ការរិះគន់នេះបានធ្វើឡើងខណៈដែលលោក ស ខេង ឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃ បានធ្វើការចែករថយន្តពេទ្យសង្រ្គោះអ្នកជំងឺ ចំនួន១៣គ្រឿងទៅ ឲ្យមន្ត្រីថ្នាក់ក្រោមនៃបក្សប្រជាជនកម្ពុជានៅខេត្តបាត់ដំបង ក្នុងពិធីបើកការដ្ឋានស្ថាបនាផ្លូវចាក់កៅស៊ូភ្ជាប់ផ្លូវជាតិលេខ៥៧ ទៅអាងកំពីងពួយក្នុងស្រុកបាណន់ ខេត្តបាត់ដំបង កាលពីព្រឹក ថ្ងៃអាទិត្យ ទី២១ ធ្នូ។
តំណាងរាស្ត្រគណបក្សសមរង្ស៊ី លោក សុន ឆ័យ បានស្វាគមន៍ការផ្តល់រថយន្តទាំង ១៣គ្រឿងនោះ ប៉ុន្តែលោកបានរិះគន់ពីការប្រើប្រាស់តួនាទីក្នុងរដ្ឋបាលរបស់រដ្ឋទៅបម្រើគណបក្ស ៖ «យើងសោកស្ដាយដែរ បើសិនណាជារដ្ឋមន្រ្តី ស ខេង គាត់មិនទាន់យល់នូវគោលការណ៍ទាំងនេះ ហើយសង្ឃឹមថា គាត់នឹងកែលម្អ ក៏ដូចជាមន្រ្តីក្នុងរដ្ឋាភិបាលដទៃទៀតនិងកែលម្អកំហុសឆ្គងនេះឲ្យបានឆាប់»។
មតិនេះរបស់លោកតំណាងរាស្ត្រ សុន ឆ័យ បានបង្កឲ្យមានប្រតិកម្មពីខាងលោក ខៀវ សុភ័គ អ្នកនាំពាក្យក្រសួងមហាផ្ទៃ។
លោកមានប្រសាសន៍ថា លោកឧបនាយករដ្ឋមន្ត្រី ស ខេង អញ្ជើញទៅចែកអំណោយរថយន្តនោះ នៅថ្ងៃឈប់សម្រាកពុំមែនថ្ងៃធ្វើការឬប្រើម៉ោងរាជការឡើយ ៖ «ឯកឧត្ដម ឧបនាយករដ្ឋមន្រ្តី រដ្ឋមន្រ្តីមហាផ្ទៃ លោកអញ្ជើញចុះទៅបំពេញការងារមូលដ្ឋានរបស់លោក ក្នុងនាមលោកជាសមាជិកអចិន្រ្តៃយ៍ គណៈកម្មការកណ្ដាល គណបក្សប្រជាជនកម្ពុជា ក្នុងថ្ងៃសម្រាក ថ្ងៃអាទិត្យទេ។ ហើយនៅក្នុងហ្នឹង លោកក៏បាននាំយកទៅជូនគ្រប់ស្រុកទាំងអស់ៗ មិនមែនចំពោះតែគណបក្សទេ នូវរថយន្តសង្រ្គោះបន្ទាន់ ១៣គ្រឿង នៅខេត្តបាត់ដំបង គ្រប់ស្រុកបានទទួលរថយន្តម្នាក់មួយគ្រឿង ដើម្បីជួយដល់ប្រជាពលរដ្ឋទាំងឡាយណាដែលលោកខ្វះខាតរថយន្ត ឲ្យមានក្នុងការប្រើប្រាស់សម្រាប់ផលប្រយោជន៍ មិនគិតថា អ្នកណាគណបក្សណាៗទេ សូម្បីតែគណបក្សសមរង្ស៊ីខ្លួនឯងក៏ដោយ បើគាត់ត្រូវការរថយន្តសង្រ្គោះរបស់ឧបនាយក ក៏លោកនឹងបម្រើជូនដែរ»។
លោក ខៀវ សុភ័គ បញ្ជាក់ប្រាប់វិទ្យុអាស៊ីសេរី ថា ប្រសាសន៍លោក សុន ឆ័យ ពុំអាចទទួលយកបានទេ ៖ «ដូច្នេះពាក្យថា សោកស្ដាយប្រសិនណាឯកឧត្ដមរដ្ឋមន្រ្តី ស ខេង គាត់មិនទាន់យល់នោះ ខ្ញុំយល់ថា ពាក្យនេះគឺមិនអាចទទួលយកបានទេ ហើយដែលខ្ញុំគិតថា ឯកឧត្ដម សុន ឆ័យ ខ្លួនឯងទេ ដែលមនុស្សមិនយល់នោះ មិនយល់ការណ៍ ឬក៏យល់ដែរធ្វើជាមិនយល់។ ការចោទប្រកាន់របៀបនេះ គ្រាន់តែជាការកេងចំណេញខាងនយោបាយអីៗ ដើម្បីបន្ទច់បង្អាក់ការកសាងជាតិ ជូនប្រជាជនពីសំណាក់មន្រ្តី ឥស្សរជន ឬក៏សមាជិកគណបក្សប្រជាជនទេ។ បើនិយាយពីគាត់វិញ បើគាត់មានរថយន្តសង្រ្គោះអីជួយ អបអរសាទរ គាត់យកទៅថ្ងៃណាក៏បានដែរ ប៉ុន្តែគាត់មិនដែលជួយអីផង គាត់មិនដែលបានឃើញជួយអីក្រៅពីបន្ទច់បង្អាក់នូវការកសាងជាតិ ការជួយប្រជាជនរបស់មន្រ្តីជាន់ខ្ពស់របស់គណបក្សប្រជាជន ឬក៏សមាជិកគណបក្សប្រជាជនទេ»។
ចំពោះប្រសាសន៍របស់អ្នកវិភាគឯករាជ្យ និងជាអតីតនាយិកាមជ្ឈមណ្ឌលអភិវឌ្ឍន៍សង្គម លោកស្រី ជា វណ្ណាត ដែលថា ការយកម៉ោងរដ្ឋបាលរបស់រដ្ឋទៅបម្រើបក្សនយោបាយមិនបម្រើប្រជាពលរដ្ឋគ្រប់ជ្រុងជ្រោយជាការបង្កឲ្យមានការប្រកាន់បក្សពួកច្រើនឡើងនោះលោកអ្នកនាំពាក្យក្រសួងមហាផ្ទៃ ថ្លែងបំភ្លឺដូច្នេះ ៖ «ខ្ញុំសូមឲ្យលោកស្រី ជា វណ្ណាត ពិនិត្យមើលតួនាទីរបស់លោកស្រីឲ្យមែនទែន ព្រោះថា ជាអ្នកវិភាគឯករាជ្យ ឲ្យឯករាជ្យអ៊ីចឹង? ការវិភាគអ៊ីចឹងមិនត្រូវទេ ហើយមើលឲ្យច្បាស់ ថ្ងៃហ្នុង ថ្ងៃអាទិត្យទេតើ! ថ្ងៃអាទិត្យ។ ថ្ងៃសៅរ៍ ថ្ងៃអាទិត្យ គាត់សម្រាកការងារពីរដ្ឋ ហើយមានចែងក្នុងរដ្ឋាភិបាលទៀត...»។
ឆ្លើយតបនឹងប្រតិកម្មរបស់មន្ត្រីអ្នកនាំពាក្យក្រសួងមហាផ្ទៃ លោកតំណាងរាស្ត្រ សុន ឆ័យ ថ្លែងបញ្ជាក់ដូច្នេះថា ៖ «ខ្ញុំបានបញ្ជាក់ហើយថា ការចែកអំណោយ យើងអត់ជំទាស់ទេ យើងស្វាគមន៍ ក៏ប៉ុន្តែក្នុងនាមជាសមាជិករាជរដ្ឋាភិបាល យើងជារដ្ឋមន្រ្តីស្ថិតនៅក្នុងរដ្ឋាភិបាលមួយ ដែលជារដ្ឋាភិបាលរបស់ជាតិទាំងមូល ដូច្នេះយើងមិនគប្បីប្រើប្រាស់តួនាទីជាតំណាងឲ្យបក្ស ក្នុងបេសកកម្មការងារ ក្នុងនាមជារដ្ឋមន្រ្តីរបស់រដ្ឋាភិបាលរបស់ជាតិទេ នេះ ខ្ញុំគ្រាន់តែបញ្ជាក់ប៉ុណ្ណឹង ថា វាហាក់ដូចជាយើងបានភ្លេចអំពីលក្ខណៈនៃការគ្រប់គ្រងក្នុងរបបមួយក្រោយឆ្នាំ១៩៩៣ ហើយបើការអនុវត្តបែបហ្នឹងកាលពីឆ្នាំ ៨០ អាហ្នឹងវាមិនជាការខុសទាស់ទេ ពីព្រោះបក្ស រដ្ឋ និងរដ្ឋាភិបាលគឺតែមួយទេ»៕