លោក មុំ រដ្ឋា បានបន្ថែមថាសូម្បីតែមេក្រូដែលលោកបានខ្ចីពីវត្តក៏ត្រូវលោកមេប៉ុស្តិ៍ដែលមានជំហរគាំទ្របក្សកាន់អំណាចតាមយាយីដល់វត្តដែរ ។
លោក មុំ រដ្ឋា បានឲ្យដឹងថា ៖ «យើងជួលអ្នកក្រៅមិនបានយើងទៅខ្ចីលោក ។ ដល់ខ្ចីយកមកចាក់ឃោសនាបាន៥ថ្ងៃ រហូតដល់គេតាមដានដឹងគេទៅគំរាមកំហែងលោកថា តេជគុណមានមេក្រូមកពីណាជួលទៅឲ្យអាគណបក្សប្រឆាំងដែលចាក់ជេរសម្ដេចនាយក» ។
ព្រះតេជព្រះគុណ ផាត់ អ៊ី ព្រះចៅអធិការវត្តពោធិវង្ស ឃុំថ្កូវ បានមានដីកាបំភ្លឺថា ៖ «ថ្ងៃ២ប្រធានប៉ុស្តិ៍គាត់មកសួរតើមេក្រូហ្នឹងលោកតាជួលឬយ៉ាងម៉េច ? អាត្មាថា អាត្មាមិនជួលទេ បាសកគាត់ខ្ចី តែត្រង់ខ្ចីទៅធ្វើអី ? អាត្មាមិនដឹងទេណា៎ ។ ប្រធានប៉ុស្តិ៍ គង់ ហឿន ថាអាត្មាហ្នឹងឲ្យមេក្រូទៅឲ្យគណបក្សដើម្បីនឹងផ្សព្វផ្សាយ ដូចជាអាត្មាហ្នឹងដើរទៅជួយផ្សព្វផ្សាយដែរ បានប្រាប់អាត្មាថាលែងឲ្យ» ។
លោក គង់ ហឿន មេប៉ុស្តិ៍ឃុំថ្កូវដែលរងការចោទប្រកាន់បានបកស្រាយថា លោកបានសាកសួរនិងទាមទារឲ្យព្រះចៅអធិការវត្តយកមេក្រូមកទុកវត្តវិញ តាមរយៈការស្នើរបស់ម្ចាស់មេក្រូដែលនៅភ្នំពេញប៉ុណ្ណោះ ។
លោកបានឲ្យដឹងបន្ថែមថាមេក្រូដែលគណបក្សប្រឆាំងមិនអាចរកបាននៅក្នុងឃុំ អាចមកពីមេក្រូមានតិចត្រឹម១០គ្រឿងហើយសុទ្ធតែជាប់រវល់ ។
លោក គង់ ហឿន បានបញ្ជាក់ថា ៖ «ជួនអីវាជាន់គេទៅការអី បុណ្យ ឬក៏ខាងគណបក្សនានាគេជួលផ្សេងដែរ គេត្រូវការទៅឃោសនាអីអ៊ីចឹងទៅ ។ គេជួលអស់ វាត្រូវតែមានអត់អ៊ីចឹងដែរ» ។
លោកស្រី មាស សូដា អនុប្រធានគណៈកម្មការរៀបចំការបោះឆ្នោតឃុំថ្កូវបានឲ្យដឹងថា គណបក្សនយោបាយមួយចំនួនក្នុងភូមិបានត្អូញត្អែរពីការលំបាកក្នុងការរកជួលមេក្រូ ដោយចោទថាគណបក្សប្រជាជនកម្ពុជាជួលអស់ ។
លោកស្រី មាស សូដា បានមានប្រសាសន៍ថា ៖ «បើតាមគណបក្សផ្សេងៗថា ទៅសួរសុទ្ធតែគ្មានទាំងអស់គណបក្សគាត់យកទាំងអស់ គ្រប់ភូមិទាំងអស់ គឺមេក្រូហ្នឹងគាត់ជួលទាំងអស់ មើលទៅដូចគ្មានអ្នកណានៅទេ» ។
នាយកប្រតិបត្តិគណៈកម្មាធិការខុមហ្វ្រែល លោក គល់ បញ្ញា បានបញ្ជាក់ឲ្យដឹងថា ការជួលផ្តាច់មុខនូវឧបករណ៍ផ្សព្វផ្សាយរបស់គណបក្សមួយដោយមានការព្រមព្រៀងជាករណីស្របច្បាប់ តែកិច្ចអន្តរាគមន៍របស់អាជ្ញាធរដែនដីក្នុងករណីឃោសនារបស់គណបក្សនយោបាយ ដោយមាននិន្នាការនិយមម្ខាងគឺជាករណីល្មើសច្បាប់ ។
លោក គល់ បញ្ញា បានណែនាំថា ៖ «យកល្អវត្តគួរតែមានចិត្តទូលាយបន្តិចទៅ ហើយបើកចំហឲ្យគ្រប់គណបក្សខ្ចី ហើយប្រកាសប្រាប់តែម្ដងថា ឥឡូវអ្នកណាចង់មកខ្ចីសូមអញ្ជើញមក ហើយឥឡូវចាត់ចែងឲ្យខ្ចីអ៊ីចឹងទៅ ដើម្បីជាសុទ្ធាចូលរួមនៅក្នុងកិច្ចការសង្គម អាហ្នឹងល្អណាស់» ។
តាមការបញ្ជាក់ឲ្យដឹងពីអាជ្ញាធរមូលដ្ឋានមានគណបក្សនយោបាយចំនួន៥ដែលកំពុងតែបើកយុទ្ធនាការឃោសនាក្នុងឃុំថ្កូវដែលមាន៧ភូមិនេះ ។ ចំណែកសកម្មជនគណបក្សសមរង្ស៊ីបានបញ្ជាក់ថាគណបក្សប្រឆាំងនេះមានមេក្រូត្រឹម២គ្រឿងដើម្បីធ្វើការឃោសនា ៕