លោក ថាច់ ង៉ុកថាច់ ប្រធានសហព័ន្ធខ្មែរកម្ពុជាក្រោមនៅសហរដ្ឋអាមេរិកបានប្រាប់វិទ្យុអាស៊ីសេរីបន្ទាប់ពីទទួលដំណឹងថា លោក ម៉ាកូ ជែស៊ីនតូ ប៉ានែលឡា ជាសមាជិកសភាអឺរ៉ុប និងលោក ម៉ាកូ ប៉្រឺឌូកា សមាជិកព្រឹទ្ធសភាអ៊ីតាលី ត្រូវគេហាមមិនឲ្យជិះយន្តហោះទៅវៀតណាមនោះថានេះជាការបង្ហាញនូវភាពរំលោភសិទ្ធិមិនរើសមនុស្សនៃរដ្ឋអំណាចកុម្មុយនីស្ត។
លោក ថាច់ ង៉ុកថាច់ បានមានប្រសាសន៍ថា ៖ «យួនមានការហាមឃាត់ហ្នឹងគឺមិនត្រឹមតែមូលហេតុនៃការទៅជួបជុំបងប្អូនខ្មែរយើងនៅប្រទេសកម្ពុជាដោយការស្នើសុំរបស់សហព័ន្ធខ្មែរកម្ពុជាក្រោមនោះទេ។ គិតថាគេមានការខឹងសម្បាចំពោះគំនាបរបស់សភាអឺរ៉ុប ព្រោះលោកទាំងពីរនាក់ហ្នឹងជាមេដឹកនាំ ហើយជាសមាជិកនៃសភាអឺរ៉ុបនៅប៊ែលហ្ស៊ិក។ អាហ្នឹងគឺបង្ហាញថាការជិះជាន់លើសិទ្ធិមនុស្សនៅកម្ពុជាក្រោមកាន់តែតឹងតែងឡើងៗ ដូចដែលពិភពលោក ដូចដែលសភាអឺរ៉ុបបានគុណគូរមើលនោះ»។
តាមសេចក្ដីថ្លែងការណ៍នៃសហគមន៍ខ្មែរកម្ពុជាក្រោម មន្ត្រីសមាជិកសភានៃសហភាពអឺរ៉ុបទាំងពីររូបបានទទួលទិដ្ឋាការផ្លូវការត្រឹមត្រូវពីស្ថានទូតវៀតណាមនៅទីក្រុងរ៉ូម ប្រទេសអ៊ីតាលីរួចទៅហើយ ប៉ុន្តែត្រូវអាជ្ញាធរវៀតណាមមិនអនុញ្ញាតឲ្យចូលស្រុកគេទៅវិញ។
លោក ថាច់ ង៉ុកថាច់ មានប្រសាសន៍ទៀតថា ៖ «មន្ត្រីទាំងពីរនាក់នេះបានទៅប្រទេសកម្ពុជា ហើយខ្ញុំបាទបានទាក់ទងជាមួយនឹងលោកនៅថ្ងៃទី១៧ ដើម្បីឲ្យមានការជួបជុំជាមួយនឹងបងប្អូនខ្មែរក្រោម ព្រមទាំងព្រះសង្ឃខ្មែរក្រោមនៅវត្តសាមគ្គីរង្សី។ មូលហេតុដែលលោកមានបំណងទៅប្រទេសយួនហ្នឹងដើម្បីចង់ជួបរដ្ឋាភិបាលយួនស្ដីអំពីបញ្ហា៥ខដែលសភាអឺរ៉ុបដែលបានធ្វើសេចក្ដីសម្រេចនៅថ្ងៃទី២២ ២៣ ខែ១០កន្លងទៅហ្នឹង ដើម្បីឲ្យរដ្ឋាភិបាលយួនត្រូវតែគោរព»។
មន្ត្រីពីសភាសហភាពអឺរ៉ុបទាំងពីររូបមានបំណងធ្វើទស្សនកិច្ចនៅវៀតណាមដើម្បីចង់ស្វែងយល់អំពីការចោទថារដ្ឋអំណាចវៀតណាមរំលោភសិទ្ធិខ្មែរក្រោម៕