តាមកងទាហានឈុតខ្មៅមួយរូបដែលកំពុងតែស្ថិតនៅខ្សែត្រៀមជួរមុខ បានមានប្រសាសន៍ឲ្យដឹងកាលពីព្រឹកថ្ងៃសុក្រ ទី១៥ ខែសីហា ថា គេត្រៀមខ្លួននឹងវិលត្រឡប់ទៅវិញក៏ប៉ុន្តែមិនបានដឹងពីពេលវេលាច្បាស់លាស់ទេ ដោយគ្រាន់តែទទួលបានព័ត៌មានតាមវិទ្យុទាក់ទងថាគេរង់ចាំបញ្ជាពីថ្នាក់លើ ហើយទំនងជាធ្វើឡើងនៅថ្ងៃទី១៦ ខែសីហា ឬក៏ថ្ងៃទី១៨ ។
ចំណែកកងទាហានខ្មែរដែលកំពុងតែត្រៀមប្រយុទ្ធនៅខ្សែត្រៀមជួរមុខដែរបាននិយាយថា គេមានអារម្មណ៍ត្រេកអរចំពោះគម្រោងដកកងទ័ពចេញពីការប្រឈមមុខដាក់គ្នានេះ ពីព្រោះពួកគេបានស្ថិតនៅក្នុងខ្សែត្រៀមជាយូរមកហើយ ស៊ូទ្រាំចំពោះការលំបាកគ្រប់បែបយ៉ាង ៖ «មានអារម្មណ៍ចង់តែដកដែរ លំបាកនៅក្នុងការដេកយប់ ខ្វះខាតអារឿងក្រណាត់កៅស៊ូវាតូច ភ្លៀងទៅ រលឹមទៅ វាយ៉ាប់ដែរ» ។
តាមការបង្ហើបឲ្យដឹងពីមេបញ្ជាការទាហានខ្មែរជាន់ទាបខ្លះថា កងទាហានឈុតខ្មៅថៃមួយចំនួនដែលនៅក្នុងទីវត្តខ្មែរអាចនឹងដកចេញនៅពេលយប់ថ្ងៃទី១៥ ខែសីហា ធ្វើឡើងស្ងាត់ៗដើម្បីបិទបាំងពីភ្នែកអ្នកកាសែត ។
អគ្គមេបញ្ជាការរងនៃកងយោធពលខេមរភូមិន្ទដែលបានមកដល់ប្រាសាទព្រះវិហារ លោកឧត្ដមសេនីយ៍ គន់ គីម មិនបានអធិប្បាយបញ្ហានោះទេកាលពីរសៀលថ្ងៃសុក្រនេះ ។
ចំណែកទីប្រឹក្សានាយករដ្ឋមន្ត្រី ហ៊ុន សែន និងជាអភិបាលខែត្រកំពង់ចាម លោក ហ៊ុន ណេង គ្រាន់តែមានប្រសាសន៍ថា ប្រាសាទព្រះវិហារជាទឹកដីខ្មែរ ហើយរដ្ឋាភិបាលប្រឹងប្រែងដោះស្រាយដោយការមិនបង្ហូរឈាម ។
លោក ហ៊ុន ណេង បានមានប្រសាសន៍ថា ៖ «យើងទាំងអស់គ្នាបានដឹងហើយថា ទឹកដីនេះជាទឹកដីរបស់យើង មិនមែនជាទឹកដីអ្នកណាទេ ។ ការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន ជាប្រមុខរាជរដ្ឋាភិបាល បានណែនាំបញ្ជាទៅដល់កងកម្លាំងប្រដាប់អាវុធទាំងអស់ធ្វើយ៉ាងណាឲ្យអត់ធ្មត់ខិតខំដោះស្រាយទៅតាមសន្តិវិធី ព្រោះជាទិដ្ឋភាពនយោបាយ ក៏ដូចជាទិដ្ឋភាពច្បាប់គឺទឹកដីនេះ គឺយើងឈ្នះទាំងស្រុងហើយ យើងមិនចាំបាច់បង្កឲ្យកើតសង្គ្រាម» ។
តាមការឲ្យដឹងពីកងទាហានខ្មែរថានៅក្នុងបរិវេណវត្តកែវសិក្ខាគិរីស្វារៈ ទាំងកងទ័ពខ្មែរនិងកងទ័ពថៃត្រូវដកចេញទាំងអស់ ដោយទុកឲ្យនៅម្ខាងទាហានតែ១០នាក់ នៅឯខ្សែត្រៀមជួរមុខទុកតែទាហានម្ខាងៗ២០នាក់ប៉ុណ្ណោះ ។
សូមរំឭកថាចាប់តាំងតែពីកងទាហានឈុតខ្មៅថៃបានចូលលុកលុយទីវត្តខ្មែរ ក្បែរប្រាសាទព្រះវិហារ កាលពីថ្ងៃទី១៥ ខែកក្កដា រហូតដល់ថ្ងៃទី១៥ ខែសីហានេះ មានរយៈពេល៣១ថ្ងៃហើយ ៕