ជាយុទ្ធនាការហែក្បួនទ្រង់ទ្រាយធំលើកដំបូងបំផុតបន្ទាប់ពីក្រសួងមហាផ្ទៃនៃប្រទេសកម្ពុជាជាបានអនុញ្ញាតជាផ្លូវការកាលពីថ្ងៃទី២២ តុលា ដោយឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង។
ពិធីនេះសម្របសម្រួលដោយសមាគមអាដហុកខេត្តរតនគិរី មានប្រជាពលរដ្ឋមកពីស្រុកទាំង៩ក្នុងខេត្តចូលរួម ហើយគេសង្កេតឃើញមិនមានមន្ត្រីថ្នាក់ដឹកនាំខេត្តនិងស្ថាប័នមន្ទីរនានាក្នុងខេត្តចូលរួមទេ ក៏ប៉ុន្តែសមត្ថកិច្ចប៉ូលិសនិងកងរាជអាវុធហត្ថត្រូវបានដាក់ពង្រាយតាមផ្លូវសំខាន់ៗដើម្បីរៀបចំសណ្តាប់ធ្នាប់និងការពារសុវត្ថិភាពសន្តិសុខដល់ពិធីហែក្បួន។
តំណាងប្រជាសហគមន៍ជនជាតិដើមមកពីបណ្តាស្រុកនានាបានថ្លែងទាមទារដូចៗគ្នាថា ៖ «ព្រៃឈើ កាប់ឈើប្រណីតល្អៗ គេបំផ្លាញអស់ហើយ សូមអភិបាលស្រុក អភិបាលខេត្ត តុលាការខេត្ត ស្នងការខេត្ត ប៉ូលិស ទាហាន មេព្រៃ សូមជួយបង្រ្កាបជាបន្ទាន់។ អ្នកភូមិ អ្នកឃុំ អត់ដោះស្រាយចំពោះប្រជាពលរដ្ឋទេ ពីព្រោះមានតែផ្ទាល់ខ្លួន ខ្លួនឯង។ សម្ដេចនាយករដ្ឋមន្រ្តី ហ៊ុន សែន ជួយ»។
អ្នកចូលរួមពិធីហែក្បួនប្រដាប់ដោយផ្ទាំងបដាពាក្យស្លោកគាំទ្រគោលនយោបាយប្រមុខរាជរដ្ឋាភិបាលប្រឆាំងបុគ្គលជាមន្ត្រីពុករលួយបំផ្លាញផលប្រយោជន៍ជាតិនិងសង្គម ស្រែកទាមទារតាមឧគ្ឃោសនសព្ទនាំមុខដោយវង់ឆៃយ៉ាំច្រៀងរិះគន់ជនកាប់បំផ្លាញព្រៃឈើ និងអត្ថន័យលើកកម្ពស់តម្លៃការពារធនធានធម្មជាតិនិងទ្រពសម្បតិ្តជាតិ ដង្ហែពីមុខស្នាក់ការសមាគមអាដហុកកាត់តាមដងផ្លូវនៃសាលាខេត្ត មន្ទីរស្ថាប័នសំខាន់ៗនានា ហើយធ្វើដំណើរឆ្ពោះមកកាន់ទីស្នាក់ការសមាគមអាដហុកវិញ ក្រោមការឃ្លាំមើលរបស់មន្រ្តីការិយាល័យអង្គការសហប្រជាជាតិទទួលបន្ទុកសិទ្ធិមនុស្សប្រចាំប្រទេសកម្ពុជា។
មេឃុំតឺន លោក ចា ម៉ូវផាង ដែលបានចូលរួមពិធីហែក្បួននេះបញ្ជាក់ ៖ «ដោយសារគេមានអំណាច មានលុយមានកាក់ មានស័ក្តិ»។
ចំណែកអតីតអភិបាលរងស្រុកបរកែវ លោក ហ៊ូ លី មានប្រសាសន៍ដែរថា ៖ «ចំណែកនៃការកាប់បំផ្លាញរាត្រី និងយកព្រៃឈើនៃប្រជាពលរដ្ឋដោយបន្លំនិងកេងប្រវ័ញ្ច»។
មន្ត្រីសម្របសម្រួលពិធីហែក្បួន លោក ប៉ែន ប៊ុណ្ណារ៍ មានប្រសាសន៍បញ្ជាក់ថា ៖ «បើមិនមានការដោះស្រាយជាបន្ទាន់ទេ យើងខ្ញុំនឹងទាមទារធ្វើយុទ្ធនាការលើកទី៤បន្តទៀត»។
ពុំមានសកម្មភាពអសណ្តាប់ធ្នាប់តាមផ្លូវសាធារណៈ ឬបាតុភាពអ្វីកើតមានក្នុងអំឡុងយុទ្ធនាការហែក្បួននោះទេ ក៏ប៉ុន្តែអ្នកភូមិនិយាយថា ប៉ូលិសចរាចរណ៍បានរំខានការធ្វើដំណើរដោយធ្វើការផាកពិន័យមធ្យោបាយយានយន្តរបស់អ្នកភូមិ ធ្វើឲ្យអ្នកភូមិមួយចំនួនបង្ខំចិត្តបោះបង់ឱកាសហើយត្រឡប់ក្រោយទៅកាន់លំនៅឋានវិញ៕