មេបញ្ជាការកងយោធពលខេមរភូមិន្ទនៃកងពលធំអន្តរាគមន៍លេខ៣ ដែលកំពុងគ្រប់គ្រងយោធាខ្មែរការពារព្រំដែននៅជុំវិញប្រាសាទព្រះវិហារ លោកឧត្តមសេនីយ៍ទោ ស្រី ឌឹក បានមានប្រសាសន៍កាលពីរសៀលថ្ងៃអង្គារ ទី៩ ខែកុម្ភៈ ថា ស្ថានការណ៍យោធានៅវាលឥន្រ្ទីនៅមានសភាពស្ងប់ស្ងាត់ជាធម្មតានៅឡើយទេ ក៏ប៉ុន្តែគេបានឮសំឡេងរថយន្តយ៉ាងគគ្រឹកគ្រេងនៅក្នុងទឹកដីថៃទល់មុខវាលឥន្ទ្រីដែលមានចម្ងាយប្រមាណ៣គីឡូម៉ែត្រភាគខាងជើងឆៀងខាងលិចប្រាសាទព្រះវិហារនោះ មិនដឹងជាមានរឿងអ្វីនឹងកើតឡើង។
លោក ស្រី ឌឹក បានព្រមានថា ការប៉ះទង្គិចគ្នាដោយអាវុធនៅតំបន់វាលឥន្ទ្រីដែលនឹងអាចចៀសផុតឬមិនផុតនៅពេលខាងមុខ គឺវាអាស្រ័យលើភាគីថៃមិនមែនបណ្តាលមកពីទាហានខ្មែរទេ។
លោកឧត្តមសេនីយ៍ទោ ស្រី ឌឹក បានថ្លែងថា ៖ «នៅស្ថានភាពធម្មតា ប៉ុន្តែខាងក្នុងវាហ្នឹងគឺគ្រាន់តែឮថា គគ្រឹកគគ្រេង ប៉ុន្តែមិនដឹងគេដឹកអី យើងម៉េចដឹង។ ខ្ញុំនិយាយមួយម៉ាត់ខ្លីថា រឿងចៀសផុត មិនផុត អាស្រ័យលើភាគីថៃប៉ុណ្ណឹងទេ! សំខាន់លើទាហានថៃចូល បើកាលណាចូលមក វាមានបញ្ហា។ បើសិនគាត់មិនចូល នៅស្ថានភាពដូចរាល់ថ្ងៃ មិនមានអីទេ! តែបើសិនជាគាត់អនុវត្តទៅតាមគោលគំនិតរបស់ អាភីស៊ិត អាហ្នឹងវាជារឿងមួយ សង្គ្រាមនឹងផ្ទុះតែប៉ុណ្ណឹង! យើងមិនដឹងអីទាំងអស់ ដឹងតែ ១មីលីម៉ែត្រក៏យើងមិនទាមទារគេ ប៉ុន្តែ ១មីលីម៉ែត្រក៏យើងអត់ឲ្យចូល ប៉ុណ្ណឹងទេ!»។
ការព្រមានរបស់មេទ័ពខ្មែរនេះបានធ្វើឡើងដើម្បីឆ្លើយតបទៅនឹងកាសែតថៃ Bangkok Post ដែលដកស្រង់សម្ដីនាយករដ្ឋមន្ត្រីថៃ លោក អាភីស៊ិត វេតឆាឈីវ៉ាក់ កាលពីថ្ងៃច័ន្ទដែលនិយាយថា ថៃនឹងមិនព្រមឲ្យបាត់បង់ដី ៤,៦គីឡូម៉ែត្រការ៉េ ដែលនៅជិតប្រាសាទព្រះវិហារទៅឲ្យខ្មែរទេ។ លោកនាយករដ្ឋមន្ត្រីថៃ អាភីស៊ិត វេតឆាឈីវ៉ាក់ (Abhisit Vejjajiva) បានមានប្រសាសន៍ថា ដី ៤,៦គីឡូម៉ែត្រការ៉េដែលនៅជុំវិញប្រាសាទព្រះវិហារគឺជាកម្មសិទ្ធិរបស់ថៃ៕