មន្រ្តីជាន់ខ្ពស់នៃអាជ្ញាធរជាតិប្រយុទ្ធប្រឆាំងនឹងជំងឺអេដស៍និងតំណាងរបស់ការិយាល័យនៃឧត្តមស្នងការអ.ស.ប.ទទួលបន្ទុកសិទ្ធិមនុស្សនៅកម្ពុជា អង្គការ UNDP អង្គការ UNAIDS និងអង្គការក្រៅរដ្ឋាភិបាលមួយចំនួនទៀតក្នុងប្រទេសកម្ពុជានោះ នៅថៃ្ងសុក្រ ទី២៨ ខែសីហា បានមកត្រួតពិនិត្យរួមគ្នាអំពីស្ថានការណ៍រស់នៅជាក់ស្តែងនៃគ្រួសារផ្ទុកមេរោគអេដស៍ចំនួន៤២គ្រួសារនៅជាយក្រុងភ្នំពេញ នៅគ្រាដែលមានសេចក្តីរាយការណ៍ថា ពួកគាត់កំពុងតែប្រឈមមុខនឹងការខ្វះស្បៀងអាហារ ថ្នាំពន្យារជីវិត សុខភាពទ្រុឌទ្រោម និងគ្មានទឹកស្អាតប្រើប្រាស់។
លោក តែង គន្ធី ជាអគ្គលេខាធិការរបស់អាជ្ញាធរជាតិប្រយុទ្ធប្រឆាំងនឹងជំងឺអេដស៍នៃប្រទេសកម្ពុជា ដែលបានមកត្រួតពិនិត្យគ្រួសារផ្ទុកមេរោគអេដស៍ចំនួន៤២គ្រួសារដោយផ្ទាល់នោះ បានមានប្រសាសន៍ថា ៖ «យើងមកពិនិត្យថា អ្វីដែលយើងត្រួវការជួយពួកគាត់នូវចំណុចខ្វះខាត ហើយយើងដឹងស្រាប់ហើយថា ខ្ញុំនេះធ្វើការងារខាងអេដស៍ អ៊ីចឹងខ្ញុំផ្ដោតទៅលើបញ្ហាអេដស៍»។
ស្រ្តីឈ្មោះ ភក្តី នារី អាយុ៤៥ឆ្នាំ ជាអ្នកផ្ទុកមេរោគអេដស៍រស់នៅក្នុងភូមិទួលសំបូរ សង្កាត់ព្រៃវែង ខណ្ឌដង្កោ ជាយរាជធានីភ្នំពេញ បានថែ្លងជុំវិញស្ថានការណ៍រស់នៅដូច្នេះថា ៖ «ទី១ ដូចជាខ្វះខាតអត់មានទឹក ទី២ ដំបូលផ្ទះក្ដៅណាស់ ដូចជាខ្ញុំអីថ្មើរហ្នឹងរត់មកជ្រកផ្ទះគេ ផ្ទះខ្ញុំនៅអត់កើតទេ»។
ស្រ្តីម្នាក់ទៀតឈ្មោះ ចាន់ ធួក អាយុ៤២ឆ្នាំ បានថែ្លងថា លោកស្រីកំពុងតែជួបប្រទះបញ្ហាជាច្រើននៅកន្លែងថ្មីនេះ ៖ «ពិបាក និយាយទៅខ្វះអណ្ដូងទឹក រួចទៅផ្ទះហ្នឹងក្ដៅ ខ្វះពិដាន»។
កុមារីម្នាក់ឈ្មោះ ឈាង វិឆេង អាយុ៩ឆ្នាំ រៀនថ្នាក់ទី១ ជាកូនរបស់គ្រួសារផ្ទុកមេរោគអេដស៍ក្នុងចំណោម៤២គ្រួសារនោះ បានថែ្លងថា មានការខឹងសម្បាចំពោះការរើសអើងពីសំណាក់ក្មេងៗដទៃទៀតរៀននៅសាលាជាមួយគ្នា ៖ «គេថា ខ្ញុំហ្នឹងកូនកើតអេដស៍ គេអត់លេងចូលខ្ញុំទេ ខ្លាចឆ្លង។ ខ្ញុំខឹងគេថាអ៊ីចឹង»។
លោក កឹម រតនា ជានាយកប្រតិបត្តិនៃអង្គការក្រៅរដ្ឋាភិបាលមួយ ឈ្មោះ ការីតាស់ ប្រចាំនៅក្នុងប្រទេសកម្ពុជា បានមានប្រសាសន៍ជុំវិញការដោះស្រាយអំពីបញ្ហាទឹកស្អាតប្រើប្រាស់ជូនគ្រួសារផ្ទុកមេរោគអេដស៍ចំនួន៤២គ្រួសារនោះថា ៖ «ទឹកហ្នឹងជាគម្រោងរបស់ការីតាស់ សង់ផ្ទះសម្រាប់៣៩គ្រួសារដែលបាក់ច្រាំងហ្នឹង។ អ៊ីចឹងយើងធ្វើស៊ីតែនមួយចំណុះ១ម៉ឺនលីត្រ អ៊ីចឹង១ម៉ឺនលីត្រហ្នឹងអាចប្រើប្រាស់បានទាំងខាងណោះ ខាងណេះដែរ។ គម្រោងយើងបានចាប់ផ្ដើមហើយ ផ្ទះហ្នឹងយើងចង់ឲ្យរួចពាក់កណ្ដាលខែ៩»។
សូមជម្រាបថា ប្រតិភូមួយដែលមានសមាជិកប្រមាណជិត៥០នាក់មកពីរដ្ឋាភិបាលកម្ពុជា អង្គការសហប្រជាជាតិ និងអង្គការសិទ្ធិមនុស្សក្នុងស្រុកដទៃទៀត មកត្រួតពិនិត្យជាក់ស្តែងអំពីតម្រូវការចាំបាច់របស់គ្រួសារអ្នកផ្ទុកមេរោគអេដស៍ចំនួន៤២គ្រួសារនោះ ក្រោយពីរយៈពេល៣ខែបន្ទាប់ពីពួកគាត់ត្រូវបានអាជ្ញាធរជម្លៀសពីបុរីកីទ្បានៅក្នុងទីក្រុងភ្នំពេញកាលពីខែមិថុនាកន្លងទៅ ឲ្យទៅរស់នៅទីតាំងនៅក្នុងភូមិទួលសំបូរ សង្កាត់ព្រៃវែង ខណ្ឌដង្កោ ចម្ងាយប្រមាណជាង២០គីឡូម៉ែត្រខាងលិចទីក្រុងភ្នំពេញ ឆ្ងាយពីមណ្ឌលសុខភាពនិងទឹកស្អាតប្រើប្រាស់ជាដើម៕