តាំងពីព្រឹកព្រលឹម នៅច្រកទ្វារចាំយាម ខេត្តកោះកុង ទីដែលឆ្លងកាត់ព្រំដែនកម្ពុជា-ថៃ ភាគនិរតី ជាប់តំបន់ឆ្នេរសមុទ្រ គេឃើញមានមនុស្សយ៉ាងច្រើនកុះករ ភាគច្រើនជាពលរដ្ឋខ្មែរ ដែលត្រូវចេញចូលទៅផ្សារក្នុងទឹកដីថៃ ជាប់ព្រំដែន ដើម្បីប្រកបរបរអាជីវកម្មផ្សេងៗ។
ប្រជាពលរដ្ឋដែលត្រូវឆ្លងកាត់ព្រំដែននោះ ភាគច្រើនជាកម្មករអូសរទេះដឹកទំនិញ និងទិញបន្លែផ្លែឈើ និងរបស់របរផ្សេងៗទៀត យកមកលក់នៅទីរួមខេត្តកោះកុង និងបន្តយកមកដល់ភ្នំពេញទៀត។ ចំពោះទំនិញដែលនាំពីខ្មែរចូលទឹកដីថៃវិញ ភាគច្រើនគឺផលនេសាទសមុទ្រ។
ស្ត្រីវ័យប្រមាណជាង ៤០ឆ្នាំ មានមុខរបរជាកម្មករអូសរទេះដឹកទំនិញឆ្លងកាត់ព្រំដែន អ្នកស្រី ហួន សុខលី បានឲ្យវិទ្យុអាស៊ីសេរីដឹងថា លោកស្រីមានស្រុកកំណើត នៅខេត្តកំពង់ធំ ហើយបានមករកស៊ីនៅខេត្តកោះកុងនេះ ជាច្រើនឆ្នាំមកហើយ។
ទាក់ទងនឹងស្ថានភាពទំនាក់ទំនងចេញចូលរកស៊ីនៅច្រកចាំយាម សព្វថ្ងៃនេះ គឺពុំមានអ្វីខុសប្លែកពីពេលមុន ដែលមេដឹកនាំខ្មែរ និងថៃ មានទំនាស់នឹងគ្នាពីបញ្ហាព្រំដែននៅតំបន់ប្រាសាទព្រះវិហារ នោះទេ។
អ្នកស្រី ហួន សុខលី ឲ្យដឹងដូច្នេះ ៖ «(កម្ពុជា-ថៃ) មានបញ្ហានឹងគ្នា ប៉ុន្តែប្រជាជនពុំមានបញ្ហានឹងគ្នាទេ អ្នករកស៊ី រកស៊ីធម្មតា ប្រជាជនធម្មតាអត់មានអីប៉ះពាល់ដល់ប្រជាជនទេ»។
អ្នកស្រីបន្តថា ក្រៅពីមុខរបរអូសរទេះឆ្លងកាត់ព្រំដែន គឺគាត់ក៏ត្រូវឆ្លៀតពេលទៅធ្វើជាកម្មករសំណង់ទៀត ដើម្បីបំពេញការចំណាយប្រចាំថ្ងៃនៅក្នុងគ្រួសារ។
ស្រដៀងគ្នានេះដែរ អ្នកលក់ដូរនាឡិកា ទូរស័ព្ទ គ្រឿងអលង្ការ និងគ្រឿងអេឡិចត្រូនិកផ្សេងៗទៀតនៅផ្សារថៃ អ្នកស្រី ពៅ បានឲ្យដឹងដែរថា អ្នកស្រីមកពីខេត្តតាកែវ បានមករកស៊ីនៅទឹកដីថៃ ជាប់ព្រំដែនខេត្តកោះកុងនេះ តាំងពីឆ្នាំ១៩៩៧មក បានកត់សម្គាល់ឃើញដែរថា ការលក់ដូរ ក៏ដូចជាការទំនាក់ទំនងរវាងពលរដ្ឋខ្មែរ និងពលរដ្ឋថៃ នៅមានភាពស្និទ្ធស្នាលគ្នាធម្មតា ទោះបីជាមេដឹកនាំប្រទេសទាំងពីរមិនមានទំនាក់ទំនងល្អនឹងគ្នាក៏ដោយ។
អ្នកស្រី ពៅ បានប្រាប់ដូច្នេះ ៖ «ធម្មតា ដូចអត់មានផ្អើលអីផង ពួកខ្មែរថៃនៅនេះអត់មានបញ្ហាអីផង នៅតែរាប់អានគ្នា គេតែងនិយាយថៃថា ថៃ-ខ្មែរដូចបងប្អូនគ្នា មានបញ្ហាតែអ្នកធំ យើងអ្នកតូចតាចរកស៊ីនៅធម្មតា នៅតែលក់បាន ភ្ញៀវទេសចរណ៍នៅតែមកលេងធម្មតា»។
មន្ត្រីសម្របសម្រួលនៃអង្គការសិទ្ធិមនុស្សលីកាដូ ប្រចាំខេត្តកោះកុង លោក អ៊ិន គង់ចិត្រ បានទទួលស្គាល់ពីស្ថានភាពនៅតំបន់ព្រំដែនខេត្តនេះថា មានភាពល្អប្រសើរដូចអ្វីដែលពលរដ្ឋបានលើកឡើងដូច្នេះមែន។
លោក អ៊ិន គង់ចិត្រា មានប្រសាសន៍ដូច្នេះ ៖ «ហើយនៅថ្ងៃសុក្រឡើង អាជីវករថៃ ខ្មែរ បានយកទំនិញមកប្ដូរគ្នា ដូចអត់មានអីទេ ស្ថានភាពល្អប្រសើរ ល្អជាងនៅបោយប៉ែត អត់មានយកលុយយកកាក់ពីអ្នកអូសរទេះ អត់មានគាបសង្កត់ អត់មានជំរិតទារលុយអីទេនៅនេះ»។
កាសែត បាងកក ប៉ុស្តិ៍ (Bangkok Post) ចេញផ្សាយថា រដ្ឋាភិបាលថៃ បានប្រកាសថា ជម្លោះរវាងខ្មែរ-ថៃ មិនមានការប៉ះពាល់ដល់ពាណិជ្ជកម្មនៅតាមព្រំដែនទេ។ ប៉ុន្តែក្រុមពាណិជ្ជករធំៗ មានការព្រួយបារម្ភ និងរារែកក្នុងការបញ្ជាទិញនូវមុខទំនិញរបស់ពួកគេ។
ប្រធានច្រកទ្វារព្រំដែនចាំយាម ខេត្តកោះកុង លោក សួសសុខ ដារា បានអះអាងថា ចំនួនអ្នកចេញចូលមានការថយចុះខ្លះ ដោយសាររដូវនេះមិនសូវសំបូរបន្ថែ ផ្លែឈើ ប៉ុន្តែជាទូទៅស្ថានភាពការដោះដូរទំនិញចេញចូលប្រទេសទាំងពីរ ពុំមានអ្វីប្រែប្រួលខុសពីពេលមុនៗនោះទេ។
លោក សួសសុខ ដារា មានប្រសាសន៍ថា ៖ «យើងអនុវត្តតាមជំនាញអន្តោប្រវេសន៍ មិនមានអ្វីខុសប្រក្រតី ទោះបីមានការអី ខាងថៃក្តី ដូចអត់មានអីទេនៅព្រំដែនខាងណេះ»។
ទោះយ៉ាងណាក្តី លោកមិនបង្ហាញពីតួលេខនៃការនាំចេញចូលទំនិញតាមច្រកនេះថា មានចំនួនប៉ុន្មានក្នុងមួយឆ្នាំ ឬមួយខែនោះទេ។
មន្ត្រីការទូតរបស់ប្រទេសថៃ ដែលទទួលបន្ទុកការងារជំនួញនៅកម្ពុជា បានថ្លែងឲ្យដឹងនៅក្នុងឱកាសពិព័រណ៍ក្រុមហ៊ុនថៃ នៅកម្ពុជា កាលពីខែមិថុនា កន្លងទៅថា ជំនួញឆ្លងដែនរវាងកម្ពុជា និងថៃ ក្នុងឆ្នាំ២០០៩ កន្លងទៅ មានទឹកប្រាក់សរុបប្រមាណ ១.៦០០លានដុល្លារអាមេរិក។
ជម្លោះខ្មែរថៃ បានអូសបន្លាយអស់រយៈពេលជាង ២ឆ្នាំមកហើយ បន្ទាប់ពីប្រាសាទព្រះវិហារដ៏ចំណាស់មួយនេះ ត្រូវបានគណៈកម្មាធិការបេតិកភណ្ឌពិភពលោក សម្រេចចុះក្នុងបញ្ជីសម្បត្តិបេតិកភណ្ឌពិភពលោក កាលពីថ្ងៃទី៧ ខែកក្កដា ឆ្នាំ២០០៨។ កងទ័ពថៃ កាលពីថ្ងៃទី១៥ ខែកក្កដា ឆ្នាំ២០០៨ បានចូលឈ្លានពានទឹកដីកម្ពុជា ក្នុងវត្តខ្មែរមួយក្បែរប្រាសាទព្រះវិហារ ដែលបានបង្កជាជម្លោះដ៏រ៉ាំរ៉ៃរហូតមកដល់បច្ចុប្បន្ននេះ៕