លោក អ៊ុំ ដារាវុធ មន្រ្តីជាន់ខ្ពស់ព្រះរាជខុទ្ទកាល័យព្រះមហាក្សត្រកម្ពុជាបានមានប្រសាសន៏នៅថ្ងៃទី៣១ កក្កដានេះ ឲ្យដឹងថា ៖ «ស្ដេចទៅទាំង៣អង្គ ព្រះបិតា ព្រះមហាវីរក្សត្រ ព្រះមហាក្សត្រ និងព្រះរាជមាតា ។ ព្រះមហាក្សត្រលោកយាងទៅក្នុងនាម ទី១ ការយាងសម្រាប់ជាគណៈប្រតិភូចូលទៅសម្ពោធកីឡាអូឡាំពិក ដូចជាបណ្ដាប្រមុខរដ្ឋាភិបាលប្រទេសមួយចំនួន ។ ទី២ លោកយាងទៅសម្រាប់ទៅ Check up (ពិនិត្យ) ព្រះរាជសុខភាពរបស់លោក» ។
តាមលោក អ៊ុំ ដារាវុធ បានឲ្យដឹងបន្ថែមថាព្រះមហាក្សត្រនិងព្រះរាជបិតានិងព្រះមាតា មានគម្រោងស្នាក់នៅប្រទេសចិនចំនួន២សប្តាហ៍ទើបយាងមកប្រទេសកម្ពុជាវិញ ។
មន្រ្តីព្រះបរមរាជវាំងបានឲ្យដឹងថា គណៈប្រតិភូព្រះមហាក្សត្រនឹងយាងចាកចេញនៅម៉ោង៩ព្រឹក ដោយមានមន្រ្តីជាន់ខ្ពស់មកពីច្រើនគណបក្សនយោបាយ សុំចូលរួមជូនព្រះរាជដំណើរផង ជាពិសេសអ្នកដឹកនាំជាន់ខ្ពស់ពីគណបក្សប្រជាជនកម្ពុជាទាំងបីរូបគឺ លោក ហេង សំរិន លោក ហ៊ុន សែន និងលោក ជា ស៊ីម ។
ការយាងចាកចេញរបស់ព្រះមហាក្សត្រនិងព្រះរាជវង្សានុវង្សទៅប្រទេសចិននេះ បានកើតមានឡើងនៅក្រោយពេលមានការបោះឆ្នោតជាតិរើសសមាជិកសភាសម្រាប់អាណត្តិទី៤ កាលពីថ្ងៃទី២៧ កក្កដាកន្លងទៅនេះ ទើបតែបញ្ចប់ទៅថ្មីៗ ហើយកំពុងមានការតវ៉ាថាការបោះឆ្នោតលើកនេះមានមនុស្សជាច្រើននាក់បានបាត់ឈ្មោះពីបញ្ជីបោះឆ្នោតមិនអាចបោះឆ្នោតបាន ហើយនិងមានសភាពការណ៍មួយទៀតគឺការឈ្លានពានរបស់កងទ័ពថៃជាច្រើនរយនាក់មកលើទឹកដីខ្មែរនៅតំបន់ប្រាសាទព្រះវិហារ ដែលមកទល់នឹងពេលនេះមិនទាន់ដកកងទ័ពចេញនៅឡើយទេ ។
តាមការបូកសរុបបណ្តោះអាសន្នរបស់អង្គការសង្កេតការណ៍បោះឆ្នោតមួយឈ្មោះ ខុមហ្រ្វែល បានឲ្យដឹងថាការបោះឆ្នោតលើកនេះ គណបក្សប្រជាជនកម្ពុជាបានឈ្នះទទួលបានសំឡេងលើសគេ ហើយបើគិតជាកៅអីបានចំនួនប្រមាណ៩០កៅអីក្នុងចំណោមកៅអីសភាចំនួន១២៣ ។
សូមជម្រាបថាប្រទេសចិនជាប្រទេសមួយដែលមានចំណងទាក់ទងពិសេសជាមួយព្រះមហាក្សត្រខ្មែរតាំងពីយូរលង់ណាស់មកហើយ ៕