋដឹកជញ្ជូនឈើប្រណិតខុសច្បាប់មួយគ្រឿងក៏ត្រូវបង់ប្រាក់ពី ១០០០០ទៅ២០០០០០រៀល ឲ្យក្រុមត្រួតពិនិត្យដែរ ទើបអាចឆ្លងកាត់ទីនោះបាន។
សមាជិកក្រុមប្រឹក្សាស្រុកសៀមប៉ាង លោក ជីនភីន មានប្រសាសន៍បញ្ជាក់ដែរថា ករណីប៉ុស្តិ៍ត្រួតពិនិត្យនៅស្រុកសៀមប៉ាងនេះ គឺជាការបង្កើតបែបអានាធិបតេយ្យ ដែលមិនមានការអនុញ្ញាត។ លោកបន្តថា វាជាការទទួលខុសត្រូវរបស់អាជ្ញាធរមូលដ្ឋានដែលកើតមានបញ្ហានេះ។
សេចក្ដីរាយការណ៍របស់សមាគមអាដហុកខេត្តស្ទឹងត្រែង ឲ្យដឹងថា រហូតមកទល់នឹងពេលនេះ ភាពអានាធិបតេយ្យនៃការដឹកជញ្ជូនឈើប្រណិតនៅខេត្តស្ទឹងត្រែង នៅតែមានសកម្មភាពដឹកជញ្ជូនឈើពីតំបន់ព្រៃមកលក់ចែកចាយតាមទីតាំងសិប្បកម្មជាច្រើនទីតាំង នៅក្នុងខេត្ត និងបន្តដឹកជញ្ជូននាំចេញដោយខុសច្បាប់ទៅបណ្ដាខេត្តផ្សេងៗ ទៀត និងទីផ្សារឯក្រុងភ្នំពេញ។
បុគ្គលិកអង្កេតសមាគមអាដហុក ខេត្តស្ទឹងត្រែង លោក ហូ សំអុល មានប្រសាសន៍បញ្ជាក់ដែរថា លោកតែងតែទទួលបានសេចក្ដីរាយការណ៍ពីប្រជាពលរដ្ឋអ្នករកស៊ីដឹកជញ្ជូនតាមដងផ្លូវ ទាំងផ្លូវទឹកក៏ដូចជាផ្លូវគោក នៅតំបន់នោះ ថាក្រុមសមត្ថកិច្ចដែលដាក់កម្លាំងឆែកឆេរបានធ្វើការគាបសង្កត់ និងជំរិតទារប្រាក់ ធ្វើឲ្យប្រជាពលរដ្ឋពិបាកក្នុងការប្រកបរបររកស៊ីចិញ្ចឹមជីវិតណាស់ ៖ "ខាងកម្លាំងសមត្ថកិច្ចតាមផ្លូវជើងទឹក ដែលគាត់ចុះពីលើមកហ្នឹង គឺយក ៣០ម៉ឺន ហើយចាប់យកឈើគាត់ទៀត។ ថាយើងសង្កេតមើលផ្លូវគោកវិញក៏មានដែរ ដូចគាត់ដឹកតាមម៉ូតូអី ប្រហែលជាមួយរយគីឡូពីររយគីឡូអ៊ីចឹង ខាងជំនាញ ឬខាងសមត្ថកិច្ចមួយចំនួននៅលើដងផ្លូវអ៊ីចឹងស្ទាក់យកពីគាត់ម្នាក់ ៥ដុល្លារ ឬ១០ដុល្លារ ប៉ុន្តែអាឈ្មួញធំៗ វិញច្រើនតែរួច។ យើងសង្កេតមើលអាចុងក្រោយម៉ារយៈពេលក្រោយចូលឆ្នាំនេះ ឃើញថាកម្លាំងដែលបញ្ជាដោយលោកអភិបាលខេត្តហ្នឹង ចុះត្រួតពិនិត្យអាកុងត្រូលជជុះហ្នឹង អាសកម្មភាពបទល្មើសអីផ្សេងៗ ហ្នឹង វារៀបរយដែរ"។
អភិបាលក្រុងស្ទឹងត្រែង លោក ផឹក សុបិន្ត មានប្រសាសន៍បញ្ជាក់ថា មិនមានការអនុញ្ញាតណាមួយឲ្យដាក់ប៉ុស្តិ៍ត្រួតពិនិត្យនៅតាមដងផ្លូវនៅមូលដ្ឋានលោកនោះទេ លោកបន្តថា ក្រុមមន្ត្រីអាជ្ញាធរបានអនុវត្តបទបញ្ជាលោកនាយករដ្ឋមន្ត្រីស្ដីពីបម្រាមមិនឲ្យមានកុងត្រូលជជុះរំខានការធ្វើដំណើរប្រជាពលរដ្ឋនោះទេ ៖ "មានប៉ុស្តិ៍មកពីណានៅតាមផ្លូវហ្នឹង ដូចមិនឃើញមានប៉ុស្តិ៍ផងខ្ញុំនៅហ្នឹង។ប៉ុន្តែខ្ញុំអត់មានឲ្យដាក់ប៉ុស្តិ៍អីនៅហ្នឹងទេ។ គោលការណ៍ពីណា សម្ដេចប្រកាសកោកៗ ហើយ ពីណាមានគោលការណ៍ឲ្យដាក់ប៉ុស្តិ៍ ហើយប៉ុស្តិ៍ហ្នឹងប៉ុស្តិ៍របៀបម៉េចអូនឯងនិយាយសួរហ្នឹង។ សួរទៅខាងសមត្ថកិច្ចបងឲ្យសូរទៅខាងសមត្ថកិច្ចគេមានទេ"។
អភិបាលខេត្តស្ទឹងត្រែង លោក ឡូយ សូផាត មានប្រសាសន៍បញ្ជាក់ដែរថា ខេត្តមិនបានបង្កើតឲ្យមានប៉ុស្តិ៍ត្រួតពិនិត្យណាមួយនៅតាមដងផ្លូវនោះទេ។ លោកបន្តថានឹងស្រាវជ្រាវបញ្ហានេះ ៖ "ក្រែងវាលួចពេលយប់ពេលអីទេ មានប៉ុស្តិ៍ឯណា? បាទឲ្យតែលួចដាក់សុទ្ធតែបទល្មើស"។
នាយករដ្ឋមន្ត្រីនៃប្រទេសកម្ពុជា លោក ហ៊ុន សែន បានធ្វើការក្រើនរំលឹក និងព្រមានធ្ងន់ៗ ច្រើនលើកមកហើយ ឲ្យអាជ្ញាធរគ្រប់ខេត្តក្រុងជួយមើលផ្លូវហាមមិនឲ្យមានកុងត្រូលអានាធិបតេយ្យ រំខានការធ្វើដំណើរប្រជាពលរដ្ឋ ក៏ប៉ុន្តែនៅស្ទើរគ្រប់ដងផ្លូវជាតិ គេសង្កេតឃើញមានរបាំងរបស់ក្រុមសមត្ថកិច្ចដាក់រាំងផ្លូវក្រោមគោលការណ៍ត្រួតពិនិត្យចរាចរ ឬអាវុធជាតិផ្ទុះ។ ក្រៅពីនោះ ក៏មានក្រុមសមត្ថកិច្ចច្រើនប្រភេទទៀត ប្រើប្រាស់រថយន្តប្រដេញតាមចាប់រថយន្តណាដែលមិនបានចូលបង់ប្រាក់ទៅឲ្យពួកគេ ដែលមានស្នាក់ការនៅតាមដងផ្លូវជាតិនោះ។
យ៉ាងនេះក្តី ប្រជាពលរដ្ឋ និងមន្ត្រីរាជការមួយចំនួន ដែលមានការថ្នាំងថ្នាក់ជាមួយការបង្កើតប៉ុស្តិ៍ត្រួតពិនិត្យតាមដងផ្លូវមានប្រសាសន៍អំពាវនាវសុំឲ្យប្រមុខរាជរដ្ឋាភិបាលចាត់វិធានការបន្ថែមទៀត ដើម្បីលប់បំបាត់កុងត្រូលអានាធិបតេយ្យដែលនៅតែកើតមានតាមដងផ្លូវនោះ៕