ប្រជាពលរដ្ឋម្នាក់ក្នុងចំណោមពលរដ្ឋផ្សេងទៀតដែលប៉ូលិសបានកោះហៅទៅសាកសួរនិងធ្វើការផាកពិន័យជាទឹកប្រាក់ បានមានប្រសាសន៍ឲ្យដឹងកាលពីព្រឹកថ្ងៃព្រហស្បតិ៍ ទី១៨ ខែធ្នូ ថា គាត់ទើបតែត្រូវបានប៉ូលិសកោះហៅទៅសាកសួរនិងធ្វើការផាកពិន័យដោយសារតែបុគ្គលិកក្រុមហ៊ុនអគ្គិសនីខ្លួនឯងបានដើរធ្វើកុងទ័រភ្លើងដាក់ឲ្យអ្នកប្រើប្រាស់ ហើយអ្នកភូមិចង់បានចំណេញក៏នាំគ្នាធ្វើ។
ពលរដ្ឋដដែលបានឲ្យដឹងថា ៖ «យើងធ្លាប់ប្រើអស់១០០គីឡូអ៊ីចឹងទៅ ប្រើលើសក៏វាផាកដែរ។ វាធ្វើការក្រុមហ៊ុនហ្នឹងឯងមកដើរឃោសនាប្រាប់។ ប្រជាជនយើងចង់ឲ្យបានតិច ក៏នាំគ្នាកែ កន្លែងប៉ូលិសគេថាអាហ្នឹងស៊ុមគ្រលុំមានទោសស្មើគ្នា»។
ប្រជាពលរដ្ឋបាននិយាយទៀតថា អ្នកប្រើប្រាស់អគ្គិសនីប្រមាណ៨០%នៅក្នុងទីរួមខេត្តកំពុងជួបប្រទះបញ្ហានេះ។
ពេញមួយថ្ងៃព្រហស្បតិ៍មិនអាចទំនាក់ទំនងតំណាងក្រុមហ៊ុនអគ្គិសនី LYP Group ដើម្បីសុំការបំភ្លឺជុំវិញបញ្ហានោះបានទេ។
ចំណែកស្នងការនគរបាលខេត្តឧត្ដរមានជ័យ លោក មែន លី បានមានប្រសាសន៍ថា ប៉ូលិសពិតជាបានកោះហៅប្រជាពលរដ្ឋមួយចំនួនតាមបណ្ដឹងរបស់ក្រុមហ៊ុនមកសាកសួរមែន ក៏ប៉ុន្តែមិនឈានទៅដល់ការដាក់ទោសអតិថិជនទាំងនោះទេ គ្រាន់តែឲ្យសងប្រាក់ផាកពិន័យទៅតាមគីឡូម៉ោងភ្លើងដែលបានលួចប៉ុណ្ណោះ។ ក៏ប៉ុន្តែចំពោះបុគ្គលិកក្រុមហ៊ុនអគ្គិសនីដែលខិលខូចកែច្នៃកុងទ័របន្លំភ្លើងរបស់ក្រុមហ៊ុននោះប៉ូលិសបានចាប់ខ្លួនហើយ។
លោក មែន លី បានមានប្រសាសន៍ថា ៖ «យើងឃាត់បានហើយ បុគ្គលិកក្រុមហ៊ុនដែលវាកែច្នៃឲ្យគេនោះ។ យើងបានសួរបំភ្លឺ បានសួរកសាងសំណុំរឿងអីរួចអស់ហើយ អ៊ីចឹងយើងធ្វើនេះយោគយល់គ្នា មិនឲ្យធ្ងន់ធ្ងរឯណា មិនឈានដល់គុកដល់ច្រវាក់ទេ ប៉ុន្តែយើងលួចគេប៉ុន្មានគេគុណថ្ងៃខែរបស់យើងទៅ អាហ្នឹងយើងគួរតែសងគេទៅ។ ដោយឡែកអ្នកដែលមានអត់ពាក់ព័ន្ធ គឺអត់មានពាក់ព័ន្ធទេ»។
តាមមន្រ្តីប៉ូលិសឲ្យដឹងថា ក្រុមហ៊ុនបានដាក់បណ្ដឹងដំបូងពាក់ព័ន្ធទៅនឹងប្រជាពលរដ្ឋប្រមាណ៣៥គ្រួសារ ហើយពេលនេះប៉ូលិសបានកោះហៅមកសាកសួរបាន២០គ្រួសារហើយ។ ទោះយ៉ាងណាក៏ការផាកពិន័យទៅលើអ្នកប្រើឧបករណ៍ច្នៃលួចភ្លើងក្រុមហ៊ុននោះត្រូវបានអះអាងថា មានភាពអយុត្តិធម៌ខ្លះទៅលើអ្នកស្លូតត្រង់។
ស្រ្ដីម្នាក់នៅទីរួមខេត្តឧត្ដរមានជ័យបានមានប្រសាសន៍ថា ផ្ទះគាត់ពុំបានលួចច្នៃកុងទ័រគីឡូភ្លើងសោះ ក៏ប៉ុន្តែគាត់ត្រូវក្រុមហ៊ុនផាកពិន័យជាទឹកប្រាក់ប្រមាណជា១៦.០០០បាតប្រាក់ថៃ ៖ «ផាក១៦.៦០០បាត ។ គេថាគីឡូយើងកែ បើយើងមិនបង់លុយផាកពិន័យឲ្យគេ គេអត់ដាក់ឲ្យប្រើវិញ។ ភ្លើងនោះបើថាខ្ញុំកែ ខ្ញុំស្បថអស់ឲ្យគេហើយ»។
ក្រុមប្រជាពលរដ្ឋបានឲ្យដឹងថា អគ្គិសនីនៅទីរួមខេត្តឧត្ដរមានជ័យគឺមានតម្លៃ១១បាតប្រាក់ថៃក្នុងមួយគីឡូវ៉ាត់ម៉ោង ហើយតម្លៃនេះថ្លៃជាងពាក់កណ្ដាលនៃការប្រើប្រាស់ភ្លើងនៅតំបន់អូស្មាច់ដោយក្រុមហ៊ុនបានតម្រូវទូទាត់ថ្លៃប្រើប្រាស់អគ្គិសនីប្រចាំខែយកតែប្រាក់បាតថៃប៉ុណ្ណោះមិនគិតជាប្រាក់រៀលទេ៕