ការរង់ចាំចម្លើយឆ្លើយតបនោះ ក្រោយពេលដែលពួកគេបានផ្ញើលិខិតទៅប្រមុខនៃស្ថាប័នទាំងពីរខាងលើនៅមុនពេលចូលឆ្នាំខែ្មរ ប៉ុន្តែ មកទល់ពេលនេះ ពួកគេនៅមិនទាន់បានទទួលចម្លើយណាមួយនៅឡើយទេ ។ ហើយយុទ្ធនាការប្រមូលស្នាមផ្តិតមេដៃមានរយៈពេល ៥ខែ ចាប់ពីខែធ្នូ ឆ្នាំ២០០៧ មកនោះ បានឈានដល់ទីបញ្ចប់ហើយ នៅថៃ្ងពុធនេះ ។
លោក យង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាពនៅកម្ពុជានៅក្នុងចំណោមអង្គការសំខាន់ៗ ចំនួន១១ ដែលបានចូលរួមសកម្មក្នុងយុទ្ធនាការរយៈពេល ៥ខែនោះ បានមានប្រសាសន៍ប្រាប់វិទ្យុអាស៊ីសេរីថា ៖ «អ្វីដែលយើងចង់បានគឺជួបនៅក្នុងដើមខែ ៥ នេះ បើសិនជាខាងសភាឆ្លើយតបមុនថា ឲ្យយើងយកទៅជូនមុន យើងនឹងនាំយកទៅជូនសភាមុន បើខាងរដ្ឋាភិបាលឆ្លើយតបមុន យើងយកទៅជូនរដ្ឋាភិបាលមុន» ។
លោកបានបញ្ជាក់ឲ្យដឹងថា ស្នាមផ្តិតមេដៃដែលប្រមូលបានពីប្រជាពលរដ្ឋគឺមានចំនួនសរុប ១លាន ៧ម៉ឺននាក់ ដោយបានបូករួមជាមួយស្នាមផ្តិតមេដៃ៣សែននាក់ ប្រមូលបានកាលពីឆ្នាំ២០០៦ កន្លងទៅ ។
មិនអាចទាក់ទងសុំសេចក្តីប្រតិកម្មបានភ្លាមៗទេ ពីមន្រ្តីតំណាងឲ្យសភាជាតិជុំវិញគម្រោងដាក់ញតិ្តនោះ ប៉ុន្តែលោក ខៀវ កាញារីទ្ធ មន្រ្តីអ្នកនាំពាក្យរបស់រដ្ឋាភិបាលកម្ពុជា បានមានប្រសាសន៍ប្រតិកម្មប្រាប់វិទ្យុអាស៊ីសេរីថា ៖ «ពីព្រោះឥឡូវហ្នឹងសភាគេចប់ហើយ ហើយទីពីរសេចក្ដីព្រាងច្បាប់ប្រឆាំងអំពើពុករលួយមានហើយ តើមានបានឲ្យយោបល់ថា តើគួរកែកន្លែងណាទេ ? រួចឆ្នាំទៅមិនក៏មិនធ្វើ ម៉េចក៏មកធ្វើឆ្នាំហ្នឹង ?» ។
ទាក់ទងនឹងអំពើពុករលួយនៅក្នុងប្រទេសកម្ពុជា លោក យង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាពនៅកម្ពុជា បានមានប្រសាសន៍ថា ផែ្អកតាមការស្រាវជ្រាវនានារបស់អង្គការ USAID អង្គការ CSD អង្គការតម្លាភាពអន្តរជាតិនិងវិទ្យាស្ថានសេដ្ឋកិច្ចកម្ពុជា កាលពីឆ្នាំ២០០៥ និងឆ្នាំ២០០៦ កន្លងទៅ អង្គការទាំងនេះបានរកឃើញថា នៅក្នុងប្រទេសកម្ពុជាបានបាត់បង់ប្រាក់ចំណូលចូលថវិការដ្ឋដោយសារអំពើពុករលួយ មានចំនួនរវាង ៤០០ ទៅ ៥០០ លានដុល្លារអាមេរិកក្នុងមួយឆ្នាំៗ ។
ប្រភពពីតំណាងអង្គការក្រៅរដ្ឋាភិបាលក្នុងប្រទេសកម្ពុជាប្រឆាំងអំពើពុករលួយនោះ បានធ្វើការរិះគន់ថា រដ្ឋាភិបាលកម្ពុជាបានសន្យាធ្វើសេចក្តីព្រាងច្បាប់ប្រឆាំងអំពើពុករលួយនោះ រយៈពេល ១៤ឆ្នាំមកហើយ ចាប់តាំងពីឆ្នាំ១៩៩៤ មកម្ល៉េះ ប៉ុន្តែសេចក្តីព្រាងច្បាប់ប្រឆាំងអំពើពុករលួយនោះ កំពុងស្ថិតក្នុងដៃរបស់រដ្ឋាភិបាលជាដដែល រហូតមកដល់ពេលនេះ ។
សូមរំឭកថា យុទ្ធនាការប្រមូលស្នាមផ្ដិតមេដៃជំរុញឲ្យរដ្ឋាភិបាលកម្ពុជាធ្វើសេចក្ដីព្រាងច្បាប់ ប្រឆាំងអំពើពុករលួយនោះឲ្យបានឆាប់ ។ យុទ្ធនាការនោះធ្លាប់បានចូលរួមបើកសម្ពោធដោយលោក Joseph Mussomeli ឯកអគ្គរដ្ឋទូតអាមេរិកនៅកម្ពុជា នៅក្នុងខេត្តក្រចេះ កាលពីចុងខែកុម្ភៈ ឆ្នាំ២០០៨ កន្លងទៅនេះ ៕