មុខសញ្ញាដែលគេតម្រូវឲ្យប្រកាសទ្រព្យសម្បត្តិនោះ មានចំនួនប្រមាណជាង ១០ម៉ឺននាក់នៅក្នុងប្រទេសកម្ពុជា ក្នុងនោះរួមមានមន្រ្តីរាជការស៊ីវិល យោធា និងមន្ត្រីនគរបាល ដែលត្រូវបានតែងតាំងដោយព្រះរាជក្រឹត្យ និងអនុក្រឹត្យ តំណាងរាស្ត្រទាំងអស់ សមាជិកទាំងអស់នៃព្រឹទ្ធសភា មេដឹកនាំអង្គការសង្គមស៊ីវិលនានា ក្រុមហ៊ុនឯកជនធំៗ មន្ត្រីជាន់ខ្ពស់ និងមេដឹកនាំរដ្ឋាភិបាល ព្រមទាំងមន្ត្រី និងសមាជិកនៃស្ថាប័នប្រឆាំងអំពើពុករលួយផងដែរ។
ការប្រកាសនេះ គេតម្រូវឲ្យធ្វើរៀងរាល់ ២ឆ្នាំម្ដងៗ ដោយលាយលក្ខណ៍អក្សរ និងឲ្យប្រកាសនៅមុនពេលចូលកាន់តំណែង និងក្រោយពេលចេញពីតំណែង។ ប៉ុន្តែការប្រកាសនោះគឺឲ្យធ្វើដោយសម្ងាត់។
ប្រធានអង្គភាពប្រឆាំងអំពើពុករលួយ និងជាសមាជិកក្រុមប្រឹក្សាជាតិប្រឆាំងអំពើពុករលួយ លោក ឱម យ៉ិនទៀង បានមានប្រសាសន៍នៅក្នុងសន្និសីទកាសែតនៅថ្ងៃទី១៤ ខែកក្កដានេះ ថា លោកសុំឲ្យមានការចូលរួមពីមហាជនក្នុងការប្រឆាំងអំពើពុករលួយនេះ។
លោក ឱម យ៉ិនទៀង បានបញ្ជាក់ថា ៖ «យើងអាចបែងចែកការប្រកាសហ្នឹង មានចំណុចពិសេសខុសៗគ្នា ៣យ៉ាង។ ទី១ ប្រកាសលើកទី១ ក្នុងពេលដែលច្បាប់យើងបានអនុម័តហើយ។ ទី២ ការប្រកាសលើកទី១ នៅពេលដែលគាត់ចូលកាន់ការងារ បានន័យថា អ្នកចូល និងអ្នកចេញពីការងារ ត្រូវមានការប្រកាសទ្រព្យសម្បត្តិដែរ»។
លោកបានឲ្យដឹងថា លោកកំពុងតែរៀបចំឲ្យមានប្រព័ន្ធទទួលពាក្យបណ្ដឹងប្រឆាំងអំពើពុករលួយតាមរយៈប្រអប់សំបុត្រ ទូរស័ព្ទប្រចាំការ ២៤ម៉ោង ប្រព័ន្ធអ៊ីម៉េល និងទូរសារជាដើម។
លោកស្រី មូរ សុខហួរ តំណាងរាស្ត្រគណបក្ស សម រង្ស៊ី បានមានប្រសាសន៍ប្រតិកម្មថា ៖ «ប្រកាសគឺត្រូវតែប្រកាសជាចំហ។ ប្រកាសជាចំហ គឺដើម្បីឲ្យសាធារណជនលោកជ្រាប ហើយឲ្យលោកតាមដាន»។
ប្រធានប្រតិបត្តិគម្រោងអ្នកការពារក្តីកម្ពុជា លោក សុក សំអឿន ដែលបានតាមដានស្ថានការណ៍ប្រឆាំងអំពើពុករលួយកន្លងមក បានមានប្រសាសន៍ថា លោកត្រៀមខ្លួនរួចហើយក្នុងការប្រកាសទ្រព្យសម្បត្តិ ប៉ុន្តែលោកនៅមានការមន្ទិលអំពីប្រសិទ្ធភាពនៃការប្រកាសទ្រព្យសម្បត្តិនេះ ៖ «រឿងបញ្ហាទុកចិត្ត មិនទុកចិត្ត គឺថា មិនទាន់ថាយ៉ាងម៉េចទេ! យើងចាំមើលសិនណា៎!»។
សភាជាតិកម្ពុជាបានអនុម័តសេចក្ដីព្រាងច្បាប់ប្រឆាំងអំពើពុករលួយ កាលពីថៃ្ងទី១០ និងទី១១ ខែមីនាកន្លងទៅនេះ គឺមាន ៥៧មាត្រា និង ៩ជំពូក។ ច្បាប់នេះបានចូលជាធរមានហើយ ក្រោយពីព្រះមហាក្សត្រ ព្រះបាទ ព្រះបរមនាថ នរោត្តម សីហមុនី បានឡាយព្រះហស្តលេខានៅប៉ុន្មានខែមុននេះ។ ច្បាប់នេះផ្ដន្ទាទោសឲ្យជាប់គុកពី ៧ថៃ្ង ទៅ ៥ឆ្នាំ សម្រាប់អំពើពុករលួយតិចតួច និងផ្ដន្ទាទោសឲ្យជាប់គុកពី ៥ឆ្នាំ ទៅ ១៧ឆ្នាំ ឬមួយជីវិត សម្រាប់អំពើពុករលួយធ្ងន់ធ្ងរ។
មន្រ្តីស៊ើបអង្កេតប្រឆាំងអំពើពុករលួយមកពីទីក្រុងហុងកុង ឈ្មោះ តូនី (Tony) ដែលមានបទពិសោធន៍ ១៧ឆ្នាំ ហើយមកបណ្ដុះបណ្ដាលមន្រ្តីជំនាញប្រឆាំងអំពើពុករលួយនៅកម្ពុជា បានមានប្រសាសន៍ថា ៖ «ការប្រឆាំងអំពើពុករលួយទទួលជោគជ័យទៅបាន គឺដោយសារមានការចូលរួមពីមហាជន និងអ្នកសារព័ត៌មាន ដែលមើលឃើញមន្ត្រីណាម្នាក់ជិះឡានទំនើបៗ និងថ្លៃៗ និងមានលុយចាយសម្បើម រស់នៅហ៊ឺហា គេត្រូវតែរាយការណ៍ព័ត៌មាននេះមកអង្គភាពប្រឆាំងអំពើពុករលួយដើម្បីតាមដាន»។
អង្គភាពប្រឆាំងអំពើពុករលួយ និងទីភ្នាក់ងារអភិវឌ្ឍន៍អន្តរជាតិរបស់សហរដ្ឋអាមេរិក (USAID) បានបញ្ចប់ការបណ្ដុះបណ្ដាលចំនួន ៥វគ្គ ដល់មន្ត្រីប្រឆាំងអំពើពុករលួយចំនួន ១០០នាក់កាលពីថ្មីៗនេះ ដែលបានផ្ដោតលើជំនាញស្ទង់មតិមហាជន រៀបចំបញ្ជីប្រកាសទ្រព្យសម្បត្តិ ជំនាញស៊ើបអង្កេត ជំនាញគ្រប់គ្រង រៀបចំពាក្យបណ្ដឹង និងរៀបចំផែនការយុទ្ធសាស្ត្រប្រឆាំងអំពើពុករលួយ។ គ្រូដែលមកបណ្ដុះបណ្ដាលនោះមកពីក្រុងហុងកុង សហរដ្ឋអាមេរិក និងប្រទេសសិង្ហបុរីជាដើម៕