លោកនាយករដ្ឋមន្ត្រី ហ៊ុន សែន ថ្លែងយ៉ាងដូច្នេះ នាឱកាសប្រកាសអនុវត្តគោលនយោបាយយុទ្ធសាស្ត្រចតុកោណជំហានទី២ របស់រដ្ឋាភិបាលអាណត្តិថ្មី នាថ្ងៃទី២៦ កញ្ញា កន្លងទៅនេះ ៖ «អ៊ីចឹងសាររបស់គាត់ ផ្ដល់ឲ្យយើង ត្រូវធ្វើសេដ្ឋកិច្ច សង្គមឲ្យល្អ ហើយបើចង់ធ្វើសេដ្ឋកិច្ចសង្គមឲ្យល្អ កំណែទម្រង់ទាំងប៉ុន្មាន ដែលលើកឡើង ជាពិសេស សេវាសាធារណៈហ្នឹងហើយ។ ឯសារទី២ គាត់បានប្រាប់យើងច្បាស់ថែមទៀតផង ពេលនេះ គណបក្សប្រជាជន អត់មានត្រូវស្ដីបន្ទោសឲ្យនរណាទាំងអស់។ មុននេះមានដៃគូ ពិបាកអ៊ីចេះ ពិបាកអ៊ីចុះ បង្កើតរដ្ឋាភិបាលក៏ពិបាក រាជរដ្ឋាភិបាលក៏ពិបាក ធ្វើស្អីក៏ពិបាក តែលើកនេះគឺប្រជាជនបោះឲ្យគណបក្សប្រជាជន លើសពី ២ភាគ៣ ចង់ធ្វើអីក៏បានដែរ ចង់កែរដ្ឋធម្មនុញ្ញមិនចាំបាច់ទៅចរចាជាមួយបក្សណាទេ កែបានទាំងអស់។ អ៊ីចឹងមានន័យថា គាត់បានប្រាប់ថា ខ្ញុំប្រគល់អំណាចឲ្យអ្នកឯងទាំងអស់ហើយ អ្នកឯងមិនធ្វើ ធ្វើមិនកើត អាហ្នឹងអ្នកឯងទទួលខុសត្រូវម្នាក់ឯង គ្មានចែករំលែកឲ្យអ្នកណាទទួលខុស»។
សូមជម្រាបថា គណបក្សប្រជាជនកម្ពុជាទទួលបាន ៩០អាសនៈ ក្នុងចំណោម ១២៣អាសនៈ ហើយគណបក្សនេះ បានកាន់កាប់ទាំងរដ្ឋាភិបាលនិងរដ្ឋសភា។
មន្ត្រីហ៊្វុនស៊ិនប៉ិច ដែលគណបក្សនេះទទួលបាន ២អាសនៈដែរនោះ គឺមួយចំនួនតូចត្រូវបានដាក់ក្នុងរដ្ឋាភិបាលថ្មីនេះដែរ ក៏ប៉ុន្តែមិនមានទទួលខុសត្រូវច្បាស់លាស់លើក្រសួងណាមួយនោះឡើយ។
កាលពីអាណត្តិទី៣ កន្លងទៅ មន្ត្រីអង្គការសង្គមស៊ីវិលធ្លាប់រិះគន់ថា កំហុសរដ្ឋបាល រួមទាំងបញ្ហាអំពើពុករលួយនៅតាមមន្ទីរខេត្តឬក្រសួង គឺភាគច្រើនមានតែមន្ត្រីហ៊្វុនស៊ិនប៉ិចប៉ុណ្ណោះ ដែលត្រូវបាននាំយកទៅផ្តន្ទាទោស ឬដាក់ពន្ធនាគារជាដើម៕