ការមិនទាន់សម្រេចចិត្តតបជាផ្លូវការនេះគឺដោយសារតែរដ្ឋមន្ត្រីការបរទេសថៃទើបតែថ្លែងឲ្យក្រុមអ្នកកាសែតនៅឯក្រុងបាងកកដឹងអំពីកាលបរិច្ឆេទថ្មីនៃកិច្ចប្រជុំកំពូលអាស៊ាននេះ។
លោក កុយ គួង មន្ត្រីនាំពាក្យក្រសួងការបទេសខ្មែរបានថ្លែងយ៉ាងដូច្នេះថា ៖ «ចាំមើលបន្តិចទៀត យើងបញ្ជាក់មន្ត្រីនៅក្រសួងឲ្យច្បាស់បន្តិច»។
ចំណែកឯមន្ត្រីនាំពាក្យរាជរដ្ឋាភិបាលខ្មែរ គឺលោករដ្ឋមន្ត្រីក្រសួងព័ត៌មាន ខៀវ កាញារីទ្ធ បានថ្លែងថា ភ្លាមៗនេះលោកក៏មិនទាន់អាចឆ្លើយតបជាផ្លូវការបាននៅឡើយទេ។
លោករដ្ឋមន្ត្រី ខៀវ កាញារីទ្ធ បានមានប្រសាសន៍ថា ៖ «ខ្ញុំក៏អត់ទាន់បានការណែនាំពីសម្ដេចនាយករដ្ឋមន្ត្រី បានខ្ញុំអត់អាចមានមតិបាន»។
លោករដ្ឋមន្ត្រី ខៀវ កាញារីទ្ធ បានថ្លែងបន្តថា ទំនងជាគ្មានប្រទេសណាមួយជំទាស់ឡើយ ក៏ប៉ុន្តែតាមលោកដឹងប្រទេសសិង្ហបុរីចង់ឲ្យថៃពន្យារកិច្ចប្រជុំបន្តទៀត ដរាបណាប្រទេសថៃមានសន្តិសុខ ស្ថិរភាពគ្រប់គ្រាន់។
លោករដ្ឋមន្ត្រី ខៀវ កាញារីទ្ធ បានបញ្ជាក់ថា ៖ «សាំងហ្គាពួរគេចង់ពន្យឺតឲ្យយឺត ឲ្យលើកបន្តិចសិនទៅណា៎ ឲ្យធានាសុវត្ថិភាពធានាអីបាន»។
កិច្ចប្រជុំកំពូលលើកទី១៤នៃសមាគមប្រជាជាតិអាស៊ីអាគ្នេយ៍ ឬហៅកាត់ថា សមាគមអាស៊ាន គឺបានគ្រោងបើកកិច្ចប្រជុំជាលើកដំបូងនៅពាក់កណ្តាលខែធ្នូនេះដោយធ្វើឯឈៀងម៉ៃ ខេត្តភាគខាងជើងនៃប្រទេសថៃ ក៏ប៉ុន្តែគម្រោងនេះត្រូវលើកពេលវិញដោយសារតែវិបត្តិនយោបាយវឹកវរនៅប្រទេសថៃ។
ការលើកពេលកិច្ចប្រជុំនោះក៏ត្រូវបានរិះគន់ពីប្រទេសជាសមាជិកអាស៊ាន ជាពិសេសប្រទេសសិង្ហបុរី ហើយថែមទាំងស្នើឲ្យធ្វើកិច្ចប្រជុំនោះធ្វើនៅឯប្រទេសឥណ្ឌូណេស៊ីវិញក្នុងករណីដែលថៃនៅតែបន្តមានវិបត្តិនយោបាយនោះ។
ទោះបីជាយ៉ាងណាក៏ដោយ អនុរដ្ឋមន្ត្រីក្រសួងមហាផ្ទៃថៃបានឲ្យអ្នកកាសែតដឹងថា គម្រោងកិច្ចប្រជុំកំពូលអាស៊ានថ្មីនេះ គឺសម្រេចគ្រោងធ្វើនៅក្នុងទីក្រុងបាងកក ក៏ប៉ុន្តែនៅមិនទាន់ច្បាស់លាស់អំពីទីតាំងនៅឡើយទេ។
ចំណែកឯមន្ត្រីនៅការិយាល័យនាយករដ្ឋមន្ត្រីថៃបានថ្លែងដែរថា ថៃកំពុងរង់ចាំចម្លើយតបពីប្រទេសចិននិងប្រទេសសមាជិកអាស៊ានដទៃទៀត ដែលគេរំពឹងថាកាលបរិច្ឆេទកិច្ចប្រជុំថ្មីនេះនឹងត្រូវសម្រេចជាផ្លូវការនៅក្នុងសប្តាហ៍នេះ។
យោងតាមរបៀបវារៈកិច្ចប្រជុំគឺគេរំពឹងថានឹងមានតំណាងប្រទេសជប៉ុន កូរ៉េខាងត្បូង ចិន ឥណ្ឌា និងតំណាងអគ្គលេខាធិការអង្គការសហប្រជាជាតិចូលរួមផងដែរ។
យោងតាមឯកសារអាស៊ាន ប្រទេសថៃបច្ចុប្បន្នគឺត្រូវទទួលវេនជាប្រធានសមាគមអាស៊ានក្នុងអាណត្តិមួយឆ្នាំកន្លះ គឺចាប់ពីខែកក្កដា ឆ្នាំ២០០៨នេះ រហូតដល់ខែធ្នូ ឆ្នាំ២០០៩។
នៅក្នុងអាណត្តិរបស់ខ្លួន ប្រទេសថៃត្រូវរៀបចំកិច្ចប្រជុំធំៗបីលើកគឺនៅឆ្នាំដំបូងចំនួនមួយលើក និងនៅឆ្នាំ២០០៩ត្រូវរៀបចំកិច្ចប្រជុំចំនួនពីរលើក៕