ប្រជាពលរដ្ឋដែលនៅរស់នៅភូមិបូស្ស ក្នុងចំណោមភូមិ៣ផ្សេងទៀត ដែលស្ថិតនៅក្នុងការបណ្ដេញចេញបាននិយាយកាលពីរសៀល ថ្ងៃអង្គារ ទី១៣ ខែឧសភា ថា អភិបាលរងខេត្តឧត្ដរមានជ័យ លោក សាន វណ្ណា បានចេញសេចក្ដីជូនដំណឹងមួយ ទុករយៈពេល ១០ថ្ងៃ ឲ្យអ្នកភូមិទាំងនោះចាកចេញ ក៏ប៉ុន្តែពួកគេបានបដិសេធ ដោយថា ពួកគេមានប័ណ្ណកម្មសិទ្ធិកាន់កាប់លើដីទាំងនោះស្របច្បាប់ ៖ «ខ្ញុំមានប្លង់កាន់កាប់ ៥ឆ្នាំមកហើយ ឥឡូវគេដាក់សេចក្ដីជូនដំណឹងដេញប្រជាពលរដ្ឋចាកចេញពីលំនៅ ខ្ញុំអត់សុខចិត្តទេ មិនព្រមចាកចេញទេ» ។
ទោះយ៉ាងណាមិនអាចស្វែងរកការជួបបំភ្លឺពីអភិបាលរង ខេត្តឧត្ដរមានជ័យ លោក សាន វណ្ណា បានទេ ប៉ុន្តែអភិបាលខេត្តឧត្ដរមានជ័យ លោក ប៉ិច សុឃិន បានបដិសេធចោលចំពោះការប្រើពាក្យថា អាជ្ញាធរបានបណ្ដេញអ្នកភូមិទាំងនោះ ។
លោក ប៉ិច សុឃិន បានមានប្រសាសន៍ថា អាជ្ញាធរមិនបានបណ្ដេញប្រជាពលរដ្ឋដែលមានលំនៅ និងមានដំណាំលើដីជាយូរមកហើយនោះទេ ប៉ុន្តែនឹងបណ្ដេញប្រជាពលរដ្ឋជាង ៦០គ្រួសារ ដែលបានមកចាប់យកដីព្រៃនិងដីសម្បទានរបស់ក្រុមហ៊ុន ៖ «អត់មានដេញទេ ប្រជាជនគេរស់នៅមានដើមស្វាយដើមដូង អ្នកណាទៅដេញទៀតនោះ បើដេញ ដេញអ្នកទៅកាប់ព្រៃយកដីរបស់រដ្ឋ ជួនកាលប៉ះដីក្រុមហ៊ុនអ៊ីចឹង» ។
មន្រ្តីដដែលបញ្ជាក់ថា ទោះយ៉ាងណាការបណ្ដេញនោះ មានគោលនយោបាយទូទាត់សំណង ដោយមានដីផ្សេងឲ្យទៅរស់នៅ ។
យោងតាមសេចក្ដីជូនដំណឹងមួយរបស់អភិបាលរងខេត្តឧត្ដរមានជ័យ លោក សាន វណ្ណា ចុះថ្ងៃទី ៦ ខែឧសភា ដែលអង្គការសិទ្ធិមនុស្សក្រៅរដ្ឋាភិបាលទទួលបានឲ្យដឹងថា អាជ្ញាធរបានប្រាប់ឲ្យប្រជាពលរដ្ឋនៅភូមិបូស្ស ភូមិតាំមាណ ភូមិគោកផ្លុក និងភូមិបាក់នឹម ត្រូវរុះរើលំនៅរបស់ខ្លួនចាកចេញក្នុងរយៈពេល ១០ថ្ងៃ ចាប់ពីថ្ងៃទី ៧ រហូតដល់ថ្ងៃទី ១៧ ខែឧសភា ដោយចាត់ទុកប្រជាពលរដ្ឋទាំងនោះថា បានសង់លំនៅនៅលើដីរដ្ឋខុសច្បាប់ ។
អ្នកសម្របសម្រួលសមាគមការពារសិទ្ធិមនុស្សអាដហុក ខេត្តឧត្ដរមានជ័យ លោក ស្រី ណារ៉េន បានសម្ដែងការព្រួយបារម្ភចំពោះការចាត់វិធានការបណ្ដេញនោះ ដោយលោកបានរកឃើញថា ប្រជាពលរដ្ឋខ្លះមានប័ណ្ណកាន់កាប់ដីតាំងតែពីឆ្នាំ២០០០ មកម៉្លេះ។
លោក ស្រី ណារ៉េន មានប្រសាសន៍ដូច្នេះថា ៖ «រដ្ឋាភិបាលសម្បទានដីសេដ្ឋកិច្ចឲ្យក្រុមហ៊ុនវាប៉ះពាល់ ហើយបើសិនណាក្រុមហ៊ុនមិនដោះស្រាយទេ ធ្វើឲ្យគាត់បាត់បង់ស្រែចម្ការរបស់គាត់ ហើយក៏បាត់បង់ជីវភាពរបស់គាត់ កាន់តែធ្លាក់ចុះទៅ ។ សុំឲ្យធ្វើម៉េចឲ្យមានការដោះស្រាយបានទាន់ពេលវេលា ព្រោះរដូវគាត់ធ្វើស្រែចម្ការមកដល់ហើយ» ។
សូមរំឭកថា ចាប់តាំងតែពីអំឡុងខែកុម្ភៈ ឆ្នាំនេះ ក្រុមប្រជាពលរដ្ឋជាច្រើនភូមិ នៅឃុំកូនក្រៀល បានលើកគ្នាតវ៉ាប្រឆាំងជាមួយអាជ្ញាធរជាច្រើនលើកមកហើយ បន្ទាប់ពីក្រុមហ៊ុន Angkor Sugar បានចាប់ឈូសឆាយចូលដីស្រែកសិករដើម្បីពង្រីកយកផ្ទៃដីដាំអំពៅ និងសង់រោងចក្រស្ករមក ៕