ការអះអាងនានាបានលើកឡើងថា ការឡើងថ្លៃទំនិញ (អតិផរណា) ឬការឡើងថ្លៃលុយរៀល (លុយហើម) បានបង្ហាញជារូបភាពស្រដៀងគ្នា និងជះឥទ្ធិពលអាក្រក់ដល់ប្រជាជន ប៉ុន្តែរូបភាពទាំងពីរមានមូលហេតុផ្សេងគ្នា ព្រោះអតិផរណាមានទំនាក់ទំនងដោយផ្ទាល់ ដោយសារឡើងថ្លៃទំនិញ និងការឡើងថ្លៃលុយមានទំនាក់ទំនងដោយផ្ទាល់ ដោយសារការប្រែប្រួលអត្រាប្ដូរប្រាក់។
ដើម្បីគ្រប់គ្រងហានិភ័យទាំងនោះ រដ្ឋាភិបាលប្រទេសនីមួយៗតែងប្រើគោលនយោបាយរូបិយវត្ថុជាវិធានការដោះស្រាយ តាមរយៈកំណត់អត្រាប្ដូរប្រាក់។ ទោះជាយ៉ាងណាក៏ដោយ ប្រទេសកម្ពុជា មិនអាចប្រើគោលនយោបាយរូបិយវត្ថុបានឡើយ ដោយសារក្នុងសកម្មភាពសេដ្ឋកិច្ចភាគច្រើនប្រើដុល្លារអាមេរិក។
ក្នុងចំណោមប្រទេសអាស៊ានទាំង១០ មានតែប្រទេសកម្ពុជា និងប្រទេសឡាវ ដែលបានប្រើប្រាស់ប្រាក់ដុល្លារច្រើនលើសលប់ក្នុងសកម្មភាពសេដ្ឋកិច្ចរបស់ខ្លួន និងប្រទេសវៀតណាម បានប្រើប្រាស់ដុល្លារមានប្រមាណ ៣០% នៅក្នុងសកម្មភាពសេដ្ឋកិច្ច។ ដោយឡែក ប្រទេសកម្ពុជា បានចរាចរណ៍ដុល្លារច្រើនជាងគេបំផុតក្នុងចំណោមប្រទេសសមាជិកអាស៊ាន។
ការប្រើប្រាក់ដុល្លារនេះ បានផ្ដល់ទាំងផលវិជ្ជមាន និងអវិជ្ជមានដល់សេដ្ឋកិច្ចជាតិទាំងមូល ប៉ុន្តែធនាគារកណ្ដាលរបស់ប្រទេសមួយនឹងបាត់បង់អំណាចក្នុងការគ្រប់គ្រងហានិភ័យណាមួយដែលកើតឡើង ដោយសារតែការកើនឡើងអត្រាប្ដូរប្រាក់ ឬអតិផរណាជាដើម។ ម៉្យាងវិញទៀត ធនាគារកណ្ដាលនឹងបាត់បង់ឱកាស ឬបាត់បង់ផលចំណេញចំពោះការបោះពុម្ពរូបិយប័ណ្ណជាតិរបស់ខ្លួន។
ភាពកម្សោយនៃការគ្រប់គ្រងការចរាចរប្រាក់ដុល្លារ បានជះឥទ្ធិពលអាក្រក់ដល់ការប្រែប្រួលអត្រាប្ដូរប្រាក់ ដែលមាននិន្នាការជះឥទ្ធិពលកាន់តែអាក្រក់ដល់អតិផរណា ឬការឡើងថ្លៃទំនិញប្រើប្រាស់ជាទូទៅនៅប្រទេសកម្ពុជា។ ហើយកត្តានេះ បានជះឥទ្ធិពលកាន់តែអាក្រក់ថែមទៀតដល់ប្រជាជន ជាពិសេសអ្នកក្រីក្រ មានន័យថា ពួកគាត់ទាំងនោះទទួលបានអត្ថប្រយោជន៍កាន់តែតិចនៃការប្រើប្រាស់ទំនិញ កំឡុងពេលអតិផរណា ឬលុយហើម។
ជាទូទៅ អតិផរណានៅកម្ពុជា បានកើនឡើងជាមធ្យមប្រមាណ ៥% រៀងរាល់ឆ្នាំ។ កត្តានេះ អ្នកវិភាគសេដ្ឋកិច្ចយល់ឃើញថា ការកើនឡើងថ្លៃអតិផរណានេះនឹងធ្វើឲ្យប្រជាជននៅប្រទេសនោះបាត់បង់ចំណូលប្រមាណ ៥% ដែរ រៀងរាល់ឆ្នាំដែរ។ ប្រជាជនជាទូទៅ បានមធ្យោបាយផ្សេងៗដើម្បីដោះស្រាយការឡើងថ្លៃទំនិញ ឬលុយហើម តាមរយៈការកាត់បន្ថយការប្រើប្រាស់ទំនិញ ឬខ្ចីបំណុលគេ ដើម្បីបំពេញតម្រូវការមូលដ្ឋានប្រចាំឆ្នាំ។
អ្នកវិភាគសេដ្ឋកិច្ច លោក ហេង ឌីណា មានប្រសាសន៍ថា អតិផរណានៅប្រទេសកម្ពុជា រងឥទ្ធិពលដោយសារតែកំណើនតម្រូវការក្នុងស្រុកកើនឡើងខ្ពស់។ ប៉ុន្តែ ការឡើងថ្លៃទំនិញនៅកម្ពុជា គឺដោយសារតែការនាំចូលទំនិញពីប្រទេសជិតខាង មានន័យថា បើអតិផរណានៅប្រទេសជិតខាងកើនឡើង នឹងជះឥទ្ធិពលដល់ប្រទេសកម្ពុជា ដែរ។
ចំពោះការឡើងថ្លៃប្រាក់រៀលវិញ គឺបណ្ដាលមកពីតម្រូវការប្រាក់រៀលកើនឡើងខ្ពស់ ធៀបនឹងដុល្លារអាមេរិក មានន័យថា គឺត្រូវការប្រាក់ដុល្លារច្រើនជាងមុន ដើម្បីប្ដូរយកប្រាក់រៀល ប៉ុន្តែនិន្នាការនេះកើនឡើងនៅតាមរដូវកាលប្រមូលផលកសិកម្មតែប៉ុណ្ណោះ។ ករណីប្រទេសកម្ពុជា ប្រើប្រាស់ដុល្លារច្រើននៅក្នុងសកម្មភាពសេដ្ឋកិច្ច រដ្ឋាភិបាលមិនអាចប្រើគោលនយោបាយរូបិយវត្ថុ ដើម្បីទប់ស្កាត់បានឡើយ។ រដ្ឋាភិបាល ជាពិសេសធនាគារជាតិ អាចអន្តរាគមន៍តែលើការលក់ប្រាក់ដុល្លារទៅជាប្រាក់រៀលតែនៅពេលប្រាក់រៀលហើមនៅលើទីផ្សារ ដើម្បីកសាងទំនុកចិត្តប្រាក់រៀលលើទីផ្សារ។
ម្ចាស់គ្រប់គ្រងហាងប្ដូរប្រាក់លីហួរ អ្នកស្រី សៀង លឹម មានប្រសាសន៍ថា តម្រូវការប្រាក់រៀល បានកើនឡើងរៀងរាល់ឆ្នាំ ដោយសារតែកំណើនសេដ្ឋកិច្ច។ ប៉ុន្តែ ទំហំតម្រូវការប្រាក់រៀលបច្ចុប្បន្ន បានកើនឡើងភាគច្រើនមកពីទីជនបទ។ អ្នកស្រីបន្តថា ការកំណត់អត្រាប្ដូរប្រាក់ គឺទៅតាមយន្តការទីផ្សារនៅភ្នំពេញ និងតម្រូវការប្រាក់រៀលនៅតាមខេត្តនីមួយៗ ហើយការឡើងថ្លៃលុយរៀលកន្លងមកនៅទីក្រុងភ្នំពេញ គឺទាក់ទងតម្រូវការលុយរៀលសម្រាប់បង់ទឹកភ្លើង ចំពេលតម្រូវការលុយរៀលកើនឡើងនៅតាមបណ្ដាខេត្ត។
លោកនាយករដ្ឋមន្ត្រី ហ៊ុន សែន ធ្លាប់មានប្រសាសន៍ថា ការឡើងថ្លៃប្រាក់រៀលនេះ គឺបណ្ដាលមកពីតម្រូវការប្រាក់រៀលខ្ពស់ ហើយទាមទារឲ្យអ្នកពាក់ព័ន្ធត្រូវឲ្យមានប្រាក់រៀលមានស្ថិរភាពឡើងវិញ។
អ្នកស្រី សៀង លឹម បន្តថា រដ្ឋាភិបាល ជាពិសេសធនាគារជាតិ មានសមត្ថភាពគ្រប់គ្រាន់សម្រាប់គ្រប់គ្រងចរាចរណ៍ប្រាក់រៀលនៅប្រទេសកម្ពុជា ហើយក្នុងរយៈកាលចុងក្រោយ ប្រាក់រៀលនឹងមានស្ថិរភាព។
ការធ្វើឲ្យមានស្ថិរភាពប្រាក់រៀល អ្នកវិភាគសេដ្ឋកិច្ចបានអះអាងថា ធនាគារជាតិមិនអាចប្រើគោលនយោបាយហិរញ្ញវត្ថុ ក្នុងការកំហិតអត្រាការប្រាក់គោល (Discount Rate) ទៅបណ្ដាធនាគារផ្សេងៗបានឡើយ ដោយកម្ពុជា ប្រើជាដុល្លារ។ វិធានការដែលអាចធ្វើបាននោះ គឺការបោះពុម្ពប្រាក់រៀលបន្ថែម និងនៅពេលដែលប្រាក់រៀលហើមវិញ គឺតាមរយៈវិធានការលក់ដុល្លារយកប្រាក់រៀលមកទុក។
កត្តាទាំងនោះ អ្នកវិភាគសេដ្ឋកិច្ច លោក ហេង ឌីណា មានប្រសាសន៍ថា កត្តាទាំងនោះនឹងជះឥទ្ធិពលដល់អតិផរណាផងដែរ។ ទោះជាយ៉ាងណាក៏ដោយ អ្នកវិភាគសេដ្ឋកិច្ចអះអាងថា រដ្ឋាភិបាល និងអ្នកដែលពាក់ព័ន្ធ ត្រូវតែកសាងទំនុកចិត្តប្រាក់រៀលឲ្យកាន់តែខ្លាំង ដើម្បីឈានដល់ការប្រើគោលនយោបាយរូបិយវត្ថុ ក្នុងការអភិវឌ្ឍសេដ្ឋកិច្ច ដូចជាការគ្រប់គ្រងហានិភ័យដែលបង្កឡើងដោយអតិផរណា ឬលុយហើម ប្រកបដោយប្រសិទ្ធភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។