សេចក្ដីប្រកាសព័ត៌មាននេះ ធ្វើឡើងបន្ទាប់ពីក្រុមគ្រូពេទ្យជំនាញបានរកឃើញថា មានកុមារីពីរនាក់នៅខេត្តកំពង់ស្ពឺ និងខេត្តកំពត បានស្លាប់ដោយជំងឺផ្ដាសាយបក្សី ត្រឹមអំឡុងខែមករា ដើមឆ្នាំ២០១៣ នេះ។
មន្ត្រីនៃក្រសួងសុខាភិបាលឲ្យដឹងថា នៅពេលនេះគេកំពុងជំរុញការអប់រំនៅតាមមណ្ឌលសុខភាព និងនៅតាមសហគមន៍មូលដ្ឋានឲ្យដឹងពីរោគសញ្ញា និងពីវិធីការពារនៃជំងឺផ្ដាសាយបក្សី ប្រភេទ H5N1 ដែលជំងឺនេះកំពុងរីករាលដាល។
លោក លី សូវ៉ាន់ អនុប្រធាននាយកដ្ឋានជំងឺឆ្លងនៃក្រសួងសុខាភិបាល មានប្រសាសន៍នៅថ្ងៃទី២៩ មករា ថា ក្រោយពីរកឃើញមានអ្នកស្លាប់ និងឆ្លងដោយជំងឺផ្ដាសាយបក្សីប្រភេទ H5N1 នេះ បានកើនឡើងប្រមាណ ៥ករណី ក្នុងខេត្តក្រុងចំនួន ៤ ដូចជាខេត្តកំពង់ស្ពឺ កំពត តាកែវ និងរាជធានីភ្នំពេញ។
លោកបន្តថា នៅពេលនេះ ក្រសួងបានចេញគោលការណ៍ឲ្យមន្ត្រីជំនាញនៅតាមមន្ទីរសុខាភិបាល មណ្ឌលសុខភាព ត្រូវពង្រឹងការតាមដានឲ្យបានដិតដល់ និងពិនិត្យរោគសញ្ញាណាដែលមានការសង្ស័យត្រូវបញ្ជូនមកមណ្ឌលសុខភាព ដើម្បីសង្គ្រោះបន្ទាន់។
លោក លី សូវ៉ាន់៖ «ហើយចំពោះមូលដ្ឋានវិញ គឺយើងចុះអប់រំប្រជាពលរដ្ឋដើម្បីកុំឲ្យយក មាន់ ទា ឈឺងាប់ហ្នឹងយកមករៀបចំជាអាហារ និងទីពីរ គឺឲ្យមន្ត្រីរបស់យើងហ្នឹងរុករកអ្នកដែលប៉ះពាល់ផ្ទាល់ជាមួយអ្នកជំងឺ ឬមួយក៏រស់នៅក្នុងភូមិហ្នឹង ដើម្បីយកវត្ថុធាតុយកមកពិនិត្យមើល។ បើសិនជាគាត់មានវិជ្ជមាន យើងត្រូវព្យាបាលគាត់ជាបន្ទាន់បាទ!»។
លោក លី សូវ៉ាន់ ឲ្យដឹងថា ការបន្តវាយលុកនៃជំងឺផ្ដាសាយបក្សី ប្រភេទ H5N1 នេះ បានបង្កើនការព្រួយបារម្ភយ៉ាងខ្លាំង ដែលទាមទារឲ្យមានការយកចិត្តទុកដាក់លើផ្នែកនេះ។ បើតាមលោក លី សូវ៉ាន់ ចំនួនអ្នកស្លាប់ ២នាក់បន្ថែមទៀត ដោយជំងឺនេះក្នុងខេត្តកំពត និងខេត្តកំពង់ស្ពឺ កាលពីថ្ងៃទី២៨ មករា បានបណ្ដាលឲ្យអ្នកស្លាប់ដោយជំងឺផ្ដាសាយបក្សី H5N1នេះ កើនឡើងរហូតដល់ ៤នាក់ ខណៈទារកអាយុ ៨ខែ នៅរាជធានីភ្នំពេញ ត្រូវបានក្រុមគ្រូពេទ្យជួយសង្គ្រោះទាន់ពេលវេលា។
អនុប្រធាននាយកដ្ឋានជំងឺឆ្លងនៃក្រសួងសុខាភិបាលលោក លី សូវ៉ាន់ មានប្រសាសន៍ថា រោគសញ្ញានៃការឆ្លងប្រភេទជំងឺផ្ដាសាយបក្សីនេះ ត្រូវគេរកឃើញថា កើតឡើងទៅលើកុមារដែលប៉ះពាល់ មាន់ ឬ ទា កំពុងមានជំងឺ ឬ ស្លាប់។
លោកបន្តថា អាការរោគដែលសង្ស័យថា ជាប្រភេទជំងឺផ្ដាសាយបក្សីនេះ គឺអ្នកជំងឺមានអាការៈ ក្អក ឈឺក ហត់ គ្រុនក្ដៅឡើងលើស ៣៨អង្សា និងធ្លាប់មានប្រវត្តិប៉ះពាល់បក្សីក្នុងអំឡុងពេល ៧ថ្ងៃមុន នឹងត្រូវមានរោគសង្ស័យនេះកើតឡើង។
លោកបន្តថា៖ «ដូចខ្ញុំនិយាយអម្បាញ់មិញ ប្រភពចម្លងគឺចេញមកពីសត្វបក្សី។ ដូច្នេះមានតែវិធីទីមួយ គឺ មាន់ ទា ឈឺ ដែលខុសធម្មតា សូមឲ្យគាត់រាយការណ៍ជាបន្ទាន់ដល់អ្នកស្ម័គ្រភូមិ ឬមួយអាជ្ញាធរដែនដីដើម្បីយើងចាត់វិធានការកម្ទេចចោល ដើម្បីកុំឲ្យរីករាលដាលដល់បក្សីដទៃទៀត»។
សេចក្ដីប្រកាសព័ត៌មានរួមគ្នារបស់ក្រសួងសុខាភិបាល និងអង្គការសុខភាពពិភពលោក (World Health Organization) ដែលត្រូវបានផ្សព្វផ្សាយជាសាធារណៈ នៅថ្ងៃទី២៩ មករា ឲ្យដឹងថា ការស្លាប់កុមារីអាយុ ៩ឆ្នាំ នៅខេត្តកំពត កាលពីថ្ងៃទី២៨ មករា គឺជាករណីទី២៦ នៅក្នុងប្រទេសកម្ពុជា ដែលបានឆ្លងជំងឺផ្ដាសាយបក្សី និងជាមនុស្សទី៥ ក្នុងឆ្នាំ២០១៣ នេះ ហើយក៏ជាករណីទី២៣ ដែលស្លាប់ដោយសារជំងឺនេះ។
សេចក្ដីប្រកាសព័ត៌មានឲ្យដឹងទៀតថា ១៧ករណី ក្នុងចំណោមករណីផ្ដាសាយបក្សីទាំង ២៦ ដែលកើតឡើងក្នុងប្រទេសកម្ពុជា គឺកើតលើកុមារអាយុក្រោម ១៤ឆ្នាំ និង ១៧ករណីក្នុងចំណោមជំងឺផ្ដាសាយបក្សីទាំង ២៦ករណី គឺជានារី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។