គម្រោងប្រមូលផ្តុំគ្នាតវ៉ានាពេលខាងមុខនេះ ត្រូវបានមន្រ្តីសមត្ថកិច្ចនគរបាលក្រុងភ្នំពេញ បានបដិសេធជាមុននៅថៃ្ងច័ន្ទនេះ។
លោក វ៉ាន់ សូផាត នាយករងនៃអង្គការសិទ្ធិមនុស្ស លីកាដូ ដែលមានគម្រោងដឹកនាំការប្រមូលផ្តុំតវ៉ាដោយសន្តិវីធីនៅថៃ្ងអង្គារនេះ បានមានប្រសាសន៍ប្រាប់វិទ្យុអាស៊ីសេរីថា ប៊ន សំណាង និង សុខ សំអឿន កំពុងតែជាប់ក្នុងមន្ទីរឃុំឃាំងរយៈពេល ១៧០០ថៃ្ងមកហើយ និងថា ពួកគេជាមនុស្សគ្មានកំហុសទេ។
លោក វ៉ាន់ សូផាត ថ្លែងដូច្នេះថា ៖ «ខួបដែលជាប់ពន្ធនាគាររបស់ ប៊ន សំណាង និង សុខ សំអឿន ហ្នឹង រយៈពេល ១៧០០ថ្ងៃ ជាង៤ឆ្នាំ។ យើងចង់ឲ្យមតិជាតិ មតិអន្តរជាតិ ក៏ដូចជារាជរដ្ឋាភិបាល ហើយជាពិសេស តុលាការកំពូល គឺថា សូមឲ្យផ្ដោតការចាប់អារម្មណ៍ម្ដងទៀត ទៅករណីលោក ប៊ន សំណាង និង សុខ សំអឿន។ អ្នកទាំងពីរហ្នឹង តាមភស្តុតាងយើងយកបានផ្សេងៗម
ក គឺថា អ្នកទាំងពីរហ្នឹងពុំមានទោសទេ»។
លោកស្រី នួន គឹមស្រ៊ី ម្តាយរបស់ ប៊ន សំណាង បានមានប្រសាសន៍ថា លោកស្រីនឹងចូលរួមក្នុងការតវ៉ាដោយសន្តិវិធីនាពេលខាងមុខនេះ ៖ «ខ្ញុំរាល់ថ្ងៃនឹកអាណិតទាំងយប់ ទាំងថ្ងៃហ្នឹង ពេលភ្លៀង ពេលរលឹម»។
ទាក់ទងនឹងគម្រោងប្រមូលផ្តុំគ្នានៅខាងមុខពន្ធាគារក្រុងភ្នំពេញ ឬ PJ នៅព្រឹកថ្ងៃអង្គារនេះ លោក ទូច ណារ៉ុថ ស្នងការនគរបាលក្រុងភ្នំពេញ បានមានប្រសាសន៍ព្រមាននៅថៃ្ងច័ន្ទនេះថា គេមិនអាចធ្វើទៅបានទេ ៖ «ខ្ញុំមិនអនុញ្ញាតឲ្យទេ ព្រោះឥឡូវហ្នឹង PJ ហ្នឹង វាមិនមែនក្រោមការគ្រប់គ្រងរបស់ប៉ូលិសក្រុងទេ ដូច្នេះពន្ធនាគារវាត្រូវស្ថិតនៅក្រោមការគ្រប់គ្រងរបស់អគ្គនាយកដ្ឋានពន្ធនាគារ»។
សូមរំឭកថា ប៊ន សំណាង និង សុខ សំអឿន ត្រូវបានតុលាការក្រុងភ្នំពេញបានកាត់ទោសឲ្យជាប់ពន្ធនាគារម្នាក់ៗ ២០ឆ្នាំ ក្រោមបទចោទប្រកាន់ថា ពួកគេទាំងពីរបានរួមដៃគ្នាបាញ់សម្លាប់លោក ជា វិជ្ជា មេដឹកនាំសហជីពសេរីកម្មករកម្ពុជា កាលពីថៃ្ងទី២២ ខែមករា ឆ្នាំ២០០៤ កន្លងទៅ នៅកណ្តាលក្រុងភ្នំពេញ។
ក្រោយមកកាលពីខែមេសា ឆ្នាំ២០០៧ កន្លងទៅនេះ តុលាការសាលាឧទ្ធរណ៍បានសម្រេចតម្កល់សាលក្រមវិនិច្ឆ័យរបស់តុលាការដំបូងក្រុងភ្នំពេញនោះចាត់ទុកថាជាបានការ។
ក្រុមសកម្មជនការពារសិទ្ធិមនុស្សនិងក្រុមគ្រួសាររបស់ ប៊ន សំណាង នឹង សុខ សំអឿន កំពុងតែរង់ចាំតុលាការកំពូលមួយទៀតតែប៉ុណ្ណោះ ក្នុងការវិនិច្ឆ័យទោសជាចុងក្រោយ ជាមួយនឹងការទទូចសុំឲ្យដោះលែងអ្នកទាំងពីរឲ្យមានសេរីភាពវិញ ដោយសំអាងថា អ្នកទាំងពីរគឺជាឃាតករសិប្បនិម្មិតនិងជាមនុស្សគ្មានកំហុស។
គេនៅមិនទាន់បានដឹងនៅទ្បើយនូវការកំណត់ថៃ្ងវិនិច្ឆ័យរបស់តុលាការកំពូល បើទោះបីមេធាវីរបស់អ្នកទាំងពីរបានដាក់ជូននូវឯកសារសារណាការពារកូនក្តីរបស់ខ្លួនទៅតុលាការកំពូលជាច្រើនខែមកហើយ៕