នៅក្នុងខេត្តបាត់ដំបង ការធ្វើអាជីវកម្មផ្លូវភេទនៅតែកើតមាន ក៏ប៉ុន្តែរូបភាពនៃការធ្វើអាជីវកម្មនេះមានការផ្លាស់ប្ដូរខុសពីមុន។
បន្ទាប់ពីព្រះអាទិត្យលិចបាត់ពន្លឺទៅ នៅពេលល្ងាចភ្លើងពណ៌ចម្រុះបានចូលខ្លួនមកបង្អួតនៅពេលរាត្រី។ ភ្លើងពណ៌ទាំងនោះត្រូវបានគេដាក់តុបតែងនៅតាមអគារផ្ទះសំណាក់ សណ្ឋាគារ ក្លឹបកម្សាន្ត បៀរហ្គាដិន ជាពិសេសនៅតាមហាងខារ៉ាអូខេក្នុងទីរួមខេត្តបាត់ដំបង ដើម្បីទាក់ទាញអតិថិជនឲ្យចូលទៅលេងកម្សាន្ត។
នៅខាងមុខផ្លូវចូលនៃក្លឹបកម្សាន្ត ភោជនីយដ្ឋាន និងហាងខារ៉ាអូខេជាច្រើនកន្លែងនៅក្នុងក្រុងបាត់ដំបង គេសង្កេតឃើញមាននារីវ័យក្មេង មានរូបសម្រស់ស្អាតៗជាច្រើននាក់ ក្នុងសម្លៀកបំពាក់លេចលើលេចក្រោម នៅលើផ្ទៃមុខមានភាពផូរផង់ទៅដោយក្រេមម្សៅ បានអង្គុយតម្រៀបគ្នាជាពីរជួរដើម្បីរង់ចាំទទួលភ្ញៀវ។
ក្លឹបកម្សាន្ត និងហាងខារ៉ាអូខេទាំងនោះ ពុំមែនជាកន្លែងសម្រាប់ផ្ដល់សេវាជួញដូរផ្លូវភេទដោយបើកចំហនោះទេ តែគេកត់សម្គាល់បានថា ការធ្វើអាជីវកម្មផ្លូវភេទនៅតែកើតមាននៅតាមក្លឹបកម្សាន្ត និងហាងខារ៉ាអូខេទាំងនោះ។
ស្ត្រីបម្រើការនៅតាមក្លឹបកម្សាន្តមួយរូបដែលសុំមិនចេញឈ្មោះ នៅក្នុងក្រុងបាត់ដំបង បានឲ្យដឹងថា រៀងរាល់រាត្រីមានភ្ញៀវបុរសជាអ្នកមានលុយកាក់ធូរធារជាច្រើននាក់ បានចំណាយពេលចូលផឹកស៊ីសប្បាយ និងបន្តចូលទៅច្រៀងកម្សាន្តនៅតាមហាងខារ៉ាអូខេ បន្ទាប់ពីការច្រៀងសប្បាយរួមមក ភ្ញៀវខ្លះបានធ្វើការតថ្លៃជាមួយស្ត្រីបម្រើនៅតាមហាងនោះយកទៅដេកនៅតាមផ្ទះសំណាក់ ឬបន្ទប់សណ្ឋាគារ ៖ «ភ្ញៀវបបួលទៅ ជួនកាលគាត់ចូលបានប្រហែកកន្លះម៉ោងអីអ៊ីចឹង គាត់អង្គុយ គាត់ហៅយើងទៅ គាត់សួរយើងថា ចេញក្រៅជាមួយគាត់អត់? ហើយដល់ពេលយើងអត់ទៅអ៊ីចឹងគាត់ទៅរកមេការ ទៅរកនារីផ្សេងឲ្យគាត់។ តាមភ្ញៀវ ភ្ញៀវល្អទៅមួយភ្លែតអ៊ីចឹងគេឲ្យ ៥០ដុល្លារ ភ្ញៀវខ្លះគេឲ្យ ១០០អ៊ីចឹង ហើយមេការ ៥០ ដឹងតែបាន ៥ដុល្លារ»។
ប៉ុន្តែប៉ូលិសខេត្តបាត់ដំបងបានលើកឡើងថា មិនមានការអនុញ្ញាតឲ្យមានការជួញដូរផ្លូវភេទឡើយ។
នាយការិយាល័យប្រឆាំងការជួញដូរ និងការពារអនីតិជននៃស្នងការនគរបាលខេត្តបាត់ដំបង លោក កុយ ហៀង បានមានប្រសាសន៍ថា ប្រសិនបើនៅតាមហាងខារ៉ាអូខេណាមានការជួញដូរផ្លូវភេទ សមត្ថកិច្ចជំនាញនៃស្នងការនគរបាលខេត្តបាត់ដំបង នឹងចុះចាត់វិធានការបង្ក្រាប ៖ «នៅក្នុងខារ៉ាអូខេ មានមេការមានអីអ៊ីចឹង រកសេវាឲ្យភ្ញៀវអ៊ីចឹង អាហ្នឹងគេហៅថា ការជួញដូរ អាហ្នឹងយើងក្ដាប់បានយើងត្រូវតែបង្ក្រាប»។
មន្ត្រីរាជការនៅក្នុងខេត្តបាត់ដំបង ម្នាក់បានឲ្យដឹងថា ការជួញដូរ និងការធ្វើអាជីវកម្មផ្លូវភេទនៅតាមក្លឹបកម្សាន្ត និងហាងខារ៉ាអូខេ នៅតែកើតមាន ប៉ុន្តែបញ្ហាទាំងនេះវាស្ថិតនៅក្នុងរូបភាពលួចលាក់ ៖ «វានៅក្នុងរូបភាពអាថ៌កំបាំងទេ នៅក្នុងកន្លែងហ្នឹង ប៉ុន្តែខ្លាចថា ហៅទៅនិយាយត្រូវគ្នាអីនាំទៅសណ្ឋាគារ ជារឿងមួយផ្សេងទេ ប៉ុន្តែក្នុងហ្នឹងវាអត់មាន»។
របាយការណ៍របស់មន្ទីរទេសចរណ៍ខេត្តបាត់ដំបង បានបង្ហាញថា នៅឆ្នាំ២០១១នេះ នៅក្នុងក្រុងបាត់ដំបង មានហាងខារ៉ាអូខេចំនួន ១៤កន្លែង ភោជនីយដ្ឋានចំនួន ៣៩ និងផ្ទះសំណាក់ចំនួន ៣២ និងសណ្ឋាគារចំនួន ២៦។ ចំនួនហាងខារ៉ាអូខេ ភោជនីយដ្ឋាន ផ្ទះសំណាក់ សណ្ឋាគារ មានការកើនឡើងជាបន្តបន្ទាប់ជាងឆ្នាំ២០១០ កន្លងទៅ។
តាមស្ថិតិរបស់អង្គការក្រៅរដ្ឋាភិបាលមួយ ហៅកាត់ថា ICMC (International Committee for Migration in Cambodia) ដែលបានធ្វើជំរឿនកាលពីអំឡុងឆ្នាំ២០០៦ រកឃើញថា នៅក្រុងបាត់ដំបង មានផ្ទះបើកបនចំនួន ៣៧កន្លែង ក្នុងនោះមាន ២១កន្លែងបើកចេញមុខ។ ទោះយ៉ាងណាសម្រាប់ឆ្នាំ២០១១នេះ គេសង្កេតពុំឃើញមានផ្ទះបនស្រីបើកជាចំហដូចរយៈពេលបួនប្រាំឆ្នាំមុននោះទេ។
យ៉ាងនេះក្ដី គេសង្កេតឃើញថា សកម្មភាពជួញដូរផ្លូវភេទនៅក្នុងខេត្តបាត់ដំបង នៅតែកើតមានដដែល ប៉ុន្តែវាមានការផ្លាស់ប្ដូររូបភាពនៃផ្ដល់សេវាផ្លូវភេទលួចលាក់នៅពេលយប់នៅក្រុងបាត់ដំបង ដើម្បីបំភាន់ក្រសែភ្នែកមហាជន និងកងកម្លាំងមានសមត្ថកិច្ចដែលមានតួនាទីបង្ក្រាបបនពេស្យាខុសច្បាប់។ ជាក់ស្ដែង កាលពីថ្ងៃទី៨ ខែកក្កដា ឆ្នាំ២០១១ កន្លងទៅនេះ ការិយាល័យប្រឆាំងការជួញដូរ និងការពារអនីតិជននៃស្នងការនគរបាលខេត្តបាត់ដំបង បានចុះប្រតិបត្តិការនៅវេលាម៉ោង ១២យប់ចាប់ខ្លួនអ្នករកស៊ីជួញដូរផ្លូវភេទចំនួន ៣៩នាក់ នៅក្នុងសួនច្បារ លោកឧបនាយករដ្ឋមន្ត្រី ស ខេង ដែលមានទីតាំងជាប់មាត់ស្ទឹងសង្កែ ក្នុងក្រុងបាត់ដំបង។
នាយការិយាល័យប្រឆាំងការជួញដូរ និងការពារអនីតិជននៃស្នងការនគរបាល ខេត្តបាត់ដំបង លោក កុយ ហៀង បានមានប្រសាសន៍ថា ក្នុងចំណោមអ្នករកស៊ីផ្លូវភេទ ៣៩នាក់នោះ មានបុរស ១៤ ស្រី ១៤នាក់ ខ្ទើយ ភេទទី៣ ចំនួន ១១នាក់។ នៅក្នុងចំនួន ៣៩នាក់នេះមានអនីតិជន ៥នាក់។
លោក កុយ ហៀង បន្តថា ៖ «នេះនៅក្នុងករណីយើងប្រមូលនេះជាអំពើពេស្យាចារផ្ទាល់ខ្លួន ដោយយើងមើលឃើញថា បទល្មើសវាស្រាល ពី១ថ្ងៃទៅ៦ថ្ងៃអ៊ីចឹង ហើយពិន័យពី ៣ពាន់ទៅ ១ម៉ឺនរៀល ដ៏អ៊ីចឹងស្នងការហៅទៅធ្វើកំណត់ពីជនអំពើពេស្យាចារផ្ទាល់ខ្លួននេះ ទី២ឲ្យគាត់ធ្វើកិច្ចសន្យាថា ចេញទៅវិញ មិនមានបទល្មើសដូចជាលើកនេះទេ សុំឲ្យគាត់កែប្រែខ្លួនទើបយើងបញ្ជូនឲ្យគាត់ទៅមន្ទីរសង្គមកិច្ច»។
ការប្រើប្រាស់សួនច្បារលោកឧបនាយករដ្ឋមន្ត្រី ស ខេង សម្រាប់រកស៊ីផ្លូវភេទផ្ទាល់ខ្លួនដែលសមត្ថកិច្ចបង្ក្រាបបាននេះ គឺជារូបភាពជួញដូរផ្លូវភេទថ្មីមួយទៀតនៅក្នុងខេត្តបាត់ដំបង ដែលពួកគេបានប្រើប្រាស់សួនច្បារសាធារណៈនៅពេលយប់។
ទាក់ទិនការជួញដូរផ្លូវភេទនេះ កាលពីឆ្នាំ២០១០ កន្លងទៅ សមត្ថកិច្ចជំនាញក៏បានធ្វើការស្រាវជ្រាវចាប់បានមេខ្យល់ជាស្ត្រីម្នាក់កសាងសំណុំរឿងបញ្ជូនទៅតុលាការចាត់ការតាមផ្លូវច្បាប់ បន្ទាប់ពីស្ត្រីជាមេខ្យល់រូបនោះបានធ្វើការជួញដូរផ្លូវភេទតាមរយៈនាំសិស្សស្រីៗ រៀននៅវិទ្យាល័យសម្ដេចឪក្នុងក្រុងបាត់ដំបង ទៅបុរសៗជាអ្នកមានលុយកាក់ដេកនៅតាមផ្ទះសំណាក់។
ប្រភពដែលសុំមិនបញ្ចេញឈ្មោះបានឲ្យដឹងថា រហូតមកទល់ពេលនេះ ការជួញដូរផ្លូវភេទតាមរយៈការអូសទាញសិស្សសាលាទៅដេកជាមួយពួកអ្នកមានលុយកាក់នៅក្នុងខេត្តបាត់ដំបង នៅតែកើតមានបន្ត ហើយករណីនេះ សមត្ថកិច្ចកំពុងធ្វើការស្រាវជ្រាវតាមចាប់ខ្លួនមេខ្យល់ និងអ្នកប្រព្រឹត្តទាំងនោះ ៖ «បងឯងពិនិត្យមើល សព្វថ្ងៃទាក់ទងជាមួយសិស្សសាលា អ្នកមានលុយមានអី ប្រើលុយប្រើកាក់ចិញ្ចឹមគេ ធ្វើម៉េចបម្រើតាមសេចក្ដីត្រូវការផ្លូវភេទរបស់ខ្លួន»។
ច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ បានចែងថា បុគ្គលដែលចាប់ឃុំឃាំង ឬបង្ខាំងជនដទៃដោយគ្មានអំណាចតាមផ្លូវច្បាប់ត្រូវផ្ដន្ទាទោសដាក់ពន្ធនាគារពី ៣ឆ្នាំ ទៅ ៥ឆ្នាំ បើសិនជាបង្ខាំងតិចជាង ១ខែ ហើយបើលើសពី ១ខែត្រូវដាក់ពន្ធនាគារពី ៥ឆ្នាំ ទៅ ១០ឆ្នាំ។
លោកឧត្ដមសេនីយ៍ត្រី ស ថេត ស្នងការនគរបាលខេត្តបាត់ដំបង កាលពីខែមីនា ឆ្នាំ២០១០ បានចេញសេចក្ដីណែនាំមួយបញ្ជាក់ថា ចាប់ពីឆ្នាំ២០១១នេះតទៅ មិនត្រូវឲ្យផ្ទះបនលួចលាក់គ្មានផ្ទះរកស៊ីផ្លូវភេទលួចលាក់ទោះក្នុងរូបភាពណាក៏ដោយ។ ក្នុងមូលដ្ឋានអធិការក្រុង ស្រុក និងប៉ុស្តិ៍នគរបាលរដ្ឋបាល និងភូមិសាស្ត្រណាដែលមានសេវាផ្លូវភេទមានផ្ទះបនលួចលាក់ ប៉ុស្តិ៍ និងអធិការនគរបាលនៅតាមស្រុកនោះត្រូវទទួលខុសត្រូវ៕