យុវជន សុវណ្ណរី អាយុ១៧ឆ្នាំ មកពីខេត្តកណ្តាល បានថ្លែងថា ប៉ូលិសបានកែឈ្មោះរបស់ខ្លួន ដោយអត្តនោម័តទៅជា និល ពែក អាយុ ១៩ឆ្នាំនិងដាក់អាសយដ្ឋានថា នៅភូមិក្បាលស្ពាន ឃុំប៉ោយប៉ែត ស្រុកអូរជ្រៅ ខេត្តបន្ទាយមានជ័យ ដោយយកកម្រៃពីការចេញប័ណ្ណនោះចំនួន ១០០០បាតថៃ ប្រហែលជាង ១០ម៉ឺនរៀលប្រាក់ខ្មែរ ៖ «និល ពែក អាយុ ១៩ឆ្នាំ ប៉ូលិសដាក់ខ្លួនឯង គេអត់មានប្រាប់ថាម៉េចផង គេដាក់ឈ្មោះហ្នឹងតែម្ដង រស់នៅប៉ោយប៉ែត ។ តម្លៃ ១ពាន់បាត» ។
ក្រុមពលករផ្សេងទៀត បានចោទប៉ូលិសអន្តោប្រវេសន៍អំពីការចេញប័ណ្ណឆ្លងដែន ដែលមិនបានអនុញ្ញាតឲ្យពួកគេប្រើឈ្មោះខ្លួនឯង ហើយប៉ូលិសសុទ្ធតែបញ្ជាក់ទីលំនៅថា ពួកគេរស់នៅឃុំប៉ោយប៉ែត និងបានយកប្រាក់ពីពួកគេក្នុងម្នាក់ពី ៨០០ ទៅ ១៥០០បាតប្រាក់ថៃ ឬពី ៨ម៉ឺន ទៅ ១៥ម៉ឺនរៀល ៖ «នៅឃុំប៉ោយប៉ែត ឈ្មោះគេដាក់ឲ្យ មិនដឹងឈ្មោះអ្នកណាផង ។ ខ្ញុំធ្វើអស់ ៨៥០ ។ ឈ្មោះ ផា តែយើងមិនឈ្មោះ ផា ទេ យើងឈ្មោះរ័ត្នអីទៅ ដល់ពេលហើយអត់មានអត្តសញ្ញាណប័ណ្ណ សៀវភៅគ្រួសារអីទេ ថតឲ្យយើងហើយ សរសេរឲ្យយើងផ្ដិតមេដៃ វាទារដូចថា ១៤៥០អ៊ីចឹង ថតរូបលើវាទាំងអស់ ។ នៅផ្នែកហ្នឹងវាស៊ីសំណូកសូកប៉ាន់គ្នា អាមួយអ្នកយកទៅ អាមួយនោះគេអ្នកបញ្ជូនយកទៅធ្វើឲ្យ វាចែកលុយគ្នាអ៊ីចឹងទៅ» ។
ពលរដ្ឋខ្មែរដែលចង់ចូលទៅរកការងារធ្វើនៅប្រទេសថៃ ពួកគេត្រូវគេតម្រូវឲ្យធ្វើប័ណ្ណឆ្លងដែនពណ៌ស ដែលអាចប្រើបានរយៈពេល ២ឆ្នាំនិងអាចចេញចូលប្រទេសថៃម្តង ១សប្តាហ៍ ហើយប័ណ្ណនេះ ត្រូវចេញដោយសមត្ថកិច្ចប៉ូលិសអន្តោប្រវេសន៍ច្រកទ្វារអន្តរជាតិប៉ោយប៉ែតក្នុងតម្លៃកំណត់ដោយអនុក្រឹត្យក្នុងតម្លៃសមស្របមួយ ។
ប្រភពប៉ូលិសថ្នាក់ខ្ពស់ម្នាក់ នៅច្រកទ្វារអន្តរជាតិប៉ោយប៉ែតនិយាយដោយសុំមិនបញ្ចេញឈ្មោះ បានឲ្យដឹងថា តម្លៃពិតដែលពលរដ្ឋម្នាក់ៗត្រូវបង់គឺ ចំនួន២៥០ បាត ឬ ៣ម៉ឺនរៀល ។
ប្រធានប៉ូលិសផ្នែកអន្តោប្រវេសន៍នៅច្រកទ្វារអន្តរជាតិប៉ោយប៉ែត លោក ប៉ិច សារ៉ន មិនអាចទាក់ទងបានទេ ប៉ុន្តែ លោកអនុប្រធាន ឯម ថុន បដិសេធមិនធ្វើអត្ថាធិប្បាយ ៖ «បងឯងសួរទៅនាយកដ្ឋានខ្ញុំតែម្ដងទៅ អន្តោប្រវេសន៍តែម្ដងទៅ ពាក់ព័ន្ធរឿងអ៊ីចឹងៗ សួរនាយកដ្ឋានទៅ ខ្ញុំកំពុងជាប់រវល់ប្រជុំសិក្ខាសាលា» ។
ទាក់ទិននឹងការបញ្ជាក់ទីលំនៅនៅឃុំប៉ោយប៉ែតនេះ លោកមេឃុំ សាន ស៊ានហូ បានមានប្រសាសន៍ថា ពុំដែលឃើញប៉ូលិសកាន់មកបញ្ជាក់ទេ ប៉ុន្តែថា ការបញ្ជាក់ទីលំនៅគឺធ្វើឡើងសម្រាប់អ្នកស្នាក់នៅប៉ោយប៉ែតពិតប្រាកដ និងតាមរយៈការបញ្ជាក់ពីមេភូមិនីមួយៗ និងថា លោកពុំដែលបានទទួលលុយកាក់ពីការបញ្ជាក់នោះទេ ។
លោក សាន ស៊ានហូ ថ្លែងថា ៖ «កន្លងមកខ្លួនខ្ញុំផ្ទាល់នេះ ខ្ញុំមិនដែលបានទទួលថវិកានេះសូម្បីតែ ២០ ឬ ៣០បាត គឺអត់ទទេតែម្ដង ។ ហើយមួយទៀត ទាក់ទងនឹងរឿងប៉ូលិសហ្នឹង គាត់ធ្វើរបៀបម៉េច ខ្ញុំអត់ដឹងដែរ ទាក់ទងនឹងរឿងហ្នឹង ។ កន្លងមកខ្ញុំធ្វើមានបញ្ជាក់ពីភូមិ ។ ខ្ញុំបញ្ជាក់ជូនហើយថា រឿងខ្លះខ្ញុំអត់ដឹងថា តើអ្នកនោះ ជាប្រជាពលរដ្ឋនៅក្នុងភូមិនេះ ពិតមែនក៏មិនដឹង ព្រោះធម្មតាយើងមកឃុំ យើងមិនអាចដឹងបានទេ ប៉ុន្តែភូមិគាត់បញ្ជាក់ជូនថា ប្រជាពលរដ្ឋពិតជានៅក្នុងភូមិគាត់ពិតមែន ខ្ញុំបញ្ជាក់បន្ត» ។
អភិបាលរងខេត្តបន្ទាយមានជ័យលោក សុខ សារ៉េត បញ្ជាក់ថា ប័ណ្ណឆ្លងដែនពណ៌សនោះ គឺចេញសម្រាប់តែខេត្តបន្ទាយមានជ័យតែប៉ុណ្ណោះ ហើយលោកសន្យាថា នឹងពិនិត្យមើលរឿងនោះ។
លោក សុខ សារ៉េត មានប្រសាសន៍ថា ៖ «អ្នកទទួលព្រំដែននោះ ខ្ញុំត្រូវតែដឹងរឿងហ្នឹងដែរ គាត់ធ្វើអ្វីឲ្យខូចប៉ះពាល់ដល់កិត្តិយសជាតិយើង អត់បានទេ បើរដ្ឋាភិបាលកំណត់យ៉ាងម៉េចឲ្យយកហ្នឹង គឺយកអ៊ីចឹងទៅ ហើយបើសិនណាជាយកអត់មានចែងក្នុងច្បាប់ហ្នឹង អាហ្នឹងជារឿងបុគ្គលរបស់គេ ។ បើដឹងថា មានបុគ្គលណាប៉ះពាល់ ដូចការលើកឡើងរបស់លោកហ្នឹង ខ្ញុំនឹងកោះហៅប្រជុំភ្លាម» ។
ប័ណ្ណឆ្លងដែននេះត្រូវចេញដោយមន្ត្រីប៉ូលិសអន្តោប្រវេសន៍ខ្មែរ នៅច្រកអន្តរជាតិប៉ោយប៉ែត ហើយអ្នកប្រើប្រាស់ប័ណ្ណនេះ ក៏ត្រូវបង្ហាញទៅសមត្ថកិច្ចប៉ូលិសអន្តោប្រវេសន៍ថៃ នៅពេលដែលពួកគេឆ្លងចូលទៅក្នុងទឹកដីថៃ ។
អ្នកនាំពាក្យក្រសួងការបរទេសថៃ លោក ថារីត ចារុងវ៉ាត់ បានថ្លែងថា ខាងភាគីថៃពុំបានយកប្រាក់ពីពលករកម្ពុជា ដែលប្រើប្រាស់ប័ណ្ណឆ្លងដែននោះទេ ហើយក៏ពុំមែនជាអ្នកចេញប័ណ្ណនោះដែរ ប៉ុន្តែ ភាគីថៃគោរពសមត្ថកិច្ចរបស់ភាគីកម្ពុជាក្នុងការចេញប័ណ្ណឆ្លងដែនជូនពលរដ្ឋរបស់ខ្លួន ។
លោកបន្តថា អាជ្ញាធរកម្ពុជាគឺជាអ្នកចាត់វិធានការលើភាពមិនប្រក្រតីទាំងឡាយណា ដែលបានរកឃើញក្នុងការប្រព្រឹត្តដោយមន្រ្តីសមត្ថកិច្ចរបស់ខ្លួន ៖ «ខ្ញុំគិតថា អាជ្ញាធរគួរតែពិចារណាលុបបំបាត់បញ្ហានេះ ហើយធ្វើការស៊ើបអង្កេត ។ ខ្ញុំមិនបានឮថា មានបញ្ហានៅខាងយើងទេ ក៏ប៉ុន្តែគោលនយោបាយអាជ្ញាធរថៃ ព្យាយាមមិនឲ្យមានបញ្ហាបែបនេះ កើតឡើងឡើយ ។ ហើយមានយន្តការត្រួតពិនិត្យយ៉ាងល្អមួយ ដើម្បីឲ្យរឿងគ្រប់យ៉ាងប្រព្រឹត្តទៅ ក្នុងផ្លូវត្រឹមត្រូវនៅខាងភាគីថៃ» ។
ប័ណ្ណឆ្លងដែនពណ៌ស ដែលចេញដោយក្រុមប៉ូលិសអន្តោប្រវេសន៍ច្រកទ្វារអន្តរជាតិប៉ោយប៉ែត ត្រូវបានគេពិនិត្យលំដាប់លេខរៀងនៃប័ណ្ណឃើញឡើងដល់ជិត ៦ម៉ឺននាក់ហើយៗ ប្រាក់រាប់លានដុល្លារត្រូវបានគេប៉ាន់ប្រមាណថា រកបានពីការចេញប័ណ្ណឆ្លងដែនក្នុងរយៈពេល ៥ឆ្នាំ កន្លងមកនេះ ហើយប្រាក់នេះភាគច្រើនពុំត្រូវបានគេដាក់បញ្ចូលជាថវិការបស់រដ្ឋទេ ។
ប្រធានគម្រោងប្រឆាំងនឹងអំពើពុករលួយរបស់អង្គការ ផែក ខែមបូឌា លោក សេក បរិសុទ្ធ បានមានប្រសាសន៍ថា បើការអះអាងនោះគឺជាការពិតនោះគឺជាអំពើពុករលួយដែលប្រព្រឹត្តដោយមន្រ្តីប៉ូលិស ហើយការក្លែងបន្លំឯកសារគឺជាទោសមួយដោយឡែកផ្សេងទៀត ដែលមានចែងក្នុងច្បាប់ព្រហ្មទណ្ឌអន្តរកាល ។
តាមច្បាប់ព្រហ្មទណ្ឌអន្តរកាលរបស់អ៊ុនតាក់ ដែលនៅជាធរមាននៅឡើយ ត្រង់មាត្រាទី៥០ ចែងថា ជនទាំងឡាយណាដែលបានប្រព្រឹត្តការក្លែងបន្លំលិខិតស្នាមឯកជន លិខិតស្នាមពាណិជ្ជកម្មនិងលិខិតស្នាមសាធារណៈផ្សេងៗ ត្រូវផ្តន្ទាទោសដាក់ពន្ធនាគារពី១ ទៅ ៥ឆ្នាំ ។
ប្រទេសកម្ពុជា ត្រូវបានក្រុមហ៊ុនបរទេសឯករាជ្យមួយ ក្រោមជំនួយរបស់មូលនិធិអភិវឌ្ឍន៍អន្តរជាតិសហរដ្ឋអាមេរិកប៉ាន់ប្រមាណថា បានធ្វើឲ្យបាត់បង់ប្រាក់ទៅលើអំពើពុករលួយចំនួនពី ៣០០ ទៅ ៥០០លានដុល្លារសហរដ្ឋអាមេរិកក្នុងមួយឆ្នាំៗ ៕