ដំណោះស្រាយនោះគឺ ធ្វើយ៉ាងណាជួយសម្រួលដល់កសិករទាំងនោះ ឱ្យអាចដំណើរការដឹកជញ្ជូនកូនក្រពើយកទៅលក់ដូរនៅទីផ្សារនានាបានងាយស្រួល។
អាជ្ញាធរដែលចេញមុខជួយសម្រួលកិច្ចការជំនួញរបស់ប្រជាពលរដ្ឋនាពេលនេះ គឺនៅពេលដែលកសិករជាច្រើនបានអះអាងថា មន្ត្រីជលផលថ្នាក់កណ្ដាលនៅតែបង្កការលំបាកក្នុងការអនុញ្ញាតច្បាប់ឱ្យពួកគេលក់ដូរ និងនាំចេញកូនក្រពើនៅឡើយនោះ។
លោក ក្រូច សារឿន ជាកសិករចិញ្ចឹមក្រពើម្នាក់ ក្នុងចំណោមអ្នកចិញ្ចឹមក្រពើរាប់រយគ្រួសារទៀត បានមានប្រសាសន៍នៅចំពោះមុខអាជ្ញាធរខេត្តសៀមរាប កាលពីព្រឹកថ្ងៃអង្គារ ទី២៣ ខែសីហា ថា ការចិញ្ចឹមក្រពើបច្ចុប្បន្ននេះគឺពិបាកចំពោះការសុំអាជ្ញាប័ណ្ណដឹកជញ្ជូនពីមន្ត្រីជលផលថ្នាក់កណ្ដាល ដោយមន្ត្រីជលផលថ្នាក់កណ្ដាលនោះ ហាក់ដូចជាមិនចង់ផ្ដល់អាជ្ញាប័ណ្ណដឹកជញ្ជូនកូនក្រពើទៅឱ្យកសិករណាផ្សេង ក្រៅតែពីចង់ឱ្យសមាគមចិញ្ចឹមក្រពើមួយនៅខេត្តសៀមរាបដែលមានសមាជិក ៦នាក់ ដែលបានក្ដោបក្ដាប់ទីផ្សារលក់កូនក្រពើនោះ។
លោក ស៊ូ ភិរិន្ទ អភិបាលខេត្តសៀមរាបបានមានប្រសាសន៍ថា លោកបានយល់អំពីសំណូមពររបស់កសិករចិញ្ចឹមក្រពើ និងសមាគមចិញ្ចឹមក្រពើនោះ ដើម្បីស្វែងរកទីផ្សារលក់កូនក្រពើសម្រាប់រកប្រាក់ចំណូលចិញ្ចឹមគ្រួសារ ប៉ុន្តែអាជ្ញាធរសូមឱ្យមានការអត់ធ្មត់ និងរង់ចាំមួយរយៈពេលខ្លី ដើម្បីអាជ្ញាធរបានអញ្ជើញមន្ត្រីថ្នាក់ក្រសួងដែលពាក់ព័ន្ធរឿងនេះមកជួបប្រជុំនៅចុងសប្ដាហ៍នេះ។
កាលពីថ្ងៃទី៣១ ខែកក្កដាកន្លងទៅ លោក ហ៊ុន សែន នាយករដ្ឋមន្ត្រីនៃរាជរដ្ឋាភិបាលកម្ពុជាធ្លាប់បានមានប្រសាសន៍ព្រមានដល់សមាគមចិញ្ចឹមក្រពើ ដែលមានសមាជិកចំនួន ៦នាក់នៅខេត្តសៀមរាបនោះ ឱ្យដកខ្លួនចេញពីការចង់ក្ដោបក្ដាប់ទីផ្សារកូនក្រពើសម្រាប់តែបក្សពួករបស់ខ្លួននោះ ដើម្បីទុកលទ្ធភាពឱ្យកសិករអ្នកចិញ្ចឹមកូនក្រពើបានលក់ដូរកូនក្រពើទៅឱ្យអ្នកផ្សេងក្នុងលក្ខណៈជាទីផ្សារសេរី៕