កីឡាករមួយរូបមកពីខេត្តបន្ទាយមានជ័យដែលសម្រាកតាមមាត់ទន្លេសាប និងជាប្រធានគណៈកម្មការទូកង ឈ្មោះ សុវណ្ណរាជសីហ៍ បារមីមហានគរ របស់វត្តកួយម៉េង ស្រុកមង្គលបុរី លោក កុល បណ្តូល ថ្លែងថា ខេត្តបន្ទាយមានជ័យមានទូកង៣គ្រឿងមកចូលរួមប្រណាំងក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែនិងអកអំបុកនេះ។
លោកថា ក្នុងទូកមួយៗចំណុះកីឡាករជាង៧០នាក់ ហើយទូកសុវណ្ណរាជសីហ៍បារមីមហានគរនេះបានឈ្នះរង្វាន់លេខ១កាលពីឆ្នាំ២០០៨ និងឈ្នះការប្រណាំងនៅក្នុងខេត្តបាត់ដំបងផងដែរកាលពីខែមុន។
លោក កុល បណ្ដូល បានបញ្ជាក់ថា ៖ «ជាទូទៅខ្ញុំគិតជាមនុស្ស ក្នុងមួយថ្ងៃម្នាក់ត្រូវចំណាយអង្ករអស់៨ខាំ ហើយថវិកាត្រូវចំណាយក្នុងមួយថ្ងៃគឺ៧០ម៉ឺន(រៀល)»។
លោក កុល បណ្តូល បានឲ្យដឹងថា ដោយសារតែមានការប្រកាសឲ្យប្រយ័ត្ន និងត្រូវចេះការពារជំងឺផ្តាសាយប្រភេទថ្មី A(H1N1) អាជ្ញាធរខេត្តបានឲ្យមន្រ្តីសុខាភិបាលម្នាក់មកជាមួយក្រុមកីឡាករដើម្បីជួយព្យាបាលជំងឺ។
ក្រុមកីឡាករទូកងឈ្មោះ សុវណ្ណរាជសីហ៍ បារមីមហានគរ បានឲ្យដឹងថា ពួកគាត់មុននឹងមកចូលរួមប្រណាំងទូកក្នុងពិធីបុណ្យអុំទូកនេះ ក្រុមគ្រូពេទ្យនិងអាជ្ញាធរមូលដ្ឋានប្រាប់ពីវិធីការពារជំងឺផ្តាសាយប្រភេទថ្មី A(H1N1) ផង និងការពារខ្លួនពីជំងឺអេដស៍ផង ៖ «ជំងឺផ្ដាសាយជ្រូកនេះវាឆ្លងពីម្នាក់ទៅម្នាក់បាន ដោយសារការហូបចុករស់នៅជុំគ្នា។ ពេលដេកពេលអីយើងត្រូវលាងដៃនឹងសាប៊ូ ហើយទៅត្រង់ណា យើងត្រូវប្រើម៉ាសការពារខ្លួន»។
ប្រធានក្រុមកីឡាករទូកង លោក កុល វណ្ណា បានអះអាងថា ក្រៅពីឲ្យកីឡាករចេះការពារជំងឺអេដស៍និងជំងឺផ្តាសាយប្រភេទថ្មី A(H1N1) លោកក៏មិនបណ្តោយឲ្យក្រុមកីឡាករទទួលទានទឹកឆៅនិងចុះងូតទឹកទន្លេនេះដែរ ខ្លាចចាញ់ទឹកចាញ់ដី។
លោក កុល វណ្ណា បានអះអាងថា ៖ «ពេលការប្រកួត វាមានការនឿយហត់ ឬក៏មានការស្ទះមានអី គឺថា សុំឲ្យពេទ្យទៅជួយយើងខ្ញុំឲ្យបានដិតដល់»។
នៅមិនឆ្ងាយពីនោះ ក្រុមកីឡាករប្រណាំងទូកមកពីខេត្តពោធិ៍សាត់ទើបបានមកដល់ ពួកគាត់មិនទាន់ទទួលបានការអប់រំឲ្យចេះការពារជំងឺផ្តាសាយប្រភេទថ្មីឡើយ។
ដោយឡែកមានការចងបដាសម្រាប់កំណត់ទីតាំងសម្រាករបស់ក្រុមកីឡាករខ្មែរកម្ពុជាក្រោមដែរនៅឆ្នាំនេះ ប៉ុន្តែអ្នកដែលនៅចាំកន្លែងនោះបានឲ្យដឹងថា ក្រុមកីឡាករនឹងមកដល់ប្រទេសកម្ពុជានៅថ្ងៃស្អែក។
មន្ត្រីគណៈកម្មាធិការរៀបចំបុណ្យជាតិនិងអន្តរជាតិ បានឲ្យដឹងកាលពីថ្ងៃទី២០ ខែតុលា ថា ទូកមកចូលរួមប្រណាំងបានមកចុះឈ្មោះទើបតែបានជិត៤០០ទូក រីឯប្រទីបមានចំនួន៩គ្រឿងប៉ុណ្ណោះ។
ជារៀងរាល់ឆ្នាំ ក្នុងព្រះរាជពិធីបុណ្យអុំទូក មានទូកមួង ទូកង ដែលអុំនិងចែវ មានស្រីនិងបុរស បានមកចូលរួមប្រកួតប្រជែងច្រើនកុះករ៕