DC-CAM គ្រោង​បោះ​ពុម្ព​សៀវភៅ​កត់​ត្រា​ឈ្មោះ​អ្នក​ស្លាប់​ក្នុង​របប​ខ្មែរ​ក្រហម

ប្រជា​ពលរដ្ឋ​កម្ពុជា អាច​នឹង​បាន​ដឹង​ពី​ឈ្មោះ​ជន​រង​គ្រោះ​រាប់​លាន​នាក់ ដែល​បាន​ស្លាប់​ក្នុង​របប​ខ្មែរ​ក្រហម។
ដោយ ដែន អយុធ្យា
2010-07-31
អ៊ីម៉ែល
មតិ
Share
បោះពុម្ព
ប្រធាន​មជ្ឈមណ្ឌល​ឯកសារ​កម្ពុជា លោក ឆាំង យុ។
ប្រធាន​មជ្ឈមណ្ឌល​ឯកសារ​កម្ពុជា លោក ឆាំង យុ។
RFA File

លោក អេង កុក​ថាយ មន្ត្រី​ទទួល​បន្ទុក​ប្រមូល​ឯកសារ​នៃ​មជ្ឈមណ្ឌល​ឯកសារ​កម្ពុជា DC-CAM បាន​ឲ្យ​វិទ្យុ​អាស៊ី​សេរី​ដឹង​ថា មជ្ឈ​មណ្ឌល​គ្រោង​បោះ​ពុម្ព​សៀវភៅ​កំណត់​ត្រា​អ្នក​ស្លាប់ ក្នុង​របប​ខ្មែរ​ក្រហម ជាង​២​ពាន់​ក្បាល ដោយ​ដាក់​ចំណង​ជើង​ថា «សៀវភៅ​នៃ​ការ​ចង​ចាំ»។

លោក កុក ថាយ ឲ្យ​ដឹង​នៅ​ថ្ងៃ​ទី​៣១ ខែ​កក្កដា​ថា គោល​បំណង​នៃ​ការ​បោះ​ពុម្ព​សៀវភៅ​នេះ ប្រយោជន៍​បង្ក​ភាព​ងាយ​ស្រួល​ដល់​ពលរដ្ឋ​ដែល​បាន​បាត់​បង់​ញាតិ​សន្តាន ក្នុង​របប​ខ្មែរ​ក្រហម បាន​ស្វែង​យល់ និង​ស្រាវ​ជ្រាវ​រក​ឈ្មោះ​ញាតិ​មិត្ត​របស់​ខ្លួន នៅ​ក្នុង​កំណត់​ត្រា​នោះ។

មន្ត្រី​រូប​នេះ​បាន​អំពាវ​នាវ​ដល់​ពលរដ្ឋ​ទូទាំង​ប្រទេស ដែល​មាន​បង​ប្អូន ឬ​ញាតិ​មិត្ត​ស្លាប់​ក្នុង​សម័យ​ខ្មែរ​ក្រហម ចូល​រួម​សហ​ការណ៍​មក​មជ្ឈ​មណ្ឌល​ឯកសារ​កម្ពុជា ដើម្បី​ចង​ក្រង​សៀវភៅ​នេះ​ឡើង​តាម​រយៈ​អាសយដ្ឋាន​ដូច​ច្នេះ ៖ «គាត់​អាច​ហៅ​មក​លេខ​ខ្ញុំ​ដោយ​ផ្ទាល់ ហើយ​ខាង​មជ្ឈ​មណ្ឌល​ឯកសារ​កម្ពុជា ជា​អ្នក​ហៅ​ត្រឡប់​ទៅ​គាត់​វិញ គឺ​ហៅ​មក​លេខ ០១២-៩៥-៥៨-៥៨ ឬ​ក៏​គាត់​អាច​មក​មជ្ឈ​មណ្ឌល​ឯកសារ​កម្ពុជា ទីក្រុង​ភ្នំពេញ​ដោយ​ផ្ទាល់ បើ​សិន​គាត់​អាច​ធ្វើ​ដំណើរ​មក​បាន គឺ​មាន​អាសយដ្ឋាន​នៅ​ផ្ទះ​លេខ​៦៦ ផ្លូវ​ព្រះ​សីហនុ នៅ​ជ្រុង​ខាង​ត្បូង ឆៀង​ខាង​កើត​វិមាន​ឯករាជ្យ»

មនុស្ស​វ័យ​ចំណាស់​ម្នាក់​ឈ្មោះ ជុំ ម៉ន រស់​នៅ​ស្រុក​កោះ​សុទិន្ន ខេត្ត​កំពង់ចាម បាន​សាទរ​ចំពោះ​គំនិត​ផ្ដួច​ផ្ដើម​បង្កើត​ឲ្យ​មាន​សៀវភៅ​កត់​ត្រា​ឈ្មោះ​អ្នក​ស្លាប់​ក្នុង​របប​ខ្មែរ​ក្រហម របស់​មជ្ឈ​មណ្ឌល​ឯកសារ​កម្ពុជា នៅ​ពេល​នេះ។ ប្រភព​ឲ្យ​ដឹង​ថា លោក​នឹង​បញ្ជូន​ឈ្មោះ​បង​ប្អូន​បង្កើត​របស់​គាត់ បាន​ស្លាប់​ជំនាន់​ខ្មែរ​ក្រហម ចំនួន​៥​នាក់ ដាក់​ចូល​ទៅ​ក្នុង​សៀវភៅ​កំណត់​ត្រា របស់​មជ្ឈ​មណ្ឌល​ឯកសារ​កម្ពុជា ដើម្បី​ដាក់​ចូល​ទៅ​ក្នុង​កំណត់​ត្រា​នេះ។

លោក រាជ្យ សម្បត្តិ ប្រធាន​ផ្នែក​កិច្ច​ការ​សាធារណៈ​សាលាក្ដី​ខ្មែរ​ក្រហម នៅ​ថ្ងៃ​៣១ ខែ​កក្កដា​នេះ​បាន​ចាត់​ទុក​គម្រោង​បោះ​ពុម្ព​សៀវភៅ​កត់​ត្រា​ឈ្មោះ​អ្នក​ស្លាប់​ក្នុង​របប​ខ្មែរ​ក្រហម​ថា បាន​ផ្ដល់​សារ​សំខាន់​ដល់​ពលរដ្ឋ​ខ្មែរ​ទូទៅ ដើម្បី​ស្វែង​រក​ឈ្មោះ​ញាតិ​មិត្ត​របស់​ខ្លួន ដែល​បាន​ស្លាប់​ក្នុង​ជំនាន់​ខ្មែរ​ក្រហម។ លោក​ថា លោក​ចង់​បាន​ឲ្យ​សៀវភៅ​កត់​ត្រា​អ្នក​ស្លាប់​ក្នុង​របប​ខ្មែរ​ក្រហម​នោះ បាន​ចែក​ផ្សាយ​ទូលំ​ទូលាយ ទៅ​ដល់​គ្រប់​មូលដ្ឋាន​ទូទាំង​ប្រទេស​កម្ពុជា។

លោក រាជ្យ សម្បត្តិ មាន​ប្រសាសន៍ ៖ «ប្រយោជន៍​ទី​១ គឺ​បង​ប្អូន​ដែល​គាត់​បាត់​បង​ប្អូន គឺ​គាត់​អាច​ស្រាវ​ជ្រាវ​រក​តាម​រយៈ​សៀវភៅ​ហ្នឹង​បាន។ ប្រយោជន៍​ទី​២ គឺ​ជា​ផ្នែក​មួយ​នៃ​ការ​ផ្សះ​ផ្សារ​ផ្លូវ​ចិត្ត​ច្រើន​ដែរ ព្រោះ​អ្នក​ខ្លះ​គាត់​មាន​បង​ប្អូន​ស្លាប់ ប៉ុន្តែ​មិន​ត្រូវ​បាន​ដឹង​ឮ ប៉ុន្តែ​ដល់​ពេល​គាត់​មើល​តាម​សៀវភៅ​ហ្នឹង គាត់​យល់​ថា គេ​យក​ចិត្ត​ទុក​ដាក់​នឹង​ក្រុម​គ្រួសារ​គាត់​ដែល​បាត់​បង់​ជីវិត។ អ៊ីចឹង​ខ្ញុំ​យល់​ថា សៀវភៅ​ហ្នឹង​ល្អ ហើយ​មាន​ប្រយោជន៍»

មន្ត្រី​មជ្ឈ​មណ្ឌល​ឯកសារ​កម្ពុជា​ដដែល បាន​ឲ្យ​ដឹង​ថា ការ​បោះ​ពុម្ព «សៀវភៅ​នៃ​ការ​ចងចាំ» សម្រាប់​កត់​ត្រា អ្នក​ស្លាប់​ក្នុង​សម័យ​ខ្មែរ​ក្រហម​នេះ គឺ​ជំហាន​ដំបូង មជ្ឈមណ្ឌល​គ្រោង​បោះ​ពុម្ព​ចំនួន​ជាង​២​ពាន់​ក្បាល និង​ត្រូវ​ចែក​ជូន​ទៅ​គ្រប់​ឃុំ សង្កាត់ នៅ​ទូទាំង​ប្រទេស​កម្ពុជា ហើយ​ថា រាល់​ការ​ចំណាយ​ទាក់​ទង​ថ្លៃ​សេវា​ធ្វើ​ដំណើរ ជុំវិញ​ការ​ផ្ដល់​ព័ត៌មាន​ពី​ឈ្មោះ​អ្នក​ស្លាប់​ក្នុង​របប​ខ្មែរ​ក្រហម មក​ឲ្យ​មជ្ឈ​មណ្ឌល​ឯក​សារ​កម្ពុជា គឺ​ខាង​មជ្ឈ​មណ្ឌល ជា​អ្នក​ចំណាយ៕

ព័ត៌មាន (2)
Share

អ្នក​អាន​អនាមិក

What if, the whole family dead who's going to tell you the name of the dead?

Aug 02, 2010 06:59 AM

អ្នក​អាន​អនាមិក

If you want to register all the victims, what you have to do is to go to every villages, cities otherwise your report will not be transparent. Offer phone or expect people to come and register in your office is hopeless to get fruitful.

Jul 31, 2010 09:48 AM

គេហទំព័រ​ទាំងមូល