លោក សាម៉ាក់ បានថ្លែងថាលោកនឹងនៅបន្តភារកិច្ចជានាយករដ្ឋមន្រ្តីដើម្បីបុព្វហេតុជាតិ ព្រោះថាលោកជានាយករដ្ឋមន្ត្រីស្របច្បាប់ ។ លោកបន្តថា លោកនឹងមិនលាលែងតំណែងដោយសារការគំរាមកំហែងដោយការតវ៉ានោះទេ ដោយលោកបន្ថែមថាប្រសិនបើលោកត្រូវលាឈប់ក៏លាឈប់ទៅតាមច្បាប់ដែរ។
ទោះជាយ៉ាងនេះក្តី លោក សាម៉ាក់ ត្រូវបានគេរាយការណ៍មកថា បានជួបព្រះមហាក្សត្រថៃ ភូមិបុល អាឌុល យ៉ាដេត កាលពីរសៀលម៉ោង៥ថ្ងៃសៅរ៍នេះ ដើម្បីទូលថ្វាយព្រះអង្គអំពីសភាពការណ៍នយោបាយ និងសុំព្រះរាជយោបល់ព្រះអង្គលើដំណោះស្រាយជម្លោះនោះ។
នៅស្របពេលជាមួយគ្នានេះ មេដឹកនាំគណបក្សដៃគូរក្នុងរដ្ឋាភិបាលចម្រុះជាមួយគណបក្សអំណាចពលរដ្ឋរបស់លោក សាម៉ាក់ គឺមេដឹកនាំគណបក្សឆាតថៃ គណបក្សប្រជារាស្រ្ត គណបក្សភឿផែនឌិន និងគណបក្សពីរផ្សេងទៀត បានបើកកិច្ចប្រជុំពិសេសមួយកាលពីព្រឹកថ្ងៃសៅរ៍នេះជាមួយ លោក សាម៉ាក់ ដោយសម្រេចស្នើសុំឲ្យមានកិច្ចប្រជុំរដ្ឋសភាបន្ទាន់មួយ ដើម្បីស្វែងរកដំណោះស្រាយបញ្ចប់ភាពវឹកវរក្នុងប្រទេសដែលកំពុងកើតឡើងដោយការប្រឈមុខដាក់គ្នារវាងរដ្ឋាភិបាលនិងក្រុមសម្ព័ន្ធភាពប្រជាធិបតេយ្យ។
ក្រុមអ្នកតវ៉ារាប់ម៉ឺននាក់នៃសម្ព័ន្ធភាពប្រជាជនប្រជាធិបតេយ្យកំពុងកាន់កាប់អគាររដ្ឋាភិបាល និងនៅស្ពានម៉ាក់ខាវ៉ាន់រ៉ាំងសាន់ ខាងក្រៅអគារអង្គការសហប្រជាជាតិ ដើម្បីទាមទារឲ្យលោក សាម៉ាក់ ចុះចេញពីតំណែង ខណៈដែលក្រុមប៉ូលិសបង្ក្រាបបាតុកម្មបានបញ្ឈប់សកម្មភាពបំបែកហ្វូងបាតុកម្ម បន្ទាប់ពីតុលាការស៊ីវិលថៃបានដកដីកាបង្គាប់ឲ្យចាប់ខ្លួនមេដឹកនាំសម្ព័ន្ធភាពប្រជាធិបតេយ្យ៩រូប ដោយសំអាងថាប៉ូលិសបានប្រើអំពើហិង្សាបង្រ្កាបហ្វូងបាតុករបណ្តាលឲ្យរបួសជាច្រើននាក់កាលពីល្ងាចថ្ងៃសុក្រ៕