លោក នី សាន់ បានឲ្យដឹងថា លិខិតខាងលើបានចេញកាលពីខែមេសា ឆ្នាំ២០០៩នេះ ប៉ុន្តែលោកទើបទទួលបានកាលពីខែសីហាកន្លងទៅ ដោយក្នុងលិខិតនោះបញ្ជាក់ថា ប្រធានរដ្ឋសភា លោក ហេង សំរិន បានស្នើសុំឲ្យរដ្ឋមន្រ្តីក្រសួងធម្មការនិងកិច្ចការសាសនាចុះធ្វើការស្រាវជ្រាវនិងដោះស្រាយជម្លោះដែលអូសបន្លាយជាយូរមកហើយនោះឲ្យបានឆាប់ៗ។
លោក នី សាន់ បានឲ្យដឹងថា ៖ «ខ្ញុំតំណាងឲ្យប្រជាពលរដ្ឋ ព្រមទាំងប្រជាពលរដ្ឋទាំងភូមិហ្នឹង គាត់សំណូមពរឲ្យក្រសួងធម្មកាជួយចុះមកឲ្យបានឆាប់ដើម្បីរីកចម្រើននៅក្នុងភូមិវិញ កុំឲ្យនៅមានបញ្ហានឹងគ្នា»។
លោកបញ្ជាក់ថា ការអូសបន្លាយនេះបានប៉ះពាល់ដល់ការអភិវឌ្ឍភូមិរបស់លោក ពីព្រោះប្រជាពលរដ្ឋមួយចំនួនមិនទទួលស្គាល់ហាកឹមចាស់ ពិសេសនៅក្នុងខែបួសនេះគ្មានអ្នករៀបចំនិងមើលការខុសត្រូវក្នុងកម្មវិធីស្រាយបួសជុំគ្នានិងបញ្ហាផ្សេងៗទៀត។
លោក នី សាន់ បានបញ្ជាក់ថា ៖ «ការអូសបន្លាយហ្នឹងវាគ្រោះថ្នាក់ប្រជាពលរដ្ឋដែរ វាបាត់បង់ថវិកាហ្នឹងរៀងរាល់សប្ដាហ៍រហូត ហើយធ្វើអីក៏ធ្វើអត់ចេញដែរ អត់មានជំនឿលើគ្នាសោះ។ ឥឡូវហ្នឹងកាន់តែខ្លាំងឡើងៗហើយ»។
វិទ្យុអាស៊ីសេរីមិនអាចទាក់ទងរដ្ឋមន្រ្តីក្រសួងធម្មកានិងកិច្ចការសាសនា គឺលោក មិន ឃិន តាមទូរស័ព្ទបានទេ។ ប៉ុន្តែរដ្ឋលេខាធិការនៃក្រសួងនេះ លោក សុះ មុះសិន មានប្រសាសន៍ថា ក្រសួងមិនទាន់ចុះត្រួតពិនិត្យនៅឡើយទេ ដោយក្រសួងកំពុងប្រមែប្រមូលឯកសារអំពីបញ្ហានេះ។
លោក មិន ឃិន បានមានប្រសាសន៍ថា ៖ «ខ្ញុំគិតថា ក្រោយបួសក្រោយអីយើងនឹងរៀបចំ មិនមែនកំពង់យោលទេ កន្លែងដែលមានបញ្ហាផ្សេងៗទៀតក៏យើងនឹងព្យាយាមដោះស្រាយឲ្យបងប្អូនយើងទទួលបានទាំងអស់គ្នា»។
មេឃុំគោកពោធិ៍ លោក ថុយ តឹម បានឲ្យដឹងថា លោកមិនដឹងអំពីលិខិតខាងលើនេះទេ ប៉ុន្តែលោកបានបញ្ជាក់ថា បញ្ហាជម្លោះរវាងមេដឹកនាំនិងប្រជាពលរដ្ឋនេះគួរតែដោះស្រាយឲ្យបានឆាប់ៗ។
លោក ថុយ តឹម បានឲ្យដឹងថា ៖ «ក្នុងលក្ខណៈប្រជាធិបតេយ្យ ...គេថាបោះឆ្នោត អាហ្នឹងយើងធ្វើតាមហ្នឹងទៅ មានទាស់ខុសអី!»។
សូមជម្រាបថា ជម្លោះថ្នាក់ដឹកនាំហាកឹមនៅក្នុងភូមិកំពង់យោលនេះបានកើតមានឡើងជាងមួយឆ្នាំមកហើយ ដោយប្រជាពលរដ្ឋមួយចំនួនបានចោទប្រកាន់ហាកឹមឈ្មោះ រីម ម៉ាត់ ថាដឹកនាំមិនល្អ។
កាលពីថ្ងៃទី២៥ ធ្នូ ឆ្នាំ២០០៨ អភិបាលរងខែត្រតាកែវ គឺលោកស្រី នូ សុវណ្ណនី និងប្រធានមន្ទីរធម្មកាខែត្រ ធ្លាប់បានចុះសម្រុះផងដែរ ប៉ុន្តែនៅតែមិនទាន់មានលទ្ធផល។
លោក នី សាន់ បានអំពាវសុំឲ្យក្រសួងធម្មកានិងសាសនាចុះទៅធ្វើការសម្រុះសម្រួលឬរៀបចំការបោះឆ្នោតជ្រើសរើសហាកឹមសាជាថ្មីឲ្យបានឆាប់ៗ ដើម្បីបញ្ចប់ជម្លោះនិងមានអ្នកគ្រប់ភូមិច្បាស់លាស់៕