មេបញ្ជាការរងកងការពារព្រំដែនលេខ៤០២ នៃកងយោធពលខេមរភូមិន្ទប្រចាំតំបន់ប្រាសាទតាក្របី លោក ហូ ប៊ុនធី បានមានប្រសាសន៍ឲ្យដឹងកាលពីព្រឹកថ្ងៃសៅរ៍ ទី២៧ ខែកញ្ញា ថា ទាហានឈុតខ្មៅថៃនៅតែមានចល័តកម្លាំងចូលមកតំបន់ប្រាសាទតាក្របីស្ទើរតែរៀងរាល់ថ្ងៃ ដែលធ្វើឲ្យកងរក្សាព្រំដែនខ្មែរមានការព្រួយបារម្ភចំពោះការចរចារវាងរដ្ឋាភិបាលនៃប្រទេសទាំងពីរដែលចេះតែអូសបន្លាយពេលវេលាយូរទៅទៀតនោះ។
លោក ហូ ប៊ុនធី បានឲ្យដឹងថា ៖ «វានៅមានការចល័តទៅមកៗដែរ មួយថ្ងៃវាមាន ថ្ងៃណា៣នាក់ ថ្ងៃណារហូតដល់៥នាក់ទៅ ហើយយើងក៏ចល័តដែរ។ ស្ថានភាពហ្នឹងគឺខ្សែព្រំដែនហ្នឹងមិនដឹងថាថ្មើរណាយើងដោះស្រាយបាន។ បញ្ហាដែលមិនទាន់ដោះស្រាយបានហ្នឹងវាបង្កការលំបាកឲ្យយើង»។
តាមកងរក្សាព្រំដែនខ្មែរនិយាយថា ពេលបច្ចុប្បន្នកងទាហានខ្មែរកំពុងតែចាប់ផ្ដើមធ្វើផ្លូវដើម្បីឲ្យងាយស្រួលចូលទៅកាន់ប្រាសាទតាក្របី ហើយកងទ័ពខ្មែរជាច្រើនបានរាយបណ្ដាក់នៅតាមខ្សែបន្ទាត់ព្រំដែននៅតំបន់នោះ ខណៈពេលដែលទាហានថៃនៅតែព្យាយាមចង់កាន់កាប់ប្រាសាទតាក្របីនោះ។
ចំណែកនៅឯតំបន់មុំបីនៃស្រុកជាំក្សាន្ត ខែត្រព្រះវិហារ ជាប់ព្រំដែនកម្ពុជា លាវ និងថៃ ឯណោះវិញ មានសេចក្តីរាយការណ៍ថា កងទាហានថៃមួយក្រុមបានជំរុលចូលមកក្នុងបន្ទាត់ព្រំដែនដែលមិនទាន់ដាច់ស្រេចនៃទឹកដីខ្មែរចម្ងាយ១០០ម៉ែត្រកាលពីពេលថ្មីៗនេះ។
តាមមេបញ្ជាការប៉ូលិសព្រំដែនលេខ១០៥ ដែលប្រចាំការនៅតំបន់នោះ លោកវរសេនីយ៍ត្រី សេង គឹមទៀង បានមានប្រសាសន៍ថា កាលពីថ្ងៃទី១៩ កញ្ញា មានទាហានឈុតខ្មៅថៃប្រមាណ១៥នាក់បានជំរុលចូលមកក្នុងព្រំដែនខ្មែរហើយបោះជំរំមិនទាន់ចាកចេញនៅឡើយទេ។
លោកវរសេនីយ៍ត្រី សេង គឹមទៀង បានឲ្យដឹងថា ៖ «ថ្ងៃទី១៩ ចូលមកប្រហែលជាពី១០ទៅ១៥នាក់ ហើយវានៅទល់មុខយើងតែម្ដង...។ អាហ្នឹងវាជាដីខ្មែរ អាហ្នឹងដូចថាតំបន់សមិនទាន់វាស់វែង»។
សូមរំឭកថា ចាប់តាំងតែពីថ្ងៃ១៥ ខែកក្កដា ដែលកងទាហានថៃរាប់រយនាក់បានចូលលុកលុយទីវត្តខ្មែរជិតតំបន់ប្រាសាទព្រះវិហារមក កងទ័ពថៃបានចូលលុកលុយទឹកដីខ្មែរជាបន្តបន្ទាប់នៅប្រាសាទតាមាន់ តំបន់ជប់ត្រឡោក តំបន់ជប់គគីរ ចៃឆ្កែ និងប្រាសាទតាក្របី នៅស្រុកបន្ទាយអំពិល ខែត្រឧត្ដរមានជ័យ។
រដ្ឋាភិបាលខ្មែរធ្លាប់បានឲ្យដឹងកាលពីពេលថ្មីៗថា នឹងប្រឹងប្រែងរកកិច្ចជួបចរចាទ្វេភាគីជាមួយប្រទេសថៃបន្តទៅទៀតស្ដីពីបញ្ហាព្រំដែនបន្ទាប់ពីរដ្ឋាភិបាលថ្មីរបស់ថៃបានបង្កើតឡើងហើយ៕