របាយការណ៍ចុះថ្ងៃទី១៦ ខែតុលា ឆ្នាំ២០០៨ បានឲ្យដឹងថា គ្រឿងញៀនសំយោគអាតេអេស ពិសេសមេតំហ្វេតាមីនគ្រាប់ ដែលភាសាថៃហៅថា យ៉ាម៉ា ឬយ៉ាបា ខ្មែរហៅថា ម៉ា ឬថ្នាំឆ្កួត និងមេតំហ្វេតាមីនប្រភេទទឹកកក ឬអៃស្ស៍ ដែលខ្មែរហៅថា ម៉ាទឹកកក គឺជាគ្រឿងញៀនដែលមានការនិយមប្រើប្រាស់ច្រើនជាងគេនៅក្នុងប្រទេសកម្ពុជានាពេលបច្ចុប្បន្ននេះ បន្ទាប់ពីគ្រឿងញៀនប្រភេទហេរ៉ូអ៊ីន កាវហិត កញ្ឆា និងអ៊ិចស្តាស៊ី។
អគ្គលេខាធិការដ្ឋានអាជ្ញាធរជាតិបញ្ជាក់ថា តាមរយៈការបង្រ្កាបបទល្មើសរបស់អង្គភាពអនុវត្តច្បាប់បានកត់សម្គាល់ឃើញនូវការផលិតក្លែងក្លាយនិងការកែច្នៃគុណភាពគ្រឿងញៀនសំយោគអាតេអេស ពិសេសមេតំហ្វេតាមីនគ្រាប់ នៅតែត្រូវបានពួកឧក្រិដ្ឋនបន្តលបលួចផលិតដើម្បីផ្គត់ផ្គង់តម្រូវការក្នុងស្រុក។
អគ្គលេខាធិការដ្ឋានអាជ្ញាធរជាតិបានឲ្យដឹងបន្ថែមថា ក្នុងចំណោមយុវជនដែលប្រើប្រាស់បំពានគ្រឿងញៀននៅកម្ពុជាក្នុងអំឡុងពេល៩ខែនៃឆ្នាំ២០០៨នេះ គឺថា យុវជនអាយុពី ១៨ ទៅ ២៥ឆ្នាំ មានប្រហែលជិត៦០%។ យុវជនអាយុពី ១០ ទៅ ១៧ឆ្នាំ មានប្រហែលជិត១៧%។ ក្នុងចំណោមយុវជនអ្នកដែលប្រើប្រាស់បំពានគ្រឿងញៀនទាំងនោះគឺថា ជិត៣៨%ជាអ្នកប្រកបរបរដោយប្រើកម្លាំង ជាង១៥%ជាសិស្សសាលា ជិត១៧%ជាក្មេងអនាថា និងប្រមាណ១៤%ជាអ្នកអត់មានការងារធ្វើ៕