សេចក្តីប្រកាសឲ្យដឹងជាបឋមពីគ.ជ.បនេះ បានធ្វើឲ្យអ្នកនាំពាក្យរដ្ឋាភិបាល លោករដ្ឋមន្រ្តីក្រសួងព័ត៌មាន ខៀវ កាញារីទ្ធ ថ្លែងប្រាប់កាសែតប៉ុន្មានម៉ោងក្រោយពីបិទការិយាល័យបោះឆ្នោតថា បក្សរបស់លោក អាចប្រកាសជ័យជំនះទាំងស្រុងហើយ គឺច្បាស់ក្រឡែតតែម្តង ។
លោក ខៀវ កាញារីទ្ធ ប្រកាសមុនទៀតថា បក្សប្រជាជនកម្ពុជា ឥឡូវនេះ បានក្លាយជាបក្សភាគច្រើនលើសពី២ភាគ៣ ហើយឈ្នះ ៩១កៅអីរួចទៅហើយ ។
ទន្ទឹមនឹងការប្រកាសពីជ័យជំនះរបស់គណបក្សប្រជាជន គណបក្សនយោបាយមិនកាន់អំណាច ដែលចូលរួមបោះឆ្នោតនៅថ្ងៃអាទិត្យ ២៧ កក្កដា កន្លងទៅនេះ មើលឃើញផ្សេង គឺមានភាពមិនត្រឹមត្រូវតាមក្បួនខ្នាត ដែលអន្តរជាតិអាចចាត់ទុកថាជាការបោះឆ្នោតដោយសេរីនិងយុត្តិធម៌ពិតប្រាកដនោះ ។
យ៉ាងតិច មានមេដឹកនាំនិងមន្រ្តីគណបក្សជំទាស់ ៣រូប ដែលមើលឃើញដូចគ្នា ។
បក្សនរោត្ដម រណឫទ្ធិ៖ លទ្ធផលមិនអាចទទួលយកបាន
លោក មុត ចន្ថា អ្នកនាំពាក្យគណបក្ស នរោត្តម រណឫទ្ធិ បានប្រាប់វិទ្យុអាស៊ីសេរី កាលពីយប់ថ្ងៃអាទិត្យថា បក្សលោកទទួលយកមិនបានទេ ៖ «លទ្ធផលបោះឆ្នោតនេះ យើងមិនអាចទទួលស្គាល់បានទេ មិនអាចទទួលយកបាន ពីព្រោះវាមានមូលហេតុ៧យ៉ាង ទី១ គឺអវត្តមានរបស់សម្ដេចក្រុមព្រះ ទី២ គឺការលុបឈ្មោះអ្នកបោះឆ្នោត ដែលជាខ្មែរម្ចាស់ស្រុក ជាង ៦៥ម៉ឺននាក់ក្នុងបញ្ជីបោះឆ្នោត ទី៣ យើងបានពិនិត្យឃើញថា តួលេខអ្នកបោះឆ្នោតក្នុងបញ្ជីអ្នកបោះឆ្នោតជាង ៨លាននាក់ គឺជាការបំប៉ោង ជាតួលេខបំប៉ោងក្នុងចេតនាផ្ដល់អត្ថប្រយោជន៍ ផលចំណេញផ្នែកនយោបាយដល់គណបក្សប្រជាជនកម្ពុជា ទី៤ យើងពិនិត្យឃើញថា អត្រានៃអ្នកដែលចេញទៅបោះឆ្នោតមានកម្រិតទាបបំផុត ទី៥ យើងពិនិត្យឃើញថា ការផ្ដល់សិទ្ធិដល់ជនជាតិយួនខុសច្បាប់មានសិទ្ធិបោះឆ្នោតជាច្រើនសែននាក់ ពីសំណាក់ គ.ជ.ប. គឺជារឿងមួយដែលមិនអាចទទួលយកបាន ។ ចំណុចទី៦ ដែលយើងពិនិត្យឃើញគឺមានការគំរាមកំហែង ការបំភិតបំភ័យ និងការទិញសន្លឹកឆ្នោត» ។
លោកថា បក្សលោកនឹងតវ៉ាតាមច្បាប់គ្រប់គ្រងការបោះឆ្នោតជាតិ ៖ «គណបក្សនរោត្តមរណឫទ្ធិ គឺទីមួយ យើងនឹងប្ដឹងទៅក្រុមប្រឹក្សាធម្មនុញ្ញអំពីបញ្ហាទាំងអស់នេះ ហើយយើងប្រកាសជាសាធារណៈ ជាផ្លូវការ គឺថា យើងមិនទទួលស្គាល់លទ្ធផលបោះឆ្នោតនេះទេ ដោយផ្អែកលើហេតុផល[ខាងលើនេះ] ហើយជាមួយគ្នានេះ យើងអំពាវនាវដល់គណបក្សដែលមាននិន្នាការប្រជាធិបតេយ្យទាំងអស់ ពិចារណាថាតើគួរទទួលស្គាល់លទ្ធផលមួយដែលចេញពីការបន្លំ កើតចេញពីការកេងចំណេញ កើតចេញពីការទិញសន្លឹកឆ្នោត ហើយកើតចេញពីការបោះឆ្នោតមួយដែលមិនឆ្លុះបញ្ចាំងអំពីឆន្ទៈប្រជាពលរដ្ឋ ដែរឬយ៉ាងណា?» ។
សមរង្ស៊ីគ្រោងដឹកនាំអ្នកបាត់ឈ្មោះធ្វើបាតុកម្ម
ចំណែកលោក សម រង្ស៊ី លោកបានប្រាប់វិទ្យុអាស៊ីសេរី បន្ទាប់ពីបោះឆ្នោតថា អ្វីកើតឡើងនៅថ្ងៃអាទិត្យនោះ គឺដូចដែលមនុស្សម្នាមួយចំនួនបានព្យាករណ៍ទុកមុនថា វានឹងកើតមានដូច្នោះមែន ៖ «យើងបានកត់សម្គាល់ឃើញភាពមិនប្រក្រតីជាច្រើន មានអ្នកដែលបាត់ឈ្មោះ អ្នកដែលត្រូវគេលុបឈ្មោះ គឺបាត់បង់សិទ្ធិបោះឆ្នោតច្រើនណាស់ គឺរាប់ម៉ឺននៅភ្នំពេញ ចូលដល់សែន ហើយទូទាំងប្រទេសមនុស្សច្រើនណាស់បាត់បង់ឈ្មោះ ហ្នឹងទីមួយ ។ ទីពីរ អ្នកដែលអត់មានសិទ្ធិបោះឆ្នោត ដូចជាជនបរទេស ដូចជាអ្នកដែលអត់បានចុះឈ្មោះមែនទែន គេបាននាំទៅបោះឆ្នោតឲ្យគណបក្សកាន់អំណាច ដោយគេផ្ដល់នូវឯកសារ ១០១៨ ដោយគេយកឈ្មោះខ្មោចយកទៅប្រើ ដូច្នេះគណបក្សប្រឆាំងគឺបាត់សំឡេងច្រើន ដោយគេបានលុបឈ្មោះអ្នកបោះឆ្នោត ដែលភាគច្រើនជាអ្នកគាំទ្រគណបក្សប្រឆាំង ហើយគណបក្សកាន់អំណាចបានទទួលសំឡេងឆ្នោតដែលត្រូវគេបំប៉ោងដោយយកឈ្មោះខ្មោចមកប្រើ» ។
លោក សម រង្ស៊ី បន្តថា លោកនឹងទាមទារឲ្យពលរដ្ឋខ្មែរទាំងអស់ បានបោះឆ្នោតដូចៗគ្នា ដោយគ្មានបែងចែកវណ្ណៈ ៖ «យើងនឹងជួយបងប្អូនទាំងអស់នោះ ដូច្នេះយើងនឹងរៀបចំធ្វើបាតុកម្មមួយក្នុងពេលប៉ុន្មានថ្ងៃខាងមុខនេះ ដើម្បីទាមទារឲ្យអ្នកដែលមិនបានបោះឆ្នោត បានចូលរួមក្នុងការបោះឆ្នោតផង ។ ឲ្យគ្នាបោះឆ្នោតបន្ថែមលើអ្នកដែលបានបោះឆ្នោតហើយទៅ គេមិនអាចបែងចែកប្រជាពលរដ្ឋជាពីរប្រភេទអ៊ីចឹងទេ ។ ប្រជាពលរដ្ឋខ្មែរត្រូវតែមានសិទ្ធិដូចគ្នា ស្មើគ្នា គ្រប់គ្នា ក្នុងការសម្រេចវាសនារបស់ប្រទេសជាតិរបស់យើងទាំងអស់គ្នា» ។
បក្សហ្វ៊ុនស៊ិនប៉ិច៖ លទ្ធផលគឺស្មានមិនដល់
លោក កែវ ពុទ្ធរស្មី ប្រធានគណបក្សហ៊្វុនស៊ិនប៉ិច មានប្រសាសន៍ថា លោកក៏ភ្ញាក់ដែរ គឺស្មានមិនដល់ ៖ «ពិបាកនឹងយល់ដែរ ព្រោះថា ចំពោះគណបក្សយើងខ្ញុំចំនួនសមាជិកដែលយើងបានចងក្រងទាំងអស់ហ្នឹងគឺថា យើងសង្ឃឹមថា ក្នុងលក្ខណៈដែលការបោះឆ្នោតត្រឹមត្រូវ សេរី យុត្តិធម៌ យើងសង្ឃឹមថា បានលទ្ធផលច្រើនជាងហ្នឹង ប៉ុន្តែដល់ទៅមានលទ្ធផលយ៉ាងនេះ ខ្ញុំក៏មានការភ្ញាក់ផ្អើលដែរ ... ខ្ញុំមិនយល់ដែរ ... ប៉ុន្តែដោយបានស្ដាប់ការវិភាគនៃក្រុមអង្គការក្រៅរដ្ឋាភិបាលជាតិ និងអន្តរជាតិ ដែលគេបានលើកពីបញ្ហាថា ទី១ មានមនុស្ស ២លាននាក់ ដែលមិនបានទៅបោះឆ្នោត ហើយនៅក្នុងនោះទៀត មាន២០% ស្ទើរតែនៅគ្រប់ទីកន្លែងដែលបាត់ឈ្មោះ» ។
លោកថា លោកនឹងជួបពិភាក្សាគ្នា ស្វែងរកការពិត ហើយស្វែងរកយុត្តិធម៌ចំពោះសមាជិកបក្ស ៖ «ថ្ងៃស្អែកហ្នឹង យើងនឹងជួបជាមួយថ្នាក់ដឹកនាំគណបក្សយើងខ្ញុំ ថាតើត្រូវប្ដឹង ឬយ៉ាងម៉េច បើប្ដឹងទាល់តែយើងមានមូលដ្ឋានច្បាស់លាស់ ហើយមានភស្តុតាងច្បាស់លាស់ គ្រប់សព្វដែរ ។ ដូច្នេះ យើងមិនចេះតែធ្វើអី ទៅតាមកំហឹង តាមការអន់ចិត្តរបស់យើងទេ យើងត្រូវរកមើលមូលហេតុច្បាស់លាស់ ពីព្រោះពិបាករកដែរមូលហេតុអស់ហ្នឹង ព្រោះវាអត់ដឹងថាប៉ះចំមកលើយើងប៉ុន្មាន គ្រាន់តែដឹងថា មានពលរដ្ឋត្អូញត្អែរ» ៕