មជ្ឈមណ្ឌលព្យាបាលជំងឺបេះដូងភ្នំពេញ ដែលជាកន្លែងតែមួយគត់ផ្តល់ការវះកាត់ជំងឺបេះដូងធំជាងគេនៅក្នុងប្រទេសកម្ពុជា កំពុងត្រូវការថវិកាបន្ថែមសម្រាប់ដំណើរការឆ្នាំ២០១៣។ មន្ត្រីគ្រប់គ្រងមជ្ឈមណ្ឌល អំពាវនាវដល់សប្បុរសជនខ្មែរនៅក្រៅប្រទេសជួយផ្តល់ថវិកា ដើម្បីរួមគ្នាជួយសង្គ្រោះពលរដ្ឋខ្មែរ ជាពិសេសកុមារនៃក្រុមគ្រួសារក្រីក្រ។
ចាប់តាំងពីដំណើរការជាផ្លូវការក្នុងឆ្នាំ២០០១ មក មជ្ឈមណ្ឌលព្យាបាលជំងឺបេះដូងភ្នំពេញ (Phnom Penh Heart Center = PPHC) បានផ្តល់ការវះកាត់ដល់ទារក កុមារ និងមនុស្សពេញវ័យ ដែលមានជំងឺបេះដូងប្រមាណជាង ៣.៣០០នាក់ ក្នុងនោះ ៦៥% គឺជារោគបេះដូងពីកំណើត។ បច្ចុប្បន្ន មានអ្នកជំងឺចំនួនជាង ២ពាន់នាក់ទៀតដែលកំពុងរង់ចាំទទួលការវះកាត់។
ទាក់ទងនឹងដំណើរការផ្តល់សេវាពិនិត្យ ព្យាបាល និងវះកាត់ដល់អ្នកជំងឺបេះដូង ដែលកាន់តែមានចំនួនច្រើនឡើងៗនេះ សហនាយកគ្រប់គ្រងមជ្ឈមណ្ឌល លោកវេជ្ជបណ្ឌិត ហេង តៃគ្រី មានប្រសាសន៍ឱ្យដឹងថា សម្រាប់ឆ្នាំ២០១៣ មជ្ឈមណ្ឌលព្យាបាលជំងឺបេះដូងភ្នំពេញ ខ្វះថវិកាចំនួន ៥០ម៉ឺនដុល្លារ៖ «បាទ! ហ្នឹងដោយសារយើងទិញថែមសម្ភារៈ ដូចជាអេកូ ៩ម៉ឺន ប្រដាប់មើលបេះដូងជាង ១០ម៉ឺន អីវ៉ាន់ធ្ងន់ៗ។ យើងត្រូវប្ដូរសម្ភារៈដែលគេឱ្យយើងពីមុនមក ព្រោះឧបករណ៍ទាំងនោះប្រើបានតែ ៥ឆ្នាំទេ គេឱ្យយើងជាង ១០ឆ្នាំហើយ គេឱ្យយើងអាចាស់ៗមកហ្នឹង។ គ្រាន់តែសំណូមពរទៅខាងអាមេរិក បើអាចជួយបាន ស្រុកបារាំង ក៏ដោយ ឱ្យជួយដាក់លុយហ្នឹងផ្ញើដាយរិក (Direct) មកកុងរបស់មជ្ឈមណ្ឌលព្យាបាលជំងឺបេះដូងតែម្តងទៅ កុំបាច់តាមរយៈអ្នកទី២ ទី៣ទៀត ព្រោះយើងនៅទីនេះ យើងដឹងតែជួយមើលផ្ទាល់ដល់អ្នកក្រ គ្មានគិតអ្នកណាអីទេ ដឹងតែជំងឺ គឺជំងឺហើយ»។
នៅពេលបច្ចុប្បន្ននេះ មជ្ឈមណ្ឌលព្យាបាលជំងឺបេះដូងក្រុងភ្នំពេញ គឺជាស្ថាប័នស្វយ័ត ចាប់ផ្ដើមដំណើរការជាផ្លូវការក្នុងឆ្នាំ២០០១ ក្រោមជំនួយរបស់អង្គការឡាឆេន ដឺឡេះស្ព័រ (La Chaîne de l'Espoir) ហើយនិងមូលនិធិវេជ្ជសាស្ត្រកម្ពុជា ដែលជាព្រះរាជតម្រិះផ្ដួចផ្ដើមរបស់អតីតព្រះមហាក្សត្រ ព្រះករុណា ព្រះបាទសម្ដេចព្រះ នរោត្តម សីហនុ។ សម្រាប់ដំណើរការប្រចាំឆ្នាំ លោកវេជ្ជបណ្ឌិតសាស្ត្រាចារ្យ ហេង តៃគ្រី អតីតនាយកគ្រប់គ្រងមន្ទីរពេទ្យកាល់ម៉ែត្រ ដែលបច្ចុប្បន្នបានចូលនិវត្តន៍ទៅហើយនោះ ឱ្យដឹងថា មជ្ឈមណ្ឌលព្យាបាលជំងឺបេះដូងក្រុងភ្នំពេញ ត្រូវការថវិកាចំនួនប្រមាណជា ៣លានដុល្លារអាមេរិក ក្នុង ១ឆ្នាំៗ៖ «កាលមុនគេយកកូនខ្មែរទៅស្រុកបារាំង។ ដល់ក្រោយមក បានគេមកបង្កើតនៅស្រុកខ្មែរ គេចេញលុយអស់ជាង ១លាន ២០០១ គេបើកសម្ពោធហ្នឹង។ បាទ នៅកាច់ជ្រុងកាល់ម៉ែត្រ ជាប់ស្ថានទូតបារាំង តាមរយៈឡាឆេន ដឺឡេះស្ព័រ ស្រុកបារាំង និងមូលនិធិវេជ្ជសាស្ត្រកម្ពុជា ព្រះករុណាសម្ដេចឪជាប្រធាន កាលហ្នឹងលោកមានអ៊ីនីសៀតទីវ (initiative) ចង់បង្កើតក៏ហៅបារាំង មកជួយ។ ឥឡូវខ្មែរយើងកាន់កាប់ទេ។ ដំបូង កាលបារាំង គេធ្វើ គេ ១លាន ៤សែន ហើយចាប់ផ្ដើមវះកូនក្មេង២៥ (នាក់) គេជួយទាំងអស់។ ឥឡូវ ប្រហែលពី ២លាន ទៅ ២លាន ៥សែនហើយ ព្រោះពីមុនជំងឺវាតិច ឥឡូវដល់គេដឹងថាយើងដំណើរការបានហើយ ជំងឺមកកាន់តែច្រើន»។
ក្រៅពីជំនួយថវិកាផ្តល់ដោយអង្គការមនុស្សធម៌នានា មជ្ឈមណ្ឌលក៏បានទទួលថវិកាឧបត្ថម្ភចំនួន ៣០ម៉ឺនដុល្លារអាមេរិក ក្នុង១ឆ្នាំៗពីរាជរដ្ឋាភិបាលកម្ពុជា ផងដែរ ដោយផ្តល់តាមរយៈក្រសួងសុខាភិបាល។ រីឯជំនួយពីមូលនិធិឡាឆេន ដឺឡេះស្ព័រ ដែលមានន័យថាបង្គោលនៃក្តីសង្ឃឹម នោះវិញ អតីតលេខាផ្ទាល់ព្រះមហាវីរក្សត្រ និងជាទីប្រឹក្សាអមខុទ្ទកាល័យព្រះមហាក្សត្រ ព្រះអង្គម្ចាស់ ស៊ីសុវត្ថិ ធម្មិកោ មានបន្ទូលថា ព្រះមហាក្សត្រ ព្រះករុណា ព្រះបាទសម្ដេចព្រះ បរមនាថ នរោត្តម សីហមុនី និងព្រះវរបិតា គឺសម្ដេចព្រះនរោត្តម សីហនុ តែងប្រោសប្រទានព្រះរាជអំណោយ ដើម្បីជួយដល់មជ្ឈមណ្ឌលព្យាបាលជំងឺបេះដូងក្រុងភ្នំពេញ ជារៀងរាល់ឆ្នាំ៖ «ខ្ញុំដឹងថា ព្រះករុណាលោកឧស្សាហ៍ទទួលសវនាការ ហើយនៅពេលលោកទទួលម្តងៗ លោកតែងប្រទានព្រះរាជទ្រព្យ។ ឆ្នាំមុន ខាងមូលនិធិឡាឆេន ដឺឡេះស្ព័រ ហ្នឹងចូលថ្វាយបង្គំគាល់ព្រះករុណា ក្នុងឱកាសនោះលោកបានប្រទានព្រះរាជទ្រព្យប្រហែលជា ២ម៉ឺនដុល្លារអាមេរិក ២០១១ ប្រហែលខែ១ ឬខែ២។ ថវិកាដែលលោកប្រទានហ្នឹង គឺគេបញ្ចូលទៅក្នុងមជ្ឈមណ្ឌលព្យាបាលជំងឺបេះដូង ១០០%»។
ចំពោះផ្នែកបច្ចេកទេសវះកាត់វិញ គឺមានការចូលរួមពីក្រុមគ្រូពេទ្យជំនាញពីប្រទេសបារាំង សហរដ្ឋអាមេរិក ស៊ុយអែត និងប្រទេសកូរ៉េខាងត្បូង សហការជាមួយក្រុមគ្រូពេទ្យជំនាញខ្មែរ។ ក្រៅពីការវះកាត់ព្យាបាល មានអ្នកជំងឺបេះដូងប្រមាណជិត ២ម៉ឺននាក់ បានមកពិគ្រោះយោបល់នៅមជ្ឈមណ្ឌលក្នុងមួយឆ្នាំៗ។
ឯកសារសិក្សាស្រាវជ្រាវឆ្នាំ២០១១ របស់អង្គការសកម្មភាពចំណីអាហារកុមារអន្តរជាតិ (International Baby Food Action Network = IBFA) បង្ហាញថា នៅកម្ពុជា មានទារកកើតប្រមាណជិត ៣សែន ៧ម៉ឺននាក់ ក្នុងមួយឆ្នាំៗ។ ចំណែករបាយការណ៍ស្រាវជ្រាវឆ្នាំ២០១១ របស់មជ្ឈមណ្ឌលស្ដីពីស្ថានភាពជំងឺបេះដូងកុមារក្នុងប្រទេសកម្ពុជា បង្ហាញថា ក្នុងចំណោមទារកដែលទើបនឹងកើត ១ពាន់នាក់ មាន ៨នាក់ មានបញ្ហាជំងឺបេះដូងពីកំណើត (របាយការណ៍)។
ទាក់ទងនឹងមូលហេតុដែលបណ្ដាលឱ្យទារកមានបញ្ហាជំងឺបេះដូងពីកំណើតនេះ លោកវេជ្ជបណ្ឌិត លុយ លីដា អ្នកឯកទេសខាងជំងឺបេះដូងកុមារ និងជំងឺទូទៅរបស់កុមារនៃមន្ទីរពេទ្យកុមារអង្គរ ក្នុងខេត្តសៀមរាប គូសបញ្ជាក់ថា មានកត្តាច្រើនយ៉ាង ក្នុងនោះរួមមានស្ត្រីជាម្តាយ នៅពេលមានផ្ទៃពោះពិសារបារី ប្រើថ្នាំញៀន និងកើតជំងឺរាតត្បាតផ្សេងៗជាដើម៖ «ទិន្នន័យនៅលើពិភពលោក ទាំងស្រុកអាមេរិក ទាំងស្រុកអីក៏ដោយ អារឿងជំងឺបេះដូងពីកំណើតហ្នឹងមិនខុសគ្នាទេ ដូចជានៅពេលស្ត្រីមានផ្ទៃពោះ ហើយកើតស្អូច កូននឹងមានលក្ខណៈមិនធម្មតាច្រើនណាស់ ដូចជាភ្នែកឡើងបាយពីកំណើត ត្រចៀកថ្លង់ គរ ខួរក្បាលមិនប្រក្រតី ហើយបេះដូងហ្នឹង គឺសឹងតែជាង ៩០% ទៅហើយ ត្រូវតែមានបញ្ហា ហ្នឹងគឺទាក់ទងនឹងម្តាយដែលមានផ្ទៃពោះនៅត្រីមាសទីមួយ។ មួយទៀត ស្ត្រីដែលមានអាយុច្រើន ហើយមានកូនទៅ កូននោះហ្នឹងមានបញ្ហាបេះដូងដែរ ឬក្រុមពូជអំបូរ តាយាយមានជំងឺបេះដូង នោះក៏ជាកត្តាដែលធ្វើឱ្យមានជំងឺបេះដូងដែរ»។
ផ្អែកលើឯកសារសិក្សាស្រាវជ្រាវ និងរបាយការណ៍ផ្នែកវេជ្ជសាស្ត្រទាំងឡាយ អត្រាអ្នកកើតជំងឺបេះដូងនៅក្នុងប្រទេសកម្ពុជា នឹងកើនឡើងជារៀងរាល់ឆ្នាំ ជាពិសេសក្នុងចំណោមទារក។ ទន្ទឹមនឹងសេចក្តីត្រូវការផ្នែកថវិកាសម្រាប់ដំណើរការពិនិត្យ ព្យាបាល និងវះកាត់ ប្រទេសកម្ពុជា ក៏ត្រូវពង្រីកបន្ថែមទៀតនូវទីកន្លែង ឬមន្ទីរពេទ្យវះកាត់ ព្រមទាំងគ្រូពេទ្យជំនាញផងដែរ។
បច្ចុប្បន្ននេះ មជ្ឈមណ្ឌលព្យាបាលជំងឺបេះដូងភ្នំពេញ គឺជាមជ្ឈមណ្ឌលធំជាងគេនៅប្រទេសកម្ពុជា ដែលផ្តល់ការព្យាបាលវះកាត់ជំងឺបេះដូងបានប្រមាណជាង ១ពាន់ករណី ក្នុងមួយឆ្នាំៗ (PPHC)។
ចំណែកមន្ទីរពេទ្យគន្ធបុប្ផា ឬមន្ទីរពេទ្យព្រះបាទជ័យវរ្ម័នទី៧ (របាយការណ៍ប្រចាំឆ្នាំ២០១១) និងមន្ទីរពេទ្យកុមារអង្គរ នៅខេត្តសៀមរាប គឺផ្តល់ការវះកាត់ព្យាបាលតែចំពោះកុមារប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។