ប្រជាពលរដ្ឋ ពុទ្ធបរិស័ទ សិស្ស និស្សិត និងមន្ត្រីរាជការប្រហែលជាង ៣.០០០នាក់ ព្រមទាំងព្រះសង្ឃប្រមាណ ៣០០អង្គផង បាននិមន្ត និងអញ្ជើញចូលរួមក្នុងពិធីរំឭកវិញ្ញាណក្ខន្ធជនរងគ្រោះដោយរបបកម្ពុជាប្រជាធិបតេយ្យ កាលពីព្រឹកថ្ងៃទី២០ ខែឧសភា ឆ្នាំ២០១១ នៅឯអតីតទីពិឃាដមនុស្សបឹងជើងឯក ស្ថិតក្នុងខណ្ឌដង្កោ រាជធានីភ្នំពេញ។
សិល្បករសិល្បការិនីបានសម្ដែងនូវឈុតឆាកមួយចំនួនស្ដីពីការសម្លាប់រង្គាលជនកម្ពុជាដោយក្រុមខ្មែរក្រហម និងការផ្ដួលរំលំរបបខ្មែរក្រហម។
ក្រោយពីបានទស្សនាការសម្ដែង គួបផ្សំនឹងព័ត៌មានដែលទទួលបានពីការសិក្សា និងពីឪពុកម្ដាយ និស្សិតឆ្នាំទី៣ នៃសាកលវិទ្យាល័យភូមិន្ទកសិកម្ម កញ្ញា ខឹម ស្រីពៅ បានបង្ហាញនូវជំនឿទាំងស្រុងថា របបខ្មែរក្រហមពិតជាបានបង្កមហន្តរាយដល់ជាតិ និងប្រជាជនកម្ពុជាប្រាកដមែន ៖ «មើលទៅវាសាហាវមែនទែន! ព្រោះពីមុនមកខ្ញុំអត់ដែលធ្លាប់ឃើញទេ ឮតែចាស់ៗនិយាយថា ជំនាន់ ប៉ុល ពត សាហាវបំផុត។ នៅពេលដែលខ្ញុំឃើញការសម្ដែង ធ្វើឲ្យអារម្មណ៍ញាប់ញ័រ»។
អតីតអ្នកទោសគុកទួលស្លែងនៃរបបខ្មែរក្រហម ដែលបានចូលរួមក្នុងពិធីនោះដែរ លោក ជុំ ម៉ី មានប្រសាសន៍ថា ការសម្ដែងរបស់សិល្បករ សិល្បការិនី បង្ហាញនូវការពិតដែលបានកើតឡើងក្នុងសម័យខ្មែរក្រហម។
លោក ជុំ ម៉ី បញ្ជាក់ថា លោកមានការឈឺចាប់ លោកចង់បានយុត្តិធម៌ពីការកាត់ក្ដីអតីតមេដឹកនាំខ្មែរក្រហម លោកគាំទ្រទិវារំឭកវិញ្ញាណក្ខន្ធ តែលោកក៏ចង់ឲ្យមានការផ្សះផ្សាជាតិដែរ ៖ «ជួនកាលជនដៃដល់តូចតាចយើងនៅចងកំហឹងគេក៏អត់កើតដែរ យើងសំខាន់តែអ្នកប៉ុន្មាននាក់ទេ។ ចំពោះខ្ញុំសំខាន់តែ ៥នាក់ទេ...»។
និស្សិតឆ្នាំទី៣ នៃសាកលវិទ្យាល័យជាតិគ្រប់គ្រង លោក កែវ សាស្ត្រា សម្ដែងការគាំទ្រនូវទិវាគោរពវិញ្ញាណក្ខន្ធជនរងគ្រោះ ៖ «យើងគួររំឭករៀងរាល់ឆ្នាំ ព្រោះភាពឈឺផ្សាក្នុងបេះដូងខ្មែរនៅតែមាន មិនអាចបំភ្លេចបាន...»។
ប្រធានក្រុមអ្នកតំណាងរាស្ត្រគណបក្ស សម រង្ស៊ី ដែលជាគណបក្សប្រឆាំង លោក សុន ឆ័យ អះអាងថា គណបក្ស សម រង្ស៊ី ក៏បានធ្វើពិធីគោរពវិញ្ញាណក្ខន្ធជនរងគ្រោះដោយរបបខ្មែរក្រហមនៅជើងឯកដែរ តែធ្វើក្នុងឱកាសបុណ្យជាតិធំៗដូចជាភ្ជុំបិណ្ឌជាដើម។
ទិវារំឭកវិញ្ញាណក្ខន្ធជនរងគ្រោះដោយរបបខ្មែរក្រហមនៅអតីតវាលពិឃាតជើងឯកកាលពីព្រឹកថ្ងៃទី២០ ឧសភា បានបញ្ចប់ដោយការដាក់បាត្រប្រគេនព្រះសង្ឃប្រមាណ ៣០០អង្គ។
ទោះយ៉ាងណាក៏ដោយ អ្នកតាមដានព្រឹត្តិការណ៍នេះបានឲ្យដឹងថា ចំនួនអ្នកចូលរួមមានការថយចុះបើប្រៀបធៀបទៅនឹងឆ្នាំមុន៕