ទាក់ទងទៅនឹងបញ្ហានេះ ដើម្បីជៀសនូវផលប៉ះពាល់ដល់សុខភាព ប្រជាពលរដ្ឋដែលបរិភោគចំណីអាហារវេចខ្ចប់ទាំងនោះ វិទ្យាស្ថានស្តង់ដារកម្ពុជា កំពុងរៀបចំសេចក្ដីព្រាងស្ដីពីស្តង់ដារកម្ពុជា។
មន្ត្រីនៃវិទ្យាស្ថានស្តង់ដារកម្ពុជា បានឲ្យដឹងនៅថ្ងៃទី១៣ ខែមីនា ថា វិទ្យាស្ថានស្តង់ដារកម្ពុជា នៃក្រសួងឧស្សាហកម្ម រ៉ែ និងថាមពល បានរៀបចំសេចក្ដីព្រាងស្តង់ដារកម្ពុជា ដើម្បីត្រួតពិនិត្យផលិតផលជាចំណីអាហារវេចខ្ចប់នានា ដែលកំពុងចរាចរណ៍លក់នៅលើទីផ្សារ ពិសេសសម្រាប់មីកញ្ចប់។
លោក ពីង ស៊ីវឡាយ ជាអតីតប្រធានវិទ្យាស្ថានស្តង់ដារកម្ពុជា។ លោកមានប្រសាសន៍នៅថ្ងៃទី១៣ ខែមីនា ថា វិទ្យាស្ថានស្តង់ដារកម្ពុជា បានធ្វើសេចក្ដីព្រាងស្តង់ដារកម្ពុជា សម្រាប់ត្រួតពិនិត្យផលិតផលមី ដែលផលិតក្នុងស្រុក និងមីនាំចូលពីបរទេស បន្ទាប់ពីវិទ្យាស្ថាននេះបានត្រួតពិនិត្យចំណីអាហារផ្សេងៗ និងសម្ភារៈប្រើប្រាស់បានមួយចំនួនរួចហើយនោះ។
លោក ពីង ស៊ីវឡាយ៖ «វិទ្យាស្ថានកម្ពុជា គឺត្រូវកំណត់ត្រួតពិនិត្យគ្រប់ចំណីអាហារទាំងអស់ ដើម្បីកំណត់បានថា នៅក្នុងម្ហូបអាហារខ្លះដែលប្រើគ្រឿងផ្សំមានសារធាតុគីមី ឬគ្រឿងផ្សំដែលធ្វើឲ្យប៉ះពាល់សុខភាព»។
ស្តង់ដារមានន័យថា ជាការត្រួតពិនិត្យ និងកំណត់គុណភាពរបស់ផលិតផលសម្រាប់ប្រើប្រាស់ក្នុងស្រុក និងការនាំចេញទៅក្រៅស្រុក ដើម្បីធ្វើឲ្យមានសុវត្ថិភាព និងសុខភាព។
ប្រធានផ្នែកគីមី និងចំណីអាហារនៃវិទ្យាស្ថានវិទ្យាសាស្ត្រ និងបច្ចេកវិជ្ជានៃរាជបណ្ឌិតសភាកម្ពុជា អ្នកស្រីបណ្ឌិត សៀង ហ៊ុយ មានប្រសាសន៍ថា កម្ពុជានៅមានផលិតផលជាច្រើនទៀតសម្រាប់ត្រួតពិនិត្យឲ្យមានគុណភាព និងសុវត្ថិភាពសម្រាប់ប្រជាពលរដ្ឋប្រើប្រាស់ ហើយស្តង់ដារនោះគេត្រូវធ្វើឲ្យត្រូវគ្នាជាស្តង់ដារជាតិ និងស្តង់ដារប្រទេសនៅក្នុងតំបន់ និងអន្តរជាតិ។
អ្នកស្រី សៀង ហ៊ុយ៖ «វាទាមទារឲ្យមានស្តង់ដារផលិតផលសម្រាប់យើងនាំចេញទៅគេក៏មានស្តង់ដារ ហើយគេនាំចូលមកយើងក៏ត្រូវគិតពីស្តង់ដារដែរ ហើយបើយើងមិនគិតពីស្តង់ដារ វាធ្វើឲ្យទំនិញទាំងនោះ ជួនកាលល្អទៅ ជួនកាលផលិតមិនត្រឹមត្រូវតាមស្តង់ដារ»។
រដ្ឋមន្ត្រីក្រសួងឧស្សាហកម្ម រ៉ែ និងថាមពល និងជាប្រធានក្រុមប្រឹក្សាស្តង់ដារជាតិ លោក ស៊ុយ សែម កាលពីថ្ងៃទី២ ខែមីនា បានដាក់លិខិតមួយច្បាប់ជូនរដ្ឋមន្ត្រីក្រសួងព័ត៌មាន សុំឲ្យផ្សព្វផ្សាយសេចក្ដីព្រាងស្តង់ដារកម្ពុជា សម្រាប់មីកញ្ចប់ យោងតាមជំពូកទី៤ មាត្រា១៧ នៃច្បាប់ស្ដីពីស្តង់ដារកម្ពុជា តម្រូវឲ្យវិទ្យាស្ថានស្តង់ដារកម្ពុជា ធ្វើការផ្សព្វផ្សាយសេចក្ដីព្រាងស្តង់ដារដែលបានពិភាក្សារួចដល់ក្រសួងស្ថាប័ន និងឧស្សាហករដែលពាក់ព័ន្ធ។
ប្រធានគ្រប់គ្រងរោងចក្រក្រុមហ៊ុន ម៉ែន សារុន ផលិតមីពីសណ្ដែកសៀង លោក លីង ផន បានស្វាគមន៍ចំពោះបញ្ហានេះ។ លោកបញ្ជាក់ថា ក្រុមហ៊ុនរបស់លោកនឹងសហការជានិច្ចជាមួយវិទ្យាស្ថានស្តង់ដារកម្ពុជា ដើម្បីត្រួតពិនិត្យផលិតផលមីនៅរោងចក្ររបស់លោក៖ «ជាពិសេសគឺយើងធ្វើម៉េចឲ្យផលិតផលរបស់យើងមានគុណភាពសម្រាប់អ្នកប្រើប្រាស់ សម្រាប់គុណភាពរបស់អតិថិជន ឬប្រជាជនរបស់យើង»។
សេចក្ដីជូនដំណឹងរបស់វិទ្យាស្ថានស្តង់ដារកម្ពុជា បានសរសេរថា ចំពោះក្រុមហ៊ុនរោងចក្រសហគ្រាសទាំងអស់ បើមានមតិយោបល់ទាក់ទងសេចក្ដីព្រាងស្តង់ដារនេះ ឬធ្វើការតវ៉ាជំទាស់មកវិទ្យាស្ថានស្តង់ដារកម្ពុជា ជាលាយលក្ខណ៍អក្សរ និងត្រូវបញ្ជាក់ពីមូលហេតុនៃការផ្ដល់មតិ និងជំទាស់ឲ្យបានច្បាស់លាស់ក្នុងរយៈពេល ៦០ថ្ងៃ គិតពីថ្ងៃជូនដំណឹងនេះទៅ មុននឹងគេអនុម័តសេចក្ដីព្រាងឲ្យទៅជាស្តង់ដារកម្ពុជាផ្លូវការ។
អតីតប្រធានវិទ្យាស្ថានស្តង់ដារកម្ពុជា លោក ពីង ស៊ីវឡាយ បានបញ្ជាក់ថា ការត្រួតពិនិត្យផលិតផលប្រើប្រាស់ឲ្យមានស្តង់ដារនោះ វាមានសារសំខាន់ណាស់សម្រាប់ឲ្យប្រជាពលរដ្ឋក្នុងស្រុក និងក្រៅស្រុកប្រើប្រាស់ មិនថាផលិតផលប្រើប្រាស់ ឬផលិតផលបរិភោគទេ ដើម្បីសុវត្ថិភាព និងសុខភាព។
លោកបញ្ជាក់ថា វិទ្យាស្ថានស្តង់ដារកម្ពុជា កន្លងមកបានត្រួតពិនិត្យទៅលើផលិតផលមួយចំនួន ដូចជាទឹកត្រី ទឹកស៊ីអ៊ីវ អង្ករ ម្ទេសក្រៀម ឥដ្ឋការ៉ូ ស៊ីម៉ងត៍ និងឧបករណ៍អគ្គិសនីផ្សេងៗទៀត ហើយផលិតផលទាំងនេះគេរកឃើញថា គេធ្វើបានល្អមិនធ្វើឲ្យប៉ះពាល់សុខភាព ឬសុវត្ថិភាពអ្នកប្រើប្រាស់នោះទេ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។