រដ្ឋលេខាធិការនិងជាអ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន បានមានប្រសាសន៍កាលពីព្រឹកថ្ងៃសៅរ៍ ទី៨ ខែសីហា ថា មន្ត្រីរដ្ឋាភិបាលកម្ពុជានៃក្រសួងវប្បធម៌និងវិចិត្រសិល្បៈ អាជ្ញាធរជាតិព្រះវិហារ មន្ត្រីអាជ្ញាធរអប្សរាខាងថែរក្សាប្រាសាទបូរាណ មន្ត្រីអង្គការ UNESCO និងអ្នកបច្ចេកទេសជាន់ខ្ពស់មកពីបរទេសផ្នែកស្រាវជ្រាវបេតិកភណ្ឌនិងបូរាណវិទ្យា ប្រមាណ២០០នាក់ នឹងជួបប្រជុំគ្នារយៈពេល២ថ្ងៃចាប់ពីថ្ងៃទី៨ រហូតដល់ទី១០ ខែសីហា ដើម្បីជជែកអំពីការអភិរក្សប្រាសាទបន្ទាយឆ្មារ។
លោក ផៃ ស៊ីផាន បានមានប្រសាសន៍ទៀតថា កាលពីព្រឹកថ្ងៃសៅរ៍ ទី៨ សីហា មន្ត្រីនិងក្រុមអ្នកជំនាញបានទៅពិនិត្យផ្ទាល់នៅជុំវិញបរិវេណប្រាសាទបន្ទាយឆ្មារ និងបានធ្វើពិធីព្រលែងកូនសត្វអណ្តើកជាច្រើនក្បាលនៅតាមកសិណនៃប្រាសាទបន្ទាយឆ្មារផង។
លោក ផៃ ស៊ីផាន បានមានប្រសាសន៍ថា ៖ «មកមើលផ្ទាល់នឹងកន្លែង មានតំណាងទូតអាមេរិកាំង ទូតបារាំង តំណាងទូតឥណ្ឌា តំណាងសាលាមកពីមជ្ឈិមបូព៌ា»។
លោក អ៊ឹម សុរិទ្ធី អ្នកស្រាវជ្រាវផ្លូវបូរាណរបស់អាជ្ញាធរអប្សរាដែលបានរៀបចំគម្រោងអភិរក្សប្រាសាទបន្ទាយឆ្មារមួយរយៈមកហើយ បានមានប្រសាសន៍ថា កាលពីពេលកន្លងមកក្រសួងវប្បធម៌និងវិចិត្រសិល្បៈរបស់ប្រទេសកម្ពុជា ធ្លាប់បានរៀបចំគម្រោងនឹងស្នើសុំដាក់ប្រាសាទបន្ទាយឆ្មារទៅក្នុងបញ្ជីបេតិកភណ្ឌពិភពលោក ប៉ុន្តែព័ត៌មានក្រៅផ្លូវការពីមន្ត្រីបេតិកភណ្ឌពិភពលោកឲ្យដឹងថា លក្ខណៈវិនិច្ឆ័យដែលកម្ពុជាបានស្នើដូចជានៅមិនទាន់បានគ្រប់គ្រាន់នៅឡើយ។
លោក អ៊ឹម សុរិទ្ធី បានមានប្រសាសន៍ទៀតថា បន្ទាប់ពីបញ្ចប់ការពិនិត្យមើលប្រាសាទបន្ទាយឆ្មារជាក់ស្តែងនេះ មន្ត្រីខ្មែរនិងក្រុមអ្នកជំនាញបរទេសនឹងជួបប្រជុំគ្នាជាលើកទី២ដើម្បីស្វែងរកពន្លឺនៃលក្ខណៈវិនិច្ឆ័យបន្ថែមឲ្យគ្រប់គ្រាន់ក្នុងការដែលអាចបញ្ចូលប្រាសាទបន្ទាយឆ្មារទៅក្នុងបញ្ជីបេតិកភណ្ឌនៃពិភពលោកបាន។
លោក អ៊ឹម សុរិទ្ធី បានបញ្ជាក់ថា ៖ «ការប្រជុំនេះអាចនឹងមានពន្លឺដោយសារមានអ្នកស្រាវជ្រាវ អ្នកប្រាជ្ញផ្សេងៗនោះ អាចនឹងបន្ថែមការខ្វះខាតគ្រប់លក្ខន្តិកៈដែលគេចង់បាន»។
មន្ត្រីអាជ្ញាធរអប្សរាបានឲ្យដឹងថា ប្រាសាទបន្ទាយឆ្មារ នៅឃុំបន្ទាយឆ្មារ ស្រុកថ្មពួក ជិតតំបន់ជាយដែនខ្មែរថៃគឺជាទីក្រុងតូចមួយរបស់អាណាចក្រខ្មែរ ដែលបានកសាងឡើងកាលពីអំឡុងសតវត្សរ៍ទី១២ ក្នុងរជ្ជកាលព្រះរាជាខ្មែរព្រះបាទ ជយវរ្ម័នទី៧ បានទទួលរងការបាក់បែកជាច្រើន ហើយចាប់ពីឆ្នាំ២០០៧រហូតមកដល់ពេលនេះ មានស្ថាប័នមួយឈ្មោះ GLOBAL HERITAGE FUND មានមូលដ្ឋាននៅសហរដ្ឋអាមេរិកនិងអង់គ្លេស បានមកធ្វើគម្រោងអភិរក្ស ដូចជាជួសជុលរូបចម្លាក់មួយចំនួន និងរៀបចំផ្ទាំងថ្មបែកបាក់នៅខាងក្នុងប្រាសាទឲ្យអាចចូលទស្សនាបានឡើងវិញ៕