លោក កៅ ផល ប្រធាននាយកដ្ឋានផលិតកម្មនិងបសុព្យាបាលនៃក្រសួងកសិកម្ម រុក្ខាប្រមាញ់និងនេសាទ បានមានប្រសាសន៍នៅថ្ងៃទី១៧ ធ្នូ ឲ្យដឹងថា មន្រ្តីក្រសួងកសិកម្មនិងអាជ្ញាធរមូលដ្ឋាន រួមមានតំណាងមកពីអង្គការ FAO ផង បាននាំគ្នាទៅកម្ទេចសត្វចិញ្ចឹមដែលមានមាន់ ទា មាន់ដាំងដុង និងក្ងានចំនួន ៣២៦ក្បាល នៅភូមិក្រាំងចេក ឃុំដើមឫស ស្រុកកណ្ដាលស្ទឹង ខែត្រកណ្តាល នៅថ្ងៃទី១៧ ធ្នូនេះ ដែលជាតំបន់ចាត់ទុកថាមានការផ្ទុះមេរោគផ្តាសាយបក្សី។
លោក កៅ ផល មានប្រសាសន៍ដូច្នេះថា ៖ «មន្ទីរពិសោធន៍វិភាគនៅក្នុងវិទ្យាស្ថានជាតិស្រាវជ្រាវបសុព្យាបាលនៃនាយកដ្ឋានផលិតកម្មនិងបសុព្យាបាលរបស់ក្រសួងកសិកម្ម រុក្ខាប្រមាញ់និងនេសាទ យើងរកឃើញហើយ ប្រកាសរបស់ក្រសួងហើយ បានចុះទៅកម្ទេច»។
លោក កៅ ផល ប្រធាននាយកដ្ឋានផលិតកម្មនិងបសុព្យាបាលនៃក្រសួងកសិកម្ម រុក្ខាប្រមាញ់និងនេសាទ បានមានប្រសាសន៍ឲ្យដឹងទៀតថា ក្រៅពីកម្ទេចសត្វមាន់ទា ដែលមាននៅតំបន់នោះ តាមវិធានការពារជំងឺផ្តាសាយបក្សីនេះ ក្រសួងកសិកម្ម មានគម្រោងអប់រំប្រជាពលរដ្ឋឲ្យមានការយល់ដឹងបន្ថែមទៀតដើម្បីការពារកុំឲ្យឆ្លងមេរោគ H5N1 ដែលអាចបណ្តាលឲ្យកើតមានជំងឺគ្រុនផ្តាសាយបក្សីទៀតផង។
តាមសេចក្តីប្រកាសរបស់ក្រសួងកសិកម្ម រុក្ខាប្រមាញ់និងនេសាទ នៅថ្ងៃទី១៧ ធ្នូ បានឲ្យដឹងដែរថា ចំពោះតំបន់ដែលរកឃើញថាមានមេរោគគ្រុនផ្ដាសាយបក្សីនោះ គេត្រូវតែបំផ្លាញចោលចំពោះបក្សីគ្រប់ប្រភេទនៅក្នុងតំបន់ផ្ទុះជំងឺទៅតាមវិធានបសុពេទ្យ ផ្អាកជាបណ្តោះអាសន្នការទិញលក់និងដឹកជញ្ជូនចំពោះបក្សីគ្រប់ប្រភេទឆ្លងចូលក្នុងរង្វង់កាំ ៣គីឡូម៉ែត្រពីចំណុចផ្ចិតនៃកន្លែងកើតហេតុ និងចាត់ទុកតំបន់នោះជាតំបន់ការពារនិងតាមដានស្រាវជ្រាវជំងឺក្នុងរយៈពេល៣០ថ្ងៃ និងត្រួតពិនិត្យមើលចលនាបក្សីជាប្រចាំក្នុងរង្វង់កាំ ១០ គីឡូម៉ែត្រពីចំណុចផ្ចិត។
តាមលោក កៅ ផល បានឲ្យដឹងផងដែរថា អ្នកជំងឺឈ្មោះ តេង សុភ័ក្រ្ត អាយុ១៩ឆ្នាំ ដែលបានកើតជំងឺផ្តាសាយបក្សីនោះ បានជាសះស្បើយវិលទៅផ្ទះវិញហើយ ក្រោយពីមកសម្រាកពេទ្យព្យាបាលកាលពីថ្ងៃទី២៨ វិច្ឆិកា កន្លងទៅ ទាន់ពេលវេលា។
ការរកឃើញមេរោគផ្តាសាយបក្សីនេះ បានកើតមានឡើងក្រោយពេលមានអ្នកជំងឺម្នាក់នៅស្រុកកណ្តាលស្ទឹង បានមកព្យាបាលរោគនៅមន្ទីរពេទ្យ ហើយបានបង្ហាញអាការៈថាមានជំងឺគ្រុនផ្តាសាយបក្សី។
សូមជម្រាបថា នេះជាករណីកើតជំងឺផ្តាសាយបក្សីលើកទី៨ហើយ នៅប្រទេសកម្ពុជា ដែលពីមុនមកមានកើត៧ករណី ហើយបានស្លាប់មនុស្សចំនួន៧នាក់ ក្នុងនោះមាននៅខែត្រកំពត ៤នាក់ កំពង់ស្ពឺ ១នាក់ ព្រៃវែង ១នាក់ និងកំពង់ចាម ១នាក់៕