បើតាមមន្ត្រីតស៊ូមតិនៃគណៈកម្មការសម្របសម្រួលប្រយុទ្ធនឹងជំងឺអេដស៍ លោក ណូ មីហ្ស៊ី បានឲ្យដឹងថា ក្នុងឱកាសព្រះរាជពិធីបុណ្យអុំទូកឆ្នាំនេះ មានអង្គការចំនួន ១៩ ដែលជាសមាជិករបស់គណៈកម្មការសម្របសម្រួលប្រយុទ្ធនឹងជំងឺអេដស៍និងអង្គការជាង ១០ ផ្សេងទៀត កំពុងតែធ្វើការផ្សព្វផ្សាយពីមេរោគអេដស៍។
ប្រធានផ្នែកទំនាក់ទំនងនិងទីផ្សារសង្គមនៃអង្គការអន្តរជាតិបម្រើសុខភាពប្រជាជន (PSI) លោក សួរ ឌីណា បានឲ្យដឹងថា អង្គការរបស់លោកបានដាក់បុគ្គលិកអប់រំផ្សព្វផ្សាយអំពីមេរោគអេដស៍ចំនួន ៦០០នាក់ក្នុងទីក្រុងភ្នំពេញសម្រាប់រយៈពេលបីថ្ងៃនៃបុណ្យអុំទូក។
លោក សួរ ឌីណា បានឲ្យដឹងថា អង្គការលោកនិងអង្គការដទៃទៀតបានផ្ដោតយកថ្ងៃអុំទូកដើម្បីផ្សព្វផ្សាយឲ្យបានខ្លាំងក្លាពីបញ្ហាមេរោគអេដស៍ ក៏ដោយសារតែក្នុងឱកាសបុណ្យអុំទូក មានប្រជាជនច្រើនបានធ្វើដំណើរពីខេត្តក្រុងនានាមកលេងទីក្រុងដើម្បីឲ្យប្រជាពលរដ្ឋចេះការពារខ្លួននៅពេលរួមភេទជាមួយស្ត្រីរកស៊ីផ្លូវភេទ ក៏ដូចជាការពារក្រុមគ្រួសារដែលនៅឯស្រុកផងដែរ។
លោក សួរ ឌីណា មានប្រសាសន៍ដូច្នេះថា ៖ «ធម្មតា យើងមានការអប់រំហើយនៅតាមស្រុកភូមិរបស់គាត់ ប៉ុន្តែថ្ងៃនេះជាថ្ងៃដែលមានមនុស្សមកច្រើនបំផុត អ៊ីចឹង ក្រុមគោលដៅយើងមកច្រើនក្នុងថ្ងៃនេះ ដូច្នេះយើងឆ្លៀតឱកាសក្នុងពេលនេះដើម្បីធ្វើការអប់រំ»។
លោក សួរ ឌីណា បានឲ្យដឹងផងដែរថា រហូតមកទល់នឹងពេលនេះ ការយល់ដឹងរបស់ប្រជាពលរដ្ឋអំពីមេរោគអេដស៍មានការកើនឡើង តែថា បញ្ហាដែលគួរឲ្យព្រួយបារម្ភចំពោះការឆ្លងមេរោគអេដស៍ គឺគូសង្សាមានការទុកចិត្តគ្នាខ្លាំងពេក ហើយសម្រេចរួមភេទ ដោយមិនបានប្រើប្រាស់ស្រោមអនាម័យនិងភាពអៀនខ្មាស់មិនហ៊ានប្រើប្រាស់ស្រោមអនាម័យជាដើម។
លោក សួរ ឌីណា បានឲ្យដឹងបន្ថែមទៀតថា ក្នុងឱកាសបុណ្យអុំទូក អង្គការ PSI បានចែកចាយស្រោមអនាម័យដោយឥតគិតថ្លៃ ចំនួន ២៥ម៉ឺនស្រោម ហើយលក់ស្រោមអនាម័យក្នុងមួយប្រអប់ ៥០០រៀល។ លោកបានបន្តថា ក្នុងថ្ងៃទី១ នៃបុណ្យអុំទូក អង្គការ PSI លក់ដាច់ស្រោមអនាម័យចំនួនប្រមាណ ២៥.០០០ស្រោម ហើយថា គម្រោងលក់ស្រោមអនាម័យក្នុងរយៈពេលបីថ្ងៃគឺ ៨ម៉ឺនស្រោម។
ស្នងការនគរបាលរាជធានីភ្នំពេញ លោក ទូច ណារ៉ុថ បានឲ្យដឹងថា ក្រុមនគរបាលរបស់លោកនិងអាជ្ញាធរមូលដ្ឋានបានធ្វើការទប់ស្កាត់មិនឲ្យមានការរកស៊ីផ្លូវភេទឡើយ ដើម្បីទប់ស្កាត់កុំឲ្យមានការឆ្លងមេរោគអេដស៍។
បុរសម្នាក់ដែលបានមកលេងបុណ្យអុំទូក បាននិយាយថា លោកបានទិញស្រោមអនាម័យដើម្បីទុកការពារខ្លួនកុំឲ្យឆ្លងមេរោគអេដស៍ ៖ «ពេលណាយើងចង់បណ្ដោះអាសន្នម្ដងម្កាលអី យើងការពារជំងឺ ជំងឺកាមរោគគ្រប់ប្រភេទ ជំងឺអេដស៍ធ្ងន់ជាងគេ។ មិនខ្លាចអេដស៍យ៉ាងម៉េចនឹងកើត ស្លាប់ទៅបានអ្នកណាចិញ្ចឹមប្រពន្ធកូន អនាគតយើងទៅមុខទៀត យើងអាចរកស៊ីដើម្បីជីវិតខ្លួនយើង ដើម្បីកូនប្រពន្ធ»។
គួរជម្រាបថា បើតាមអង្គការដែលធ្វើការទាក់ទងនឹងការទប់ស្កាត់មេរោគអេដស៍បានឲ្យដឹងថា នៅក្នុងប្រទេសកម្ពុជាសព្វថ្ងៃ មានអ្នកផ្ទុកមេរោគអេដស៍ ជំងឺអេដស៍ ចំនួន ៦៧.២០០នាក់ ដែលក្នុងនោះមានមនុស្ស ២៥.៣៥៣នាក់ កំពុងទទួលបានសេវាផ្ដល់ថ្នាំពន្យារ៕