សេចក្តីបដិសេធនោះធ្វើឡើងដោយគណៈកម្មាធិការអចិន្រ្តៃយ៍នៃរដ្ឋសភា ដែលបានបើកកិច្ចប្រជុំកាលពីថ្ងៃទី២៨ ខែតុលានេះ គឺច្រានចោលសំណើដែលគណបក្សសមរង្ស៊ីបានស្នើឲ្យមានការទទួលស្គាល់សិទ្ធិរបស់គណបក្សប្រឆាំងទាំងអស់នៅកម្ពុជាជាផ្លូវការ។
លោក ជាម យៀប សមាជិកអចិន្ត្រៃយ៍រដ្ឋសភានិងជាប្រធានគណៈកម្មាធិការសេដ្ឋកិច្ចនិងហិរញ្ញវត្ថុនៃរដ្ឋសភាកម្ពុជាថ្លែងប្រាប់អ្នកកាសែតក្នុងស្រុកថា ការស្នើឲ្យរដ្ឋសភាទទួលបក្សប្រឆាំងនានាជាផ្លូវការនោះ វាខុសពីនីតិវិធីច្បាប់ត្រង់មាត្រា៨២ថ្មីនៃបទបញ្ជាផ្ទៃក្នុងរបស់សភាដែលបានចែងថា ការស្នើវិសោធនកម្ម ត្រូវមានសំឡេង១ភាគ៤ នៃសមាជិកសភាទាំងអស់ ដែលមាន១២៣រូបនោះ។
ប៉ុន្តែ លោក សុន ឆ័យ សមាជិកសភាមកពីគណបក្សសមរង្ស៊ី មានប្រសាសន៍នៅថ្ងៃទី៣០ ខែតុលានេះ ថា ការមិនទទួលស្គាល់តួនាទីរបស់គណបក្សប្រឆាំងទាំងឡាយនោះ នឹងមិនចំណេញដល់ប្រទេសកម្ពុជាទេ និងមិនគោរពតាមស្មារតីនៃកិច្ចព្រមព្រៀងក្រុងប៉ារីស ដែលកម្ពុជាបានធ្វើឡើងកាលពីឆ្នាំ១៩៩១។
លោក សុន ឆ័យ បានមានប្រសាសន៍ថា ៖ «យើងសុំឲ្យគេយកយោបល់អ្នកឯកទេស ជំនួយការបរទេសនៅរដ្ឋសភា ព្រោះខាងបរទេសដែលគេជួយផ្ដល់យោបល់បច្ចេកទេសនៅរដ្ឋសភាហ្នឹង គឺគេឲ្យយោបល់រួចទៅហើយ ថា វាត្រូវតែមានការរៀបចំរដ្ឋសភាមួយដែលផ្ដល់សិទ្ធិឲ្យគណបក្សប្រឆាំងមានលទ្ធភាពបំពេញការងារឲ្យបានត្រឹមត្រូវ ដូចជាការទទួលស្គាល់ជាផ្លូវការមេបក្សប្រឆាំងក្នុងរដ្ឋសភា ផ្ដល់ថវិកាផ្សេងៗដល់បក្សប្រឆាំងឬគណបក្សមិននៅក្នុងរដ្ឋាភិបាល បង្កើតជាក្រុមស្រាវជ្រាវឯកទេសក្នុងការតាមដានការងាររបស់ក្រសួងទាំងឡាយរបស់រដ្ឋាភិបាល ហើយនិងមានការជំរុញឲ្យមានការបែងចែកតួនាទីរបស់គណបក្សប្រឆាំងនៅក្នុងរដ្ឋសភាជាដើម។ នេះជាការណែនាំរបស់គេ ហើយគេអនុវត្តទូទៅក្នុងពិភពលោក»។
លោក សុន ឆ័យ បញ្ជាក់បន្ថែមថា ៖ «ពីមុនយើងធ្លាប់មានការបែងចែករហូតមក តាំងពី៩៣មក មិនដែលមានគណបក្សប្រជាជនគ្រប់គ្រងតែឯងទេ ៩៣ ក៏ដូច ៩៨ ក៏ដូច ២០០៣ ប៉ុន្តែលើកនេះយើងត្រឡប់ទៅរបៀបចាត់ចែងដូចសម័យឆ្នាំ៨០ ក្នុងរបបកម្ពុជាប្រជាមានិតទៅវិញ ដូច្នេះវាខុស ផ្ទុយអំពីគោលការណ៍រដ្ឋធម្មនុញ្ញយើងទាំងស្រុង។ គណបក្សប្រជាជនបំពារចំពោះមុខប្រជាជាតិហើយនិងប្រវត្តិសាស្ត្រ អាហ្នឹងត្រូវទទួលខុសត្រូវ»៕