មេឃុំកំពង់រាប លោក សុខ ទូច មានប្រសាសន៍នៅថ្ងៃព្រហស្បតិ៍ ទី១៦ ខែកញ្ញាថា គោក្នុងឃុំនោះឈឺឆ្លងគ្នាប្រមាណ ១ពាន់ក្បាល ចាប់ពីដើមខែកញ្ញា ឆ្នាំ២០១០ រហូតមកដល់ថ្ងៃនេះ។ ក្នុងនោះបណ្ដាលឲ្យសត្វគោធំតូចងាប់អស់ជិត ៩០ក្បាល។ លោកថា អ្នកស្រុកអស់សង្ឃឹមក្នុងការព្យាបាលជំងឺនេះ បានលក់គោឈឺក្នុងតម្លៃថោកជាងពាក់កណ្ដាល ៖ «សរុប ៣ថ្ងៃមុននោះគោងាប់អស់ ៨៥ហើយ ហើយឈឺជាង ១ពាន់ក្បាលហើយ ឈឺទាំងអស់តែម្តង»។
ចំណែកជំទប់ទី១ ឃុំពាមប្រធ្នោះ លោក ម៉ៅ ប៊ុនធឿន បានឲ្យដឹងថា សត្វគោនៅឃុំនោះបានងាប់ ៥០ក្បាល និងកំពុងឈឺច្រើនទៀត ដែលគេមិនទាន់ដឹងដោយសារជំងឺអ្វីពិតប្រាកដនោះទេ។ លោកថា អ្នកស្រុកយល់ថា ជាជំងឺអុតក្ដាម ប៉ុន្តែក្រោយការព្យាបាលបែរជាគោឆ្លងជំងឺកាន់តែច្រើនឡើង និងងាប់រហ័ស។
លោក ម៉ៅ ប៊ុនធឿន ឲ្យដឹងទៀតថា ៖ «គោឈឺប្រហែលជា ១០០ក្បាលហើយ សំខាន់បំផុតនៅខាងភូមិពាមក្រោម ដូចជាភូមិវាល ភូមិទួលក្តុល ភូមិទួលធាតុ ភូមិទួលកំពត។ ឥឡូវកំពុងឈឺនៅភូមិប៉ាក់ណាម»។
លោកយាយ ហៀវ ឲ្យដឹងថា កូនគោគាត់អាយុ ២ខែ ឈឺងាប់កាលពី ២ថ្ងៃមុន លក់បានតែ ៨ម៉ឺនរៀលទេ។ គោធំៗកំពុងឈឺដែរ ប្ដីគាត់បានទៅព្រៃរកថ្នាំបុរាណមកព្យាបាលវិញ ព្រោះតែអស់លទ្ធភាពព្យាបាលជំងឺគោ ដោយប្រើថ្នាំពេទ្យ ៖ «បញ្ច្រកចន្ទល់ភ្នំ ក្តាម អំពិលទុំទៅ អង្ក្រងទៅ ចេះតែបញ្ច្រក»។
ជំទប់ទី១ ឃុំមហាខ្ញូង លោក ថាន សំអុល ឲ្យដឹងថា គោនៅឃុំនោះបានងាប់ជាង ១០ក្បាល។ អ្នកស្រុកបានលក់គោក្នុងតម្លៃថោកឲ្យឈ្មួញវៀតណាម។ លោកថា គោងាប់ ១ក្បាលលក់បានតែ ២០ ទៅ ៣០ម៉ឺនរៀលទេ។ លោកបារម្ភក្រោយភ្ជុំបិណ្ឌ នឹងគ្មានសត្វគោជួយអូសទាញក្នុងរបរកសិកម្ម។
ពេទ្យសត្វស្រុកកោះសូទិន លោក នេន សាមីន បានឲ្យដឹងថា ជំងឺគោដែលកំពុងរាតត្បាតនេះ ជាជំងឺប៉េស្ត សាទឹក និងជំងឺអុតក្ដាម ។ លោកថា ជំងឺអុតក្ដាមងាយព្យាបាលទេ ប៉ុន្តែជំងឺសាទឹក និងជំងឺប៉េស្ត លំបាកព្យាបាល និងខ្វះវ៉ាក់សាំង ទើបបណ្ដាលឲ្យសត្វគោងាប់ច្រើនបែបនេះ។
លោក នេន សាមីន បន្តដូច្នេះ ៖ «តែជំងឺដែលងាប់នេះមិនមែនជំងឺអុតក្ដាមទេ ច្រើនតែងាប់ពួកអាជំងឺប៉េស្ត ជំងឺសាទឹក ខាន់ស្លាក់ចាប់កអីហ្នឹង។ ចំណែកខាងខ្ញុំបានសង្គ្រោះ ១៧០ក្បាល ជួយតែគោឈឺខ្លាំងណាស់។ ក្នុង ១៧០ក្បាលនោះ គឺងាប់ ១ នៅស្រែមាន។ ងាប់១យប់មិញហ្នឹង អាជំងឺងាប់១នោះ គឺព្យាបាលជាហើយ ក៏ប៉ុន្តែម្ចាស់វាគេដឹកយកទៅបឹង តាមមើលប្រហែលជាវាលាប់ក៏មិនដឹង»។
ប្រធានមន្ទីរកសិកម្មខេត្តកំពង់ចាម លោក ហេង ប៊ុនយិ មានប្រសាសន៍ថា ជំងឺសាទឹក ប៉េស្ត និងជំងឺអុតក្ដាម កើតលើសត្វគោនៅស្រុកកោះសូទិននោះ ព្រោះកសិករភាគច្រើនមិនបានយកសត្វគោទៅចាក់វ៉ាក់សាំង នៅពេលដែលមន្ត្រីពេទ្យសត្វបានចុះចាក់តាមភូមិ ឃុំ។ លោកថា បច្ចុប្បន្នមន្ត្រីបសុសត្វចុះបង្រៀនពលរដ្ឋឲ្យចេះការពារជំងឺអុតក្ដាម។
លោកពន្យល់ពីវិធីការពារដូច្នេះ ៖ «មកដល់សព្វថ្ងៃនេះ អាជំងឺអុតក្ដាមហ្នឹងវារាងរយាលជាងមុន ដោយសារយើងបង្រៀន បង្ហាត់គាត់ ផ្ដួលសត្វគោឲ្យប្រជាជនគាត់មើល ហើយដុសក្រចកវា ដាក់ថ្នាំវា និងមើលមាត់របស់វា កាលណាមានអណ្ដាតគោវាមានកើតជ្រាំង យើងយកថ្នាំឡឺម៉េទីឡែន លាបវា។ យើងធ្វើរបៀបអ៊ីចឹងបង្ហាញគាត់ពីមួយកន្លែងទៅមួយកន្លែងក្នុងភូមិនោះ ឲ្យគាត់ឃើញ កាលណាមានជំងឺកើតឡើងគាត់ចេះខ្លួនគាត់តែម្ដង»។
ក្រុមប្រឹក្សាស្រុកកោះសូទិន លោក សេក សណ្តាប់ បានឲ្យដឹងថា ក្នុងស្រុកកោះសូទិន ជំងឺគោរាតត្បាតខ្លាំង និងងាប់ច្រើនជាងគេចំនួន ៦ឃុំ មានឃុំតានង់ ឃុំមហាខ្ញូង ឃុំកំពង់រាប ឃុំពាមប្រធ្នោះ ឃុំល្វេ និងឃុំកោះសូទិន៕